ចំនួន​អ្នកស្លាប់​ ដោយសារ​ការផ្ទុះ​ប្រេងឥន្ធនៈ​នៅ​ម៉ិ​ក​ស៊ិ​ក​កើន​ឡើងដល់​៧៩​នាក់​

ចំនួន​អ្នកស្លាប់​ដោយសារ​ការផ្ទុះ​ដ៏​ខ្លាំងក្លា​មួយ​នៅ​កណ្តាល​ប្រទេស​ម៉ិ​ក​ស៊ិ​ក ​បាន​កើន​ឡើងដល់​៧៩​នាក់​ កាលពី​ថ្ងៃអាទិត្យ​ ខណៈ​អាជ្ញាធរ​បាន​ប្ដេជ្ញា​ថា​ នឹង​ដាក់​ទោស​អ្នក ​ដែល​ទទួលខុសត្រូវ​ចំពោះ​ការ​មាន​ចេតនា​ធ្វើ​ឲ្យ​លេច​ធ្លាយ​ប្រេងឥន្ធនៈ​ ដែល​បាន​ទាក់ទាញ​មនុស្ស​រាប់​រយ​នាក់​ឲ្យ​ទៅ​ប្រមូល​ប្រេង​មុន​ពេល​វា​ផ្ទុះ។

​ការស្វែងរក​សាកសព​មនុស្ស​នៅ​កន្លែង​ផ្ទុះ​ក្នុង​រដ្ឋ Hidalgo បានបញ្ចប់​នៅ​យប់​ថ្ងៃ​សៅរ៍​។ ខណៈពេលដែល​ក្រុមគ្រួសារ​បានចាប់ផ្តើម​បញ្ចុះសព​នោះ ក្រុមមន្ត្រី​បាន​អះអាងថា ចំនួន​អ្នកស្លាប់​អាច​នឹង​កើន​ឡើងជា​បន្តទៀត​។​
​
រដ្ឋមន្ត្រី​សុខាភិបាល​លោក Jorge Alcocer បាន​និយាយថា មនុស្ស​ចំនួន​៦៦​នាក់​កំពុង​សម្រាក​ព្យាបាល​នៅ​មន្ទីរពេទ្យ​រដ្ឋ Hidalgo ហើយ​អ្នក​ដទៃទៀត​ដែល​ស្ថិតក្នុង​ស្ថានភាព​ធ្ងន់ធ្ងរ​គឺ​ត្រូវបាន​បញ្ជូនទៅ​ទីក្រុង Mexico City សម្រាប់​ការព្យាបាល​ពី​សំណាក់​គ្រូពេទ្យ​មាន​ឯកទេស​។​
​
លោក Alcocer បាន​និយាយថា សាកសព​មនុស្ស​ចំនួន​៦​នាក់​បន្ថែមទៀត​ត្រូវបាន​រកឃើញ​មុនពេល​ការស្វែងរក​បានបញ្ចប់​ដែលជា​ហេតុ​ធ្វើ​ឲ្យ​ចំនួន​មនុស្ស​ស្លាប់​ពី​អគ្គិភ័យ​កាលពី​ថ្ងៃ​សុក្រ​កើនឡើង​ដល់​ទៅ​៧៩​នាក់​។​
​
សមាជិកគ្រួសារ​នៃ​ជនរងគ្រោះ​បាន​អំពាវនាវ​ដល់​រដ្ឋាភិបាល​ឲ្យ​បន្ត​ការស្វែងរក​សាកសព​។​
​ពិធី​បុណ្យសព​បានចាប់ផ្តើម​រួចទៅហើយ​ប៉ុន្តែ​ការប្រគល់​សាកសព​នៅតែមាន​ភាពយឺត​យ៉ាវ​ដោយសារតែ​ជនរងគ្រោះ​ជាច្រើន​ត្រូវ​រលាក​រាងកាយ​មើល​លែង​ស្គាល់​។​
​
រដ្ឋអាជ្ញា​រដ្ឋ Hidalgo បាន​និយាយថា អ្នកស្លាប់​ចំនួន​៥៤​នាក់​ក្នុងចំណោម​នោះ​គឺ​មិនអាច​កំណត់​អត្តសញ្ញាណ​បាន​ឆាប់រហ័ស​ទេ​ហើយ​ត្រូវ​ទាមទារ​ឲ្យ​មានការ​វិភាគ DNA ។​
​គួរបញ្ជាក់​ជាថ្មី​ថា មនុស្ស​រាប់រយ​នាក់​ត្រូវបាន​គេ​អូសទាញ​ឲ្យ​ទៅ​កន្លែង​ដែល​ចោរលួច​យក​ប្រេង​នៅក្នុង​ទីក្រុង Tlahuelilpan ។​
​
រូបភាព​ដែល​ថត​ដោយ​ប្រព័ន្ធ​ផ្សព្វផ្សាយ​ក្នុងស្រុក​បានបង្ហាញ​ថា ប្រេងឥន្ធនៈ​បាន​ហូរ​ចេញពី​បំពង់​ខណៈ​មនុ​ស្សបាន​ប្រមូលផ្តុំ​គ្នា​នៅលើ​ទីតាំង​នោះ​ដោយ​ប្រើ​ធុង​ដើម្បី​ប្រមូល​ប្រេងសាំង​៕ AFP

​

Source: Kampuchea Thmey Daily