ភ្នំពេញ ៖ ជនសង្ស័យម្នាក់ ត្រូវបានជនរងគ្រោះចាប់ប្រគល់ឱ្យសមត្ថកិច្ចប៉ូលិសប៉ុស្តិ៍ទួលសង្កែ១ បន្ទាប់ពីចូលផ្ទះគេប៉ងលួចម៉ូតូភីស៊ីអិច តែត្រូវម្ចាស់ផ្ទះឃើញទាន់ កាលពីវេលាម៉ោង២និង៣០នាទីរសៀល ថ្ងៃទី១៧ ខែមករា ឆ្នាំ២០១៩ ស្ថិតក្នុងក្រុម៥ភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ។
ជនសង្ស័យឈ្មោះហេងវីរៈ ភេទប្រុស អាយុ២៨ឆ្នាំ មុខរបរមិនប្រាកដស្នាក់នៅភូមិ១៦ សង្កាត់ស្រះចកខណ្ឌដូនពេញ រីឯម្ចាស់ផ្ទះឈ្មោះពេជ្រ ពិទូ ភេទប្រុស អាយុ៤៣ឆ្នាំ ចំណែកម៉ូតូដែលជនសង្ស័យប៉ងលួចមិនបានសម្រេចនោះ ម៉ាកភីស៊ីអិច ពណ៌ស ពាក់ស្លាកលេខ ភ្នំពេញ1FH. 0555ជារបស់ជនរងគ្រោះឈ្មោះប៉ិត សុភីភេទប្រុសអាយុ២៨ឆ្នាំស្នាក់នៅផ្ទះកើតហេតុលេខ៤០ក្រុម៥ភូមិទួលសំពៅសង្កាត់ទួលសង្កែទី១ខណ្ឌឬស្សីកែវ មុខរបរជាងម្នាងសិលា។
ប្រភពព័ត៌មានបានឲ្យដឹងថា ជនសង្ស័យបានដើររចូលក្នុងបរិវេណរបងផ្ទះជួល រួចជនសង្ស័យបានដើរក្រវែលម៉ូតូភីស៊ីអិចខាងលើ ពេលនោះម្ចាស់ផ្ទះមានការសង្ស័យក៏ហៅសួរនាំថារកអ្នកណាគេ ពេលនោះជនសង្ស័យឆ្លើយតបថារកមិត្តភក្ដិនៅបន្ទប់លេខ៥។ ពេលនោះម្ចាស់ផ្ទះបានប្រាប់ថានៅបន្ទប់លេខ៥មិនមានមនុស្សប្រុសនោះទេ ដោយម្ចាស់ផ្ទះឃើញសកម្មភាពជនសង្ស័យហាក់ប្លែកក៏នាំគ្នាឆែកមើលក្នុងហោប៉ៅខោឃើញឧបករណ៍សម្រាប់កាច់សោ.កម៉ូតូ ក៏នាំគ្នាឃាត់ប្រគល់ឲ្យសមត្ថកិច្ចចាត់ការតាមច្បាប់តែម្តង។
វត្ថុតាង ដែលសមត្ថកិច្ចដកហូតបានមានសោខ្សៀលេខ៨មួយដើម-ដែកសំប៉ែតចុងស្រួចចំនួន៥ដើមនិងទូរស័ព្ទម៉ាកសាំសុងចុចពិលចាស់មួយគ្រឿង៕
Source: Kampuchea Thmey Daily
0 Comments