ប៉ៃលិន ៖ ហេតុការណ៍គ្រោះថ្នាក់ចរាចរណ៍មួយ រវាងម៉ូតូបុកជាមួយម៉ូតូ ក្នុងស្ថានភាពបញ្ច្រាសទិស បណ្តាលឲ្យទាហានម្នាក់ ដែលគេស្គាល់ថា ជាមេបញ្ជាការរងតំបន់ប្រតិបត្តិការសឹករងខេត្តប៉ៃលិន រងរបួសធ្ងន់ធ្ងរ រហូតដឹកបន្តពីមន្ទីរពេទ្យបង្អែកខេត្តប៉ៃលិន ទៅសង្គ្រោះនៅមន្ទីរពេទ្យខេត្តបាត់ដំបង ភ្លាមៗ ចំណែកភាគីម៉ូតូម្ខាងទៀត រងរបួសស្រាល។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១៩និង១៥នាទីយប់ ថ្ងៃទី២៨ ខែមករា ឆ្នាំ២០១៩ ស្ថិតក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន។
តាមប្រភពព័ត៌មានពីសមត្ថកិច្ចចរាចរណ៍ នៃអធិការដ្ឋាននគរបាលក្រុងប៉ៃលិន បានឲ្យដឹងថា ករណីគ្រោះថ្នាក់ចរាចរណ៍ខាងលើនេះ បណ្តាលមកពីកត្តាមនុស្សបើកបរខ្វះការប្រយ័ត្ន ក្នុងស្ថានភាពយប់ងងឹត។
ប្រភពព័ត៌មានបានបន្តថា ភាគីម្ចាស់ម៉ូតូ ទី១-ឈ្មោះ សរ ឯកសារិទ្ធ ភេទប្រុស អាយុ៥៥ឆ្នាំ ជាមេបញ្ជាការរងតំបន់ប្រតិបត្តិការសឹករងខេត្តប៉ៃលិន រងរបួសធ្ងន់ ដោយជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ បាត់ដំបង1M-8982 ជិះតែម្នាក់ឯង ទិសដៅពីលិចទៅកើត។ ចំណែកភាគីម្ចាស់ម៉ូតូទី២-ឈ្មោះ រ៉េត រិទ្ធ ភេទប្រុស អាយុ៣៦ឆ្នាំ ជាជាងសំណង់ រងរបួសស្រាល ស្នាក់នៅភូមិបរតាំងស៊ូ សង្កាត់បរយ៉ាខា ក្រុងប៉ៃលិន ដោយជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខប៉ៃលិន1A-1754 ជិះតែម្នាក់ឯង ទិសដៅពីកើតទៅលិច។
ប្រភពព័ត៌មាន បានបន្តទៀតថា ចំពោះករណីនេះដែរ សមត្ថកិច្ចជំនាញចរាចរណ៍ នៃស្នងការនគរបាលខេត្ត/ក្រុង មិនទាន់កំណត់មុខសញ្ញាម្ចាស់ម៉ូតូមួយណាខុស ឬត្រូវ បាននៅឡើយទេ រង់ចាំការចុះវាស់វែងនៅពេលព្រឹកស្អែកបន្តទៀត ចំណែកភាគីម្ចាស់ម៉ូតូ ដែលរងរបួសទាំងអស់ ត្រូវបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិនផងដែរ។
បច្ចុប្បន្ន ម៉ូតូទាំងពីរគ្រឿង ដែលរងការខូចខាតធ្ងន់ធ្ងរ ត្រូវបានសមត្ថកិច្ចជំនាញចរាចរណ៍ខេត្តប៉ៃលិន ដឹកទៅកាន់ការិយាល័យចរាចរណ៍ នៃស្នងការនគរបាលខេត្ត រង់ចាំការដោះស្រាយនៅពេលក្រោយ៕
Source: Kampuchea Thmey Daily
0 Comments