ឃុន ឌីម៉ា អ្នកប្រដាល់ក្លិបរស្មីភូមិគាបខេត្តបន្ទាយមានជ័យ នឹងត្រូវជួបប្រកួតជាមួយអ្នកប្រដាល់ថៃPhan Phayak នាព្រឹកថ្ងៃអាទិត្យ ទី២៧ ខែមករា ឆ្នាំ២០១៩នេះ លើសង្វៀនBoostrong Fighter On Fire នៅSEA-TV ។
Phan Phayak ជាអ្នកប្រដាល់ថៃចំណូលថ្មីមិនធ្លាប់មកប្រកួតនៅកម្ពុជានោះទេពីមុនមក។ ដូច្នេះ នេះជាលើកទី១ របស់ Phan Phayak ដែលត្រូវបានអ្នកផ្គូផ្គងឲ្យជួបជាមួយ ឃុន ឌីម៉ា នោះ។ អ្នកប្រដាល់ទាំងពីរនាក់នេះ ប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
អ្នកប្រដាល់ថៃ Phan Phayak នេះ មានស្នៀតប្រដាល់ល្អ និងខ្លាំង ហើយបទពិសោធន៍លើរេញរបស់គេគួរសមដែរ ព្រោះគេមានប្រវត្តិប្រកួតចំនួន៧៥លើក ឈ្នះ៦៣លើក និង ចាញ់១២លើក មិនដែលស្មើ។ បើតាម លោក ញាណ សុធី អ្នកផ្គូផ្គងប្រចាំSEA-TV ឲ្យដឹងនោះ។
ទោះជាយ៉ាងណា Phan Phayak លើកនេះ ជួបជាមួយ ឃុន ឌីម៉ា ក៏ប្រហែលជាមិនស្រួលខ្លួនប៉ុន្មានដែរ ព្រោះ ឌីម៉ា គេមានផ្លែល្អ។ និយាយរួម បើតាមកម្រិតសមត្ថភាពរបស់ ឃុន ឌីម៉ា អាចចាត់ទុកថា Phan Phayak ពុំអាចជាឧបសគ្គសម្រាប់ការទទួលជ័យជំនះរបស់ ឌីម៉ា នោះឡើយ។
ឃុន ឌីម៉ា ក្នុងការប្រកួតចំនួន១០៣លើក គេវាយឈ្នះ៨៩លើក ចាញ់១២លើក និងស្មើ០២លើក។ ការប្រកួតចុងក្រោយជាមួយថៃ ឌីម៉ា បានវាយឈ្នះអ្នកប្រដាល់ថៃYuokPhit ក្នុងទឹកទី២ កាលពីថ្ងៃទី០២ ខែធ្នូ ឆ្នាំ២០១៨។ តែយ៉ាងណា ឃុន ឌីម៉ា ក៏ត្រូវប្រយ័ត្នដែរ។
អ្នកប្រដាល់ឃុន ឌីម៉ា គេមានកណ្ដាប់ដៃខ្លាំង និងសន្ទុះជើងទាត់ខ្លាំង ហើយក៏មានស្នៀតជង្គង់កែងល្អដែរ។ ដូច្នេះចាំមើល តើនរណាឈ្នះរវាង ឃុន ឌីម៉ា និង Phan Phayak នេះ?។
រិន សារ័ត្ន ជាអ្នកប្រដាល់ក្លិបអប់រំកាយកីឡាស្រុកអន្លង់វែង គេនឹងជួបប្រកួតជាមួយអ្នកប្រដាល់ថៃFa Mechhai ដោយជួបគ្នាក្នុងទម្ងន់៦៥គីឡូក្រាម។ សារដ្ឋ ធ្លាប់ជួបថៃច្រើននាក់ជាងជួបជាមួយខ្មែរគ្នាឯង។ ប៉ុន្តែសារ័ត្ន ពុំធ្លាប់ដែលជួបជាមួយអ្នកប្រដាល់ថៃ Fa Mechhai នេះទេ។
Fa Mechhai គេមានកំណត់ត្រាប្រកួតច្រើនជាងរិន សារ័ត្ន។ Fa Mechhaiគេឆ្លងកាត់ការប្រកួតលើសង្វៀនចំនួន៦៥លើក ក្នុងនោះវាយឈ្នះ៥៣លើក ចាញ់១២លើក មិនដែលស្មើ។
បើធៀបជាមួយ រិន សារ័ត្ន គឺច្រើនជិត២០លើក ខណៈដែល សារ័ត្ន គេមានកំណត់ត្រាត្រឹមតែ៤៨លើក ឈ្នះ៣៤លើក ចាញ់១១លើក និងស្មើ០៣លើក។ យ៉ាងណា សារ័ត្ន គេមានកម្ពស់ខ្ពស់ជាងFa Mechhai គឺ១,៧០ម៉ែត្រ ខណះ Mechhai ១,៦៨ម៉ែត្រ។
ចាំមើល រវាង រិន សារដ្ឋ និង Fa Mechhai ជួបគ្នាលើកដំបូងនេះ តើនរណាជាអ្នកឈ្នះនោះ?។ អ្នកប្រដាល់ ម៉ន ព្រហ្មម៉ាញ ក្លិបការិយាល័យទី៥ កងទ័ពជើងគោក ត្រូវគេផ្គូឲ្យប្រកួតជាមួយអ្នកប្រដាល់អ៊ីរ៉ង់Ali Farazadeh ក្នុងប្រភេទទម្ងន់៦៣,៥០០គីឡូក្រាម។
Ali Farazadeh នេះ គេធ្លាប់មកប្រកួតនៅកម្ពុជាម្តងពីរដងហើយ។ គេជាអ្នកប្រដាល់ជើងថ្មី ប៉ុន្តែគេវាយល្អ និងខ្លាំងមិនចាញ់អ្នកប្រដាល់កម្ពុជានោះឡើយ។ ដូច្នេះ ម៉ន ព្រហ្មម៉ាញ មិនអាចមើលស្រាលAli Farazadeh បានទេ ព្រោះអ្នកប្រដាល់អ៊ីរ៉ង់រូបនេះ វាយខ្លាំង និងមានក្បាច់គុនល្អផងដែរ។
យ៉ាងណា សម្រាប់ការប្រកួតជាមួយAli Farazadeh នេះ ម៉ន ព្រហ្មម៉ាញ ត្រូវតែប្រយ័ត្នកណ្ដាប់ដៃរបស់គេ ព្រោះថាកណ្ដាប់ដៃរបស់គេរហ័ស លឿន។
តែយ៉ាងណា Ali Farazadeh ក៏មិនជាស្រួលខ្លួនប៉ុន្មានដែរ ព្រោះ ម៉ន ព្រហ្មម៉ាញ គេក៏វាយខ្លាំង និងមានបច្ចេកទេសក្នុងការប្រកួតល្អដែរ។ ហើយមួយទៀត គេវាយរហ័ស ដករហ័ស ចេញចូលលឿនមិនចាញ់Ali Farazadeh ទេ។
ម៉ន ព្រហ្មម៉ាញ មានកំណត់ត្រាប្រកួតចំនួន៦៦លើក ក្នុងនោះវាយឈ្នះ៥១លើក ចាញ់១៤លើក និងស្មើ ០១លើក។ ចំណែកAli Farazadeh គេមានកំណត់ត្រាប្រកួតចំនួន១៣លើក ឈ្នះ១០លើក ចាញ់០៣លើក និងមិនដែលស្មើ។ ចាំមើល រវាង ម៉ន ព្រហ្មម៉ាញ និងAli Farazadeh តើនរណាជាអ្នកឈ្នះនោះ?៕
Source: Kampuchea Thmey Daily
0 Comments