បន្ទាយមានជ័យ ៖ យុវជន២នាក់ គ្មានការងារធ្វើកោរសក់ស្លៀកស្បង់ចីវរបន្លំខ្លួនជាសង្ឃបន្ទាប់មកក៏ធ្វើសកម្មភាព ដើរបិណ្ឌបាតតាមទីសាធារណៈតាមផ្សារដើម្បីយកលុយចូលដេកផ្ទះសំណាក់ និងចូលលេងល្បែងកាស៊ីណូ ត្រូវអាជ្ញាធរមូលដ្ឋានចាប់ផ្សឹកប្រគល់ទៅឲ្យសមត្ថកិច្ចចាត់ការតាមច្បាប់នៅព្រឹកថ្ងៃទី១៥ ខែមករា ឆ្នាំ២០១៩នេះ។
សមត្ថកិច្ចបានប្រាប់អ្នកយកព័ត៌មានឲ្យដឹងថា ជនសង្ស័យដែលបន្លំខ្លួនជាសង្ឃទាំង២នាក់ ១មានឈ្មោះឌី រតនា អាយុ២៥ឆ្នាំ មានស្រុកកំណើតនៅខេត្តកំពង់ស្ពឺ ២មានឈ្មោះ ភារម្យ អាយុ២០ឆ្នាំ មានស្រុកកំណើតនៅខេត្តតាកែវ។ សមត្ថកិច្ចបានបញ្ជាក់ឲ្យដឹងទៀតថា តាមចម្លើយសារភាពរបស់ជនសង្ស័យដែលក្លែងបន្លំជាសង្ឃខាងលើ បានឆ្លើយសារភាពថា ពួកគេទាំង២នាក់ បានជួលជនម្នាក់ឲ្យធ្វើឆាយា លិខិតស្នាមក្លែងក្លាយ តម្លៃ២០ម៉ឺនរៀល ហើយបានពាក់ស្បង់ចីវរ ក្លែងជាសង្ឃ ដើរបិណ្ឌបាត រៃអង្គាសប្រាក់តាមផ្សារនិងតាមផ្ទះ ហើយជួលផ្ទះសំណាក់ស្នាក់នៅក្នុងប៉ោយប៉ែត ជាច្រើនថ្ងៃមកហើយ។ បន្ទាប់មកដឹងថា អភិបាលក្រុងប៉ោយប៉ែត ធ្វើពិធីបុណ្យរាប់បាត ក៏លួចបន្លំចូលជាមួយព្រះសង្ឃដទៃទៀត ក្រែងបានថវិកាពីការរាប់បាត ប៉ុន្តែនៅពេលនោះក៏ត្រូវអាជ្ញាធរឃាត់ខ្លួនប្រគល់ទៅឲ្យសមត្ថកិច្ចចាប់ឃាត់ខ្លួនតែម្តង។
សមត្ថកិច្ចបានបញ្ជាក់ឲ្យដឹងទៀតថា ជនក្លែងជាសង្ឃទាំង២នាក់ខាងលើ ត្រូវចាប់ផ្សឹក ដោយដោះស្បង់ជីវរចេញសមត្ថកិច្ចនាំយកទៅចាត់ការតាមផ្លូវច្បាប់ហើយ៕
Source: Kampuchea Thmey Daily
0 Comments