អាជ្ញាធរខេត្ត កំពុងដាំដើមផ្កាឈូករ័ត្នជាង៥០ម៉ឺនដើម នៅសងខាងមាត់ទន្លេផ្សារក្រោម ដើម្បី អបអរពិធីបុណ្យទន្លេ លើកទី៥ ក្នុងក្រុងកំពង់ឆ្នាំង

កំពង់ឆ្នាំង ៖ នៅក្នុងបំណាច់ខែមករានេះ អាជ្ញាធរខេត្តកំពង់ឆ្នាំង នឹងសម្រុកដាំដើមផ្កាឈូករ័ត្នចំនួនជាង៥០ម៉ឺន តាមដីនៅសងខាងមាត់ទន្លេជាង២០០០ម៉ែត្រ មុខផ្សារក្រោម ក្នុងសង្កាត់ផ្សារឆ្នាំង ក្រុងកំពង់ឆ្នាំងឲ្យបានរួចរាល់ នៅចុងខែមករានេះ ដែលត្រូវចំណាយថវិកាជាង១ម៉ឺនដុល្លារ ដើម្បីត្រៀមអបអរការធ្វើបុណ្យទន្លេនៅក្នុងខែមីនាខាងមុខនេះ។
លោក ម៉ុន វុត្ថា ប្រធានហិរញ្ញវត្ថុសាលាខេត្តកំពង់ឆ្នាំងនៅល្ងាចថ្ងៃទី២៤មីនា នេះ បាននិយាយឲ្យដឹងថា តាមគម្រោងផែនការរបស់អាជ្ញាធរខេត្តកំពង់ឆ្នាំង ដើម្បីអបអរសាទរការធ្វើបុណ្យទន្លេនៅក្នុងខែមីនាខាងមុខនេះ សាលាខេត្តកំពង់ឆ្នាំងបានសម្របសម្រួល និងសហការជាមួយ លោក ស៊ុំ សុជាតិ ស្នងការរងនគរបាល ខេត្តកំពង់ឆ្នាំង ដែលជាសប្បុរសជន កំពុងដាំដើមផ្កាឈូករ័ត្នប្រមាណជាង៥០ម៉ឺនដើម នៅសងខាងមាត់ទន្លេមុខផ្សារក្រោម ដែលជាកន្លែងប្រារព្ធធ្វើពិធីបុណ្យទន្លេ ដើម្បីបង្កើតឲ្យមានផ្កាធម្មជាតិស្រស់បំព្រង សម្រាប់ស្វាគមន៍ដឹកនាំជាតិគ្រប់លំដាប់ថ្នាក់ភ្ញៀវជាតិអន្តរជាតិគ្រប់មជ្ឈដ្ឋាន ដែលនឹងអញ្ជើញមកចូលរួមលេងកម្សាន្តក្នុងពិធីបុណ្យទន្លេ ក្នុងពេលខាងមុខនេះ។

