រថយន្ត​ហ៊ី​យិន​ដាយ​ បំពាន​ភ្លើងស្តុប ​បើក​បំ​បុក​ម៉ូតូ​២​គ្រឿង​ស្លាប់​ម្នាក់ ​របួស​ម្នាក់​ទាំង​ព្រឹក

កណ្តាល​ ៖​ ករណី​គ្រោះថ្នាក់​ចរាចរណ៍​មួយ​ បង្ក​ឲ្យ​មាន​ការ​ភ្ញាក់ផ្អើល​ទាំង​ព្រឹក​ព្រលឹម ខណៈ​គេ​ឃើញ​រថយន្ត​ម៉ាក​ហ៊ី​យិន​ដាយ​ បើក​បំពាន​ភ្លើងស្តុប​ទៅ​បុក​ម៉ូតូ​ពី​គ្រឿង​កំពុង​គោរព​ច្បាប់​ចរាចរ​(​ឈប់​ស្រុប​)​ចំ​ពីក្រោយ​កិន​ស្លាប់​ម្នាក់ របួស​ម្នាក់​។

​ហេតុការណ៍​គ្រោះថ្នាក់​ចរាចរណ៍​នេះ​ បាន​កើត​ឡើង​នៅ​ថ្ងៃ​ច័ន្ទ ០៨​រោច ខែបុស្ស​ឆ្នាំច សំរឹទ្ធិស័ក ពុទ្ធសករាជ ២៥៦២​ត្រូវ​នឹង​ថ្ងៃទី​២៨ ខែមករា ឆ្នាំ​២០១៨​វេលា​ម៉ោង​០៦ និង ០០​នាទី នៅ​ចំណុច​ស្តុ​ប​A9​ ផ្លូវ​២១​កែង​ផ្លូវ​១១៥ ស្ថិតនៅ​ភូមិ​ព្រែក​សំរោង សង្កាត់​តាខ្មៅ ក្រុង​តាខ្មៅ ខេត្តកណ្ដាល។

នគរបាល​ចរាចរណ៍​គោល​ដៅ​ភ្លើងស្តុប​ព្រែក​សំរោង​ បាន​ឲ្យ​ដឹង​ថា ​ជនរងគ្រោះ​ទី​០១ ហេង ស្រី​លក្ខណ៍ ភេទ​ស្រី​(​ស្លាប់​)​និង​ឈ្មោះ សឿន ចាន់​ថូ ភេទ​ប្រុស អាយុ​២៥​ឆ្នាំ រង​របួស​ស្រាល​) អ្នក​ទាំងពីរ​រស់នៅ​ភូមិ​ពោធិ​ក្រោម ឃុំ​ត្រើយ​ស្លា ស្រុក​ស្អាង ខេត្តកណ្ដាល។

​ជនបង្ក​អ្នក​បើករថយន្ត​ឈ្មោះ​ច្រង់ ប៊ុន​ឆាយ​(​ឃាត់ខ្លួន​) ​ភេទ​ប្រុស អាយុ​៣៣​ឆ្នាំ នៅ​ភូមិ​ផ្លូវបំបែក ឃុំ​ទឹក​វិល ស្រុក​ស្អាង ខេត្តកណ្ដាល។

សាក្សី​បាន​ឲ្យ​ដឹង​ថា នៅមុន​ពេល​កើត​ហេតុ​មាន​រថ​យន្ត​មួយ​គ្រឿង ម៉ាក​HYUNDAI ពណ៌​ស ពាក់​ស្លាក​លេខ ព្រះសីហនុ​3A-3743 បើកបរ​រថយន្ត​ក្នុង​ទិសដៅ​ពី​ត្បូង​ទៅ​ជើង​រួច​បត់​ឆ្វេង (​មិន​ឈប់​ស្តុ​ប​) ក៏បាន​ទៅ​បុក​ជាមួយ​ម៉ូតូ​០២​គ្រឿង ទី​០១​ម៉ូតូ​មួយ​គ្រឿង​ម៉ាក​SUZUKI LETS ពណ៌​ស ពាក់​ស្លាកលេខ កណ្ដាល​1O-6999 អ្នកបើក​ម៉ូតូ​ឈ្មោះ​សឿន ចាន់​ថូ ភេទ​ប្រុស អាយុ​២៥​ឆ្នាំ ម៉ូតូ​បើក​ក្នុងទិសដៅ​ពី​ត្បូង​ទៅ​ជើង និង​ម៉ូតូ​មួយ​គ្រឿង​ម៉ាក​HONDA CUB ពណ៌​សំបក​ឪឡឹក ពាក់​ស្លាក​លេខ​កណ្ដាល​1N-5927 អ្នក​បើក​ម៉ូតូ​ឈ្មោះ​ហេង ស្រី​លក្ខណ៍ ភេទ​ស្រី ម៉ូតូ​បើក​ក្នុង​ទិសដៅ​ពី​ត្បូង​ទៅ​ជើង​ចំ​ពីក្រោយ បណ្តាល​ឲ្យ​រថយន្ត​កិន​ស្លាប់​ម្នាក់ របួស​ម្នាក់ នៅ​និង​កន្លែង​កើត​ហេតុ​តែម្តង។

ភ្លាមៗ​កម្លាំង​ចរាចរណ៍​បាន​យក​មធ្យោបាយ​ដែល​ពាក់ព័ន្ធ​ទៅ​រក្សាទុក​បណ្ដោះអាសន្ន​នៅ​អធិការដ្ឋាន​ដើម្បី​ចាត់ការ​តាម​នីតិ​វិធី៕

Source: Kampuchea Thmey Daily