តំណាងរាស្ត្រមណ្ឌលរតនគិរី និងលោកជំទាវ អញ្ជើញចូលរួមខួបលើកទី៤០ ទិវាជ័យជម្នះ៧មករា១៩៧៩ -៧មករា ២០១៩

រតនគិរី ៖ នារសៀលថ្ងៃទី២០ ខែមករា ឆ្នាំ២០១៩ លោក ប៊ូ ឡាំ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអ្នកតំណាងរាស្ត្រមណ្ឌលរតនគិរី និងលោជំទាវ បានអញ្ជើញចូលរួមជាអធិបតីកិត្តិយសក្នុងពិធីអបអរសាទរខួបទី៤០ ទិវាជម្នះ៧មករា១៩៧៩ -៧មករា២០១៩ស្ថិតនៅភូមិ៤ សង្កាត់កាចាញ ក្រុងបានលុង ខេត្តរតនគិរី។

មានប្រសាសន៍ទៅកាន់បងប្អូនប្រជាពលរដ្ឋប្រមាណជិត៣០០នាក់ ដែលបានអញ្ជើញចូលរួមនាឱកាសនេះ លោក ប៊ូ ឡាំ បានលើកឡើងថា នេះជាទិវាគម្រប់ខួបលើកទី៤០ នៃមហាជ័យជំនះជាប្រវត្តិសាស្ត្រ នៃថ្ងៃ ៧មករាឆ្នាំ១៩៧៩ដែលបានសង្គ្រោះអាយុជីវិតប្រជាជនកម្ពុជារាប់លាននាក់ឲ្យរួចផុតពីការកាប់សម្លាប់ នៃរបបប្រល័យពូជសាសន៍ ប៉ុលពត ដ៏សាហាវយង់ឃ្នងបំផុត និងបានបើកឡើងវិញនូវសករាជថ្មី នៃកម្ពុជា គឺឯករាជ្យសេរីភាព ប្រជាធិបតេយ្យ និងអភិវឌ្ឍនភាពសង្គម។

ហើយការប្រារព្ធខួបអនុស្សាវរីយ៍នេះឡើង ក្នុងស្មារតីចងចាំជានិច្ចនូវគុណូបការៈដ៏ឧត្តុង្គឧត្ដមរបស់វីរៈកម្មាភិបាល យុទ្ធជន យុទ្ធនារី នៃរណសិរ្សសាមគ្គីសង្គ្រោះជាតិកម្ពុជា និងកងទ័ពស្ម័គ្រចិត្តវៀតណាម ដែលបានបូជាសាច់ស្រស់ឈាមស្រស់ក្នុងការប្រយុទ្ធ ដើម្បីផ្ដួលរំលំរបបប្រល័យពូជសាសន៍ប៉ុលពត និងការពារការរស់ឡើងវិញរបស់ជាតិ និងប្រជាជនកម្ពុជា ទោះបីពេលវេលាបានកន្លងផុតទៅជាច្រើនសតវត្សក៏ដោយ ក៏យើងទាំងអស់គ្នានៅតែចងចាំជានិច្ចនូវមហាសោកនាដកម្មដែលបណ្ដាលមកពីភ្លើងសង្គ្រាមដ៏សន្ធោសន្ធៅដែលបង្កឡើងដោយរដ្ឋប្រហាររបស់លន់នល់ នាថ្ងៃទី១៨ ខែមីនា ឆ្នាំ១៩៧០ តាមខ្សែញាក់របស់បរទេស និងមហាឧក្រិដ្ឋកម្មប្រល័យពូជសាសន៍របបកម្ពុជាប្រជាធិបតេយ្យរបស់ពួកខ្មែរក្រហមប៉ុលពតរយៈពេល៣ឆ្នាំ ៨ខែ និង២០ថ្ងៃ។

លោកបន្តថា នេះគឺជាអត្ថន័យ នៃថ្ងៃជ័យជម្នះ៧មករា ព្រោះថ្ងៃ៧មករា ជាថ្ងៃកំណើតទី២ នៃយើងទាំងអស់គ្នា។

លោកតំណាងរាស្ត្រ ក៏បានធ្វើការអំពាវនាវឲ្យពុកម៉ែបងប្អូនប្រជាពលរដ្ឋ ត្រូវមានស្មារតីរួបរួមគ្នាថែរក្សាសុខសន្តិភាព ស្ថិរភាពនយោបាយ និងការពារនូវរាល់សមិទ្ធផលដែលរាជរដ្ឋាភិបាលសម្រេចបាន ហើយត្រូវប្រឆាំងដាច់ខាតចំពោះបុគ្គលណា ឬ បក្សនយោបាយណាដែលប៉ុនប៉ងនាំកម្ពុជាធ្លាក់ចូលក្នុងភ្នក់ភ្លើងសង្គ្រាមឡើងវិញ៕