លោកឧត្ដមសេនីយ៍ត្រី ស៊ុំ សុជាតិ ស្នងការរងនគរបាលខេត្តកំពង់ឆ្នាំង ដែលជាសប្បុរសជនស្ម័គ្រចិត្តជួយដាំដើមផ្កាឈូករ័ត្នខាងលើនេះ បាននិយាយឲ្យដឹងថា កន្លងមក លោកធ្លាប់បានដាំផ្កាឈូករ័ត្នជាង៧ពាន់ដើម បានជោគជ័យរួចមកហើយ កាលពីអំឡុងខែ៨ ខែកញ្ញា ឆ្នាំ២០១៨ នៅលើដីទីស្នាក់ការគណៈកម្មការរៀបចំការបោះឆ្នោតខេត្តកំពង់ឆ្នាំង ដើម្បីយកគ្រាប់ពូជនេះទុកដាំបន្តទៀត។ ដោយឡែក ក្នុងពេលនេះ តាមគម្រោងផែនការរបស់លោកអភិបាលខេត្តកំពង់ឆ្នាំង លោកបានជួលកម្មករចំនួន៤៦នាក់កំពុងដាំ និងថែទាំដើមផ្កាឈូករ័ត្នជាង៥០ម៉ឺនដើម លើដីនៅសងខាងតាមច្រាំងទន្លេមុខផ្សារក្រោម មានបណ្ដោយដីប្រវែង២០០០ម៉ែត្រ និងទទឹងដីពី១៥ម៉ែត្រ ទៅ២០ម៉ែត្រែ ដែលនឹងដាំផ្កានេះឲ្យរួចរាល់នៅចុងខែមករានេះ ដោយត្រូវចំណាយថវិកាប្រមាណជាង១ម៉ឺនដុល្លារ។
លោក ស៊ុំ សុជាតិ បានបញ្ជាក់ឲ្យដឹងទៀតថា ពូជគ្រាប់ផ្កាឈូករ័ត្ន លោកជ្រើសរើសយកមកពីបណ្តាខេត្តមួយចំនួននៅក្នុងស្រុកខ្មែរយើង ដែលផ្កាឈូករ័ត្ននេះជាប្រភេទផ្កាឈូករ័ត្នរបស់ខ្មែរ វាមានផ្កាបីស្រទាប់ និងវាអាចបែកមែកចេញផ្កាក្នុងមួយដើមពី៤ ទៅ ៥ផ្កាផងដែរ ខុសពីផ្កាឈូករ័ត្ននៅប្រទេសថៃ ដែលក្នុងមួយដើមមានផ្កាតែមួយប៉ុណ្ណោះ។ ផ្កាឈូករ័ត្ននេះ ត្រូវដាំរយៈពេល២ខែទើបចេញផ្កា ហើយវាអាចរក្សាផ្កាឲ្យនៅស្រស់បំព្រងរយៈពេល១ខែកន្លះ ទើបរុះរោយ។ បើយើងដាំឲ្យបានរួចរាល់នៅចុងខែមករានេះ គឺវាអាចនឹងចេញផ្កាស្រុះគ្នានៅពាក់កណ្ដាលខែមីនា ដែលជាខែត្រូវធ្វើបុណ្យទន្លេនៅក្នុងក្រុងកំពង់ឆ្នាំង ហើយវាអាចបន្តរក្សាសម្រស់ផ្កានេះរហូតដល់ចប់បុណ្យចូលឆ្នាំខ្មែរទើបរុះរោយ។

លោក ស៊ុំ សុជាតិ សូមអំពាវនាវផងដែរ ដល់មន្ត្រីរាជការ និងប្រជាពលរដ្ឋទាំងអស់នៅក្នុងខេត្តកំពង់ឆ្នាំង បើមានបំណងចង់យកពូជកូនផ្កាឈូករ័ត្ននេះទៅដាំនៅក្នុងមន្ទីរអង្គភាព និងដាំលំអនៅតាមលំនៅដ្ឋាន លោកនឹងចែកជូនដោយមិនគិតថ្លៃ។ ព្រោះថាលោកនៅលក់កូនផ្កាឈូករ័ត្ននេះប្រមាណ៥០ម៉ឺនដើមទៀត ក្នុងគោលបំណងរួមគ្នាដាំដុះផ្កានេះនៅក្នុងខេត្ត ក្រុងកំពង់ឆ្នាំង ដើម្បីធ្វើឲ្យខេត្តកំពង់ឆ្នាំងមានផ្កាស្រស់បំព្រងគ្រប់ទីកន្លែង ក្នុងពេលធ្វើបុណ្យទន្លេ និងក្នុងពេលបុណ្យចូលឆ្នាំប្រពៃណីខ្មែរខាងមុខនេះ ដើម្បីទាក់ទាញភ្ញៀវជាតិ និងអន្តរជាតិ ឲ្យមកចូលរួមលេងកម្សាន្តនៅក្នុងខេត្តកំពង់ឆ្នាំង៕