បន្ទាយមានជ័យ ៖ ក្មេង ២នាក់ គេភ្លេចទូរស័ព្ទនៅមុខផ្ទះលើគ្រែ ចូលទៅលួចទូរស័ព្ទរត់គេចចេញបាត់បានមួយដង្ហើមចង្រិត អាវុធហត្ថក្របួចជាប់ នៅវេលាម៉ោង១១យប់ ថ្ងៃទី៩ ខែមករា ឆ្នាំ២០១៩ ចំណុចចំណតរថយន្តចាស់ ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែតខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់ឲ្យដឹងថា យោងតាមពាក្យបណ្ដឹងពី ឈ្មោះ យិត គឹមហួរ ភេទប្រុស អាយុ៥៨ឆ្នាំ រស់នៅភូមិក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានប្តឹងក្នុងករណីមានក្មេងចូលមកលួចទូរស័ព្ទនៅពេលដែលខ្លួនភ្លេចនៅមុខផ្ទះ។ ក្រោយពីទទួលបានពាក្យប្តឹងហើយ លោកបានដឹកនាំកម្លាំងចុះធ្វើការស្រាវជ្រាវឃាត់ជនសង្ស័យបានចំនួន២នាក់ ១.ឈ្មោះ បាញ់ ហួរ ភេទប្រុស អាយុ២១ឆ្នាំ មុខរបរមិនពិតប្រាកដ រស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។ ២.ឈ្មោះ តាប់ រី ភេទប្រុស អាយុ១៩ឆ្នាំ មុខរបរមិនពិតប្រាកដ រស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។
តាមការបំភ្លឺរបស់ជនរងគ្រោះបាននិយាយថា មុនកើតហេតុនោះ ខ្លួនកំពុងអង្គុយលេងលើគ្រែមុខផ្ទះ ហើយបានដើរចូលទៅក្នុងផ្ទះ ដោយភ្លេចទូរស័ព្ទដៃនៅលើគ្រែ ពេលនឹកឃើញភ្លេចទូរស័ព្ទក៏ត្រឡប់មកយកវិញ ស្រាប់តែឃើញក្មេងចំនួន២បានចូលមកលួចយកទូរស័ព្ទពីលើគ្រែ ហើយរត់គេចចេញបាត់ទៅ។
ក្រោយពីឃាត់ខ្លួនហើយ ជនសង្ស័យបានបញ្ជូនមកទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ដោយបានការអនុញ្ញាតពី លោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ យោងតាមពាក្យបណ្តឹងរបស់ជនរងគ្រោះ អាចកំណត់ពីពិរុទ្ធបានយ៉ាងជាក់លាក់ ជនសង្ស័យខាងលើ អាចត្រូវចោទពីបទ លួច កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យទៅតុលាការ ដើម្បីចាត់ការបន្ត៕
Source: Kampuchea Thmey Daily
0 Comments