អ្នកប្រដាល់ជើងខ្លាំងផល សោភ័ណ្ឌ ក្លិបតាឡីដំរីមានរិទ្ធ នឹងត្រូវជួបជាមួយអ្នកប្រដាល់ជើងខ្លាំងថៃ ជេនវត្ថិ គៀតខាំថន (Jenwath Keathkhamtorn) នាយប់ថ្ងៃសុក្រ ទី១១ ខែមករា ឆ្នាំ២០១៩នេះ នៅលើសង្វៀនគូបូតាបាយ័នស្ទឹងមានជ័យ។ ពួកគេទាំងពីរ នឹងប្រកួតគ្នាក្នុងទម្ងន់៦៥ គីឡូក្រាម។
ជេនវត្ថិ គៀតខាំថន ជាអ្នកប្រដាល់ជើងខ្លាំងនៅស្រុកថៃ។ តាមប្រវត្តិ ជេនវត្ថិ គៀតខាំថនធ្លាប់មកប្រកួតនៅសង្វៀនស្រុកខ្មែរប៉ុន្មានលើកហើយកន្លងមក។ ទោះជាយ៉ាងនេះក្តី អ្នកប្រដាល់ថៃរូបនេះ លើកនេះជួបប្រកួតជាមួយផល សោភ័ណ្ឌ ប្រហែលជាមានការលំបាកបន្តិចហើយ ព្រោះសោភ័ណ្ឌមានបច្ចេកទេសល្អ កណ្តាប់ដៃរហ័ស ខ្លាំង ហើយកែង ក៏មុតស្រួចទៀត។
ប៉ុន្តែយ៉ាងណា អ្នកប្រដាល់ថៃនេះ គឺមិនអាចថា គេខ្សោយជាងសោភ័ណ្ឌនោះទេ ព្រោះ ជេនវត្ថិ គៀតខាំថន គេធ្លាប់វាយឈ្នះអ្នកប្រដាល់ជើងខ្លាំងខ្មែរយើងគឺមុត ខ្លឹមខ្មៅ ម្តងហើយកាលពីឆ្នាំ២០១៧កន្លងទៅ។
ផល សោភ័ណ្ឌ គេមានប្រវត្តិប្រកួតចំនួន១៣៥លើក។ ក្នុងនោះ ផល សោភ័ណ្ឌ វាយឈ្នះ១១៩លើកហើយ ដោយចាញ់តែ១៤លើក និងស្មើ០២លើក ហើយធ្លាប់ផ្តួលគូប្រកួតឲ្យសន្លប់លើរេញចំនួន៤៤លើក។ សោភ័ណ្ឌ ខ្លាំងកណ្តាប់ដៃ និងទាត់។ តែទោះជាយ៉ាងណា សោភ័ណ្ឌ ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើនរណាឈ្នះរវាងផល សោភ័ណ្ឌ និងជេនវត្ថិ គៀតខាំថន នេះ?។
ចំពោះអ្នកប្រដាល់ជើងខ្លាំង ចាន់ ស៊ីណាត ក្លិបនិរោធមានជ័យ នឹងត្រូវជួបប្រកួតជាមួយអ្នកប្រដាល់ថៃឈ្មោះយ៉ត ផាយ៉ាក ក. អឌីសន (Yodpayak Kor.Ahdisorn)។ ពួកគេជួបគ្នាក្នុងប្រភេទទម្ងន់៦០គីឡូក្រាម។
យ៉ត ផាយ៉ាក នេះ គេក៏ជាជើងខ្លាំងមួយរូបនៅស្រុកថៃដែរ ហើយ គេម ក៏ធ្លាប់មកប្រកួតនៅស្រុកខ្មែរជាច្រើនលើកដែរកន្លងមក។ យ៉ត ផាយ៉ាក មានប្រវត្តិប្រកួតត៧២លើក ឈ្នះ៥៧លើក ចាញ់១៣លើក និងស្មើ០២លើក។ យ៉ាងណា ប៉ះជាមួយ ចាន់ ស៊ីណាត អ្នកប្រដាល់ថៃរូបនេះ ក៏មិនជាស្រួលខ្លួនប៉ុន្មានដែរ។
ចាន់ ស៊ីណាត គេមានផ្លែល្អ ពិសេសគឺផ្លែកណ្តាប់ដៃ និងកែង ប៉ុន្តែអ្វីដែលគេបារម្ភជំនួស ស៊ីណាត នោះ គឺខ្លាចតែចាញ់កម្លាំងស៊ុហ្វ យ៉ត ផាយ៉ាក មួយមុខប៉ុណ្ណោះ។ ចាន់ ស៊ីណាត ប្រកួតប៉ុន្មានចុងក្រោយនេះ រាងស្រុតធ្លាក់កម្លាំងកាយសម្បទា ដែលមើលទៅគឺមានលក្ខណៈទន់ជ្រាយមែនទែន។
គេមិនហ៊ានអះអាងមុនថា ស៊ីណាត ឈ្នះ យ៉ត ផាយ៉ាក ក្នុងការប្រកួតនេះទេ។ ចាំមើល តើស៊ីណាត ឈ្នះឬមួយក៏ យ៉ត ផាយ៉ាក ឈ្នះសម្រាប់ការជួបគ្នាលើកដំបូងនេះ?។
ចំណែក ការប្រកួតរវាងអ្នកប្រដាល់រួមជាតិវិញ កូយ ