សិស្សនិស្សិត៤០០នាក់ ចូលរួមកម្មវិធីពិព័រណ៍ការសិក្សា និងអាហារូបករណ៍ នៅប្រទេសអង់គ្លេស

ភ្នំពេញ ៖ សិស្ស និស្សិត ជាង៤០០នាក់ កាលពីរសៀល ថ្ងៃទី១៩ ខែមករា ឆ្នាំ២០១៩ បានចូលរួមកម្មវិធីពិព័រណ៍ការសិក្សា និងអាហារូបករណ៍នៅអង់គ្លេស នៅសាលា ACE សាខាទួលគោក ទីក្រុងភ្នំពេញ ដើម្បីទទួលនូវការប្រឹក្សា ផ្ទាល់ និងបង្ហាញនៅជម្រើសសិក្សានានា នៅប្រទេសអង់គ្លេសស្ថាប័នអប់រំចំនួនជាង១៥ ស្ថាប័នមកពីប្រទេសអង់គ្លេស។

កម្មវិធីពិព័រណ៍នេះ រៀបចំឡើងដោយស្ថាប័នអប់រំ IDP កម្ពុជា ដែលជាស្ថាប័ននាំមុខគេជុំវិញពិភពលោកក្នុងការផ្តល់ប្រឹក្សាព័ត៌មាន និងក្នុងការបញ្ជូនសិស្ស និស្សិតទៅសិក្សានៅអង់គ្លេស អូស្ត្រាលី នូវែលហ្សេឡង់ កាណាដា អាមេរិក និងអៀរឡង់។ ស្ថាប័ន IDP មានជាង ១០០ ការិយាល័យជុំវិញពិភពលោក និងនៅអង់គ្លេសផ្ទាល់ផងដែរ។

កម្មវិធីពិព័រណ៍ការសិក្សា និងអាហារូបករណ៍នៅប្រទេសអង់គ្លេស គឺជាវេទិកាដ៏ធំមួយប្រចាំឆ្នាំ ដែលបង្ហាញនៅឱកាសសិក្សា លំដាប់ថ្នាក់ពិភពលោក នៅអង់គ្លេស។

លោក ម៉ៅ ស្រេង នាយកស្ថាប័នអប់រំ IDP ប្រចាំប្រទេសកម្ពុជាបានមានប្រសាសន៍ថា «ដូចអ្វីដែលយើងបានដឹងរួចមកហើយ ប្រព័ន្ធការសិក្សានៅប្រទេសអង់គ្លេសផ្តល់ឲ្យសិស្ស និស្សិតនូវស្តង់ដារការអប់រំលំដាប់ពិភពលោកនូវគ្រប់កម្រិតសិក្សា និងត្រូវបានគេទទួលស្គាល់ជាសកលលោកទៀតផង។ កំណើនសិស្ស និស្សិត ក៏ដូចជាអាណាព្យាបាលកាន់តែច្រើនឡើងបានដឹង និងស្វែងយល់ពីហេតុផលនេះ ហើយក៏បានធ្វើការសម្រេចចិត្តជ្រើសរើសទៅសិក្សានៅប្រទេសអង់គ្លេសជាច្រើនទៀតផង។ សិស្ស និស្សិត ដែលបានទៅបន្តការសិក្សានៅប្រទេសអង់គ្លេស ហើយតែងតែត្រលប់មកកម្ពុជាវិញ ជាមួយភាពជាអ្នកដឹកនាំសម្រាប់ប្រទេស និងចំណេះដឹង ដែលមានគុណភាពល្អប្រសើរ»។

លោកបានបន្តថា ស្ថាប័នអប់រំច្រើនជាង១៥ មកពីប្រទេសអង់គ្លេសបានមានវត្តមាននៅកម្មវិធីពិព័រណ៍ និងសិស្ស និស្សិត និងអាណាព្យាបាលបានមកជួបប្រឹក្សាជាមួយនឹងអ្នកតំណាងដែលមកពីស្ថាប័នទាំងអស់ និងទទួលយកព័ត៌មានអំពីជម្រើសសិក្សាគ្រប់កម្រិតចាប់ពីថ្នាក់វិទ្យាល័យ ថ្នាក់អប់រំវិជ្ជាជីវៈវគ្គខ្លី និងកម្មវិធីសិក្សាថ្នាក់សាកលវិទ្យាល័យ ក៏ដូចជា ព័ត៌មានអំពីអាហារូបករណ៍ដែលពាក់ព័ន្ធ និងតម្រូវការទិដ្ឋាការផ្សេងៗហើយការចូលរួមពិព័រណ៍នេះ និងការផ្តល់ប្រឹក្សាទៅសិក្សានៅបរទេសរបស់ស្ថាប័ន IDP គឺមិនតម្រូវឲ្យបង់ប្រាក់ទេ។
លោកស្រី Tina Redshaw អគ្គរាជទូតចក្រភពអង់គ្លេសប្រចាំនៅកម្ពុជាបានមានប្រសាសន៍ថា «ការទៅសិក្សានៅប្រទេសអង់គ្លេស មិនត្រឹមតែផ្តល់ឱកាសឲ្យនិស្សិតទទួលបាននៅការអប់រំតាមបែបទំនើប និងទាន់សម័យប៉ុណ្ណោះទេ ប៉ុន្តែក៏បានផ្តល់ឲ្យនិស្សិតនូវឱកាសការងារល្អៗ ដោយសារតែសញ្ញាប័ត្រ និងគុណភាពសិក្សានៅអង់គ្លេស ត្រូវបានទទួលស្គាល់ទូទាំងសកលលោកទៀតផង។

សម្រាប់សិស្ស និស្សិត និងឪពុកម្តាយដែលអញ្ជើញមកនៅថ្ងៃនេះ ខ្ញុំសង្ឃឹមថា កម្មវិធីពិព័រណ៍ការសិក្សា និងអាហារូបករណ៍នៅអង់គ្លេសនាថ្ងៃនេះ ផ្តល់នៅបទពិសោធន៍ល្អៗដែលអាចធ្វើឲ្យអ្នកចូលរួមទាំងអស់ ងាយស្រូលក្នុងការសម្រេចចិត្តទៅបន្តការសិក្សានៅអង់គ្លេស»។

ដោយឡែក មជ្ឈមណ្ឌលអូស្ត្រាលីសម្រាប់ការបណ្តុះបណ្តាល (ACE) ក៏មានបានវត្តមានក្នុងកម្មវិធីនេះដែរ និងបានផ្តល់នូវព័ត៌មានទាក់ទងនឹងការសិក្សាភាសាអង់គ្លេស ដើម្បីត្រៀមខ្លួនបំពេញលក្ខខណ្ឌ របស់ស្ថាប័នអប់រំ អង់គ្លេស។ មន្ត្រីមណ្ឌលប្រលង IELTS ប្រចាំប្រទេសកម្ពុជា ក៏បានចូលរួមផ្តល់ប្រឹក្សាពី ការចុះឈ្មោះប្រលង និងការត្រៀមប្រលង IELTS។ ស្របគ្នានេះដែរ មជ្ឈមណ្ឌលតេស្ត IELTS ប្រចាំកម្ពុជា បានធ្វើការបើកដំណើរការ និងកាត់ខ្សែបូស្វាគមន៍ក្នុងការបើកដំណើរការបន្ទប់ CDI Lab ជាលើកដំបូងផងដែរ។

ជាមួយនឹងប្រព័ន្ធថ្មីនេះដែរ សាធារណជន អាចធ្វើការជ្រើសរើសធ្វើតេស្ត IELTS តាមប្រព័ន្ធកុំព្យូទ័រ។ ប្រព័ន្ធតេស្ត IELTS CDI នេះត្រូវបានគេរំពឹងទុកថា នឹងក្លាយជាជម្រើសតេស្តងាយស្រួលដែល ធ្វើឲ្យតម្រូវការតេស្ត IELTS កើនឡើងជុំវិញពិភពលោក ក៏ដូចជាធ្វើឲ្យបេក្ខជនប្រលង មានសមត្ថភាពប្រើប្រាស់បច្ចេកវិទ្យាដែលកំពុងរីកចម្រើន។

ក្នុងនាមជាមជ្ឈមណ្ឌលតេស្តអន្តរជាតិ IELTS តែមួយគត់នៅកម្ពុជា ស្ថាប័នអប់រំ IDP មានក្តីរំភើបរីករាយដែលអាចផ្តល់បទពិសោធន៍ថ្មីនេះ ដល់សាធារណជននៅក្នុងប្រទេសកម្ពុជា ដែលជាបេក្ខជនធ្វើតេស្តសម្រាប់ការសិក្សា ការងារ និងការចំណាកស្រុកជាដើម៕