កំពង់ឆ្នាំង ៖ ជនសង្ស័យម្នាក់ ដែលបានចាប់កុមារបង្ខាំងជំរិតទារប្រាក់តាមទូរស័ព្ទ ត្រូវបានសមត្ថកិច្ចនគរបាលក្រុងកំពង់ឆ្នាំង សហការជាមួយសមត្ថកិច្ចនគរបាលខណ្ឌឫស្សីកែវ និងសមត្ថកិច្ចនគរបាលព្រហ្មទណ្ឌកម្រិតធ្ងន់ នៃស្នងការដ្ឋានរាជធានីភ្នំពេញ ចាប់ខ្លួនបានកាលពីវេលាម៉ោង៥និង៣០នាទីល្ងាច ថ្ងៃទី១៩ ខែមករា ឆ្នាំ២០១៩ ចំណុចផ្ទះសំណាក់តារាវង្ស ដែលស្ថិតនៅក្នុងភូមស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចបានឲ្យដឹងថា មុខសញ្ញាជនល្មើសខាងលើនេះបានចាប់ក្មេងបង្ខាំងក្មេងជំរិតទារប្រាក់តាមទូរស័ព្ទ ចំនួន២.០០០ដុល្លារ និងទារយកបានសម្រេចចំនួន៥០០ដុល្លារ នៅចំណុចចំណតរថយន្តក្រុងមួយកន្លែង ស្ថិតក្នុងភូមិសាមគ្គី សង្កាត់ឫស្សីកែវ ខណ្ឌឫស្សី កែវ រាជធានីភ្នំពេញ កាលពីថ្ងៃទី២០ ខែវិច្ឆិកា ឆ្នាំ២០១៨ កន្លងទៅ។
ករណីនេះ ក្រោយពីសមត្ថកិច្ចទទួលបានឯកសារព័ត៌មាន និងរូបថតជនសង្ស័យ សមត្ថកិច្ចបានសហការគ្នាចុះស្រាវជ្រាវ នៅផ្ទះសំណាក់តារាវង្ស ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ដែលមុខសញ្ញាកំពុងស្នាក់នៅ ហើយចាប់ក្របួចរូបគេបានតែម្តង។
ជនសង្ស័យដែលត្រូវបានសមត្ថកិច្ចចាប់ខ្លួននេះ មាន ឈ្មោះ ស្រេង បុរី ភេទប្រុស អាយុ២៤ឆ្នាំ មានស្រុកកំណើតភូមិកូនក្អែក១ ឃុំរបោះមង្គល ស្រុកមោងឬស្សី ខេត្តបាត់ដំបង សព្វថ្ងៃមានទីលំនៅមិនពិតប្រាកដ។
សមត្ថកិច្ចបានបញ្ជាក់ឲ្យដឹងទៀតថា នៅមុនចាប់មនុស្សជំរិតទារប្រាក់ ជនសង្ស័យបានលួងលោម ជនរងគ្រោះ ឈ្មោះ ឈុន សុវណ្ណរ័ត្ន ភេទប្រុស អាយុ១៤ឆ្នាំ មានទំលំនៅភូមិចោមចៅ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ខណៈដែលជនរងគ្រោះចេញពីសាលារៀន ឈប់ចាំជិះរថយន្តក្រុង នៅចំណតក្នុងខណ្ឌឫស្សីកែវ។ ដោយជនសង្ស័យ បានចាប់បង្ខាំងជំរិតទារប្រាក់តាមទូរស័ព្ទពីឪពុកម្ដាយកុមាររងគ្រោះ ចំនួន២០០០ដុល្លារ ដោយទារយកបានសម្រេចចំនួន៥០០ដុល្លារ ទើបដោះលែងកុមាររងគ្រោះឲ្យទៅផ្ទះវិញ។ បន្ទាប់មក ជនសង្ស័យបានគេចខ្លួនមកសម្ងំលាក់ខ្លួននៅផ្ទះសំណាក់ខាងលើនេះ។
ជនសង្ស័យ ត្រូវបានសមត្ថកិច្ចនគរបាលក្រុងកំពង់ឆ្នាំងប្រគល់ជូនសមត្ថកិច្ចការិយាល័យនគរបាលកម្រិតធ្ងន់ នៃស្នងការដ្ឋានរាជធានីភ្នំពេញ ចាត់ការបន្តតាមផ្លូវច្បាប់៕
Source: Kampuchea Thmey Daily
0 Comments