ក្លិប​វិសាខា បញ្ចប់​ដំណើរ​បោះ​ជុំរុំ​ហ្វឹកហាត់ ​និង​ប្រកួត​មិត្តភាព​នៅ​ប្រទេស​ថៃ​ហើយ

ក្លិប​កីឡាបាល់ទាត់​វិសាខា បានបញ្ចប់​ការប្រកួត​មិត្តភាព ក្នុង​កម្មវិធី Pre-Season Tour របស់ខ្លួន នៅ​ប្រទេស​ថៃ​ហើយ ត្រឹម​ថ្ងៃ​សុក្រ ទី​១៨ ខែមករា ឆ្នាំ​២០១៨ ខណៈ​ក្រុម​នេះ​នៅតែ​រក្សា​នូវ​កំណត់ត្រា​មិន​ស្គាល់​ចាញ់​នោះឡើយ ក្រោយ​ប្រកួត​ស្មើ​ក្រុម​ម្ចាស់ផ្ទះ BTU United ក្នុង​លទ្ធផល ២-២ នៅ​កីឡដ្ឋាន BTU ប្រទេស​ថៃ នា​ល្ងាច​ថ្ងៃ​ព្រ​ហ​ស្ប​តិ៍ ទី​១៧ ខែមករា ឆ្នាំ​២០១៩ ដែលជា​ប្រកួត​ចុងក្រោយ​។​

​ប្រកួត​ចុងក្រោយ​នេះ ក្រុម​ម្ចាស់ផ្ទះ គឺជា​អ្នក​រកបាន​គ្រាប់​បាល់​នាំមុខ​មុន នៅ​នាទី​ទី​៥ បន្ទាប់មក​ទើប​កីឡាករ ទិ​ត្យ ឌី​ណា រកបាន​គ្រាប់​បាល់​តាម​ស្មើ​ឲ្យ​វិសាខា នៅ​នាទី​៣៥ មុន​បញ្ចប់​តង់​ទី​១​។ ចូល​តង់​ទី​២ ក្រុម​ទាំងពីរ បាន​បង្កើត​ឱកាស​ក្នុង​ប្រអប់​គ្រោះថ្នាក់​រៀងខ្លួន ក្នុងនោះ​នៅ​នាទី​៥៩ កីឡាករ ទិ​ត្យ ឌី​ណា បាន​បំប៉ោង​សំណាញ់​ទី ១​គ្រាប់​ទៀត តែ​ត្រូវ​កីឡាករ​ម្ចាស់ផ្ទះ រកបាន ១​គ្រាប់​វិញ នៅ​នាទី ៧៣ ហើយ​ក៏បាន​រក្សា​លទ្ធផល​ស្មើគ្នា ២-២ ដល់​ចប់​ការប្រកួត​។​

​នេះ​គឺជា​ប្រកួត​មិត្តភាព​អន្ដរជាតិ​ទី​៦ ហើយក៏​ជាការ​ប្រកួត​ចុងក្រោយ​ផងដែរ អំឡុងពេល​ក្លិប​កីឡាបាល់ទាត់​វិសាខា បោះជំរំ​ហ្វឹកហាត់ នៅ​ប្រទេស​ថៃ ដើម្បី​ត្រៀម​រដូវ​កាល​ថ្មី​។ ចំពោះ​លទ្ធផល​ប្រកួត​មិត្តភាព​នៅ​ប្រទេស​ថៃ របស់​ក្លិប​កីឡាបាល់ទាត់​វិសាខា កន្លងមក​គឺ​ធ្លាប់​បានឈ្នះ​ក្លិប PAHANG FA របស់​ម៉ាឡេស៊ី ៣-១ បន្ត​ឈ្នះ​ក្លិប RSU FC ៥-០ ហើយ​ស្មើគ្នា​ជាមួយ​ក្លិប MOF CUSTOMS UNITED ១-១ តែ​វាយបក​យកឈ្នះ​វិញ ១-០ ក្នុងជំនួប​មិត្តភាព​លើក​ទី​២ បន្ត​យកឈ្នះ​ក្លិប Air Force United ១-០ និង​ចុងក្រោយ​ស្មើ​ក្លិប BTU United ២-២​។​

​យោងតាម​ការបញ្ជាក់រ​បស់​ក្លិប​លេខ​៣​ឆ្នាំ​ចាស់​ក្នុង​លី​គ​កំពូល​កម្ពុជា​នេះ​លើកឡើងថា បន្ទាប់ពី​បញ្ចប់​កម្មវិធី​បោះជំរំ​ហ្វឹកហាត់ Pre-Season Tour នៅ​ប្រទេស​ថៃ ក្លិប​កីឡាបាល់ទាត់​វិសាខា ត្រូវធ្វើ​ដំណើរ​ទៅ​ប្រទេស​កម្ពុជា​វិញ នៅ​ថ្ងៃទី​១៨ ខែមករា ឆ្នាំ​២០១៩ តែម្តង​ដើម្បី​បន្ដ​ហ្វឹកហាត់ និង​ប្រកួត​មិត្តភាព​ក្នុងស្រុក​មួយចំនួន ដើម្បី​ត្រៀម​រដូវ​កាល​ថ្មី ទាំង​ការប្រកួត​ក្របខណ្ឌ​លី​គ​កំពូល​កម្ពុជា និង​ពានរង្វាន់​សម្ដេច​តេ​ជោ ហ៊ុន សែន លើក​ទី​១៣ ឆ្នាំ​២០១៩ ខាងមុខ​៕​
​

Source: Kampuchea Thmey Daily