តាកែវ ៖ ជនរងគ្រោះម្នាក់ បានស្លាប់បាត់បង់ជីវិតសឹងមើលសពមិនយល់ ខណៈបើកបរម៉ូតូក្នុងល្បឿនលឿន ជ្រុលទៅបុកជាមួយនឹងរថយន្តដឹកទំនិញ ដែលបើកបរបញ្ច្រាសទិសគ្នាពេញទំហឹង។
ហេតុការណ៍នេះបានកើតឡើង កាលពីព្រលប់ថ្ងៃទី១៩ ខែមករា ឆ្នាំ២០១៩ វេលាម៉ោង២១និង១០នាទី នៅលើផ្លូវជាតិលេខ៣ ចន្លោះគីឡូម៉ែត្រលេខ៣៦-៣៧ ក្នុងភូមិទួលល្ហុង ឃុំតាំងដូង ស្រុកបាទី ខេត្តតាកែវ។ ប៉ូលិសស្រុកបាទីបានប្រាប់ថា រថយន្តប្រភេទដឹកទំនិញមិនស្គាល់អត្តសញ្ញាណមួយគ្រឿងបើកមកពីទិសខាងត្បូង លុះមកដល់ចំណុចកើតហេតុបានបុកជាមួយម៉ូតូមួយគ្រឿង ម៉ាកហុងដាឌ្រីមសេ១២៥ ស៊េរី២០១៥ ពណ៌ខ្មៅ ពាក់ស្លាក់លេខភ្នំពេញ1FA 5330 ដែលបើកបរក្នុងទិសដៅបញ្ច្រាសគ្នា បណ្តាលឲ្យម្ចាស់ម៉ូតូឈ្មោះ ស៊ិន សុទ្ធ ភេទប្រុស អាយុ៣៩ឆ្នាំ រស់នៅភូមិព្រៃទទិង ឃុំអង្គសូភី ស្រុកកំពង់ត្រាច ខេត្តកំពត ស្លាប់ភ្លាមៗនៅកន្លែងកើតហេតុ។
ក្រោយកើតហេតុ សមត្ថកិច្ចជំនាញស្រុកបាទី បានចុះដល់វាស់វែងធ្វើកំណត់ហេតុ និងបានប្រគល់សពជូនសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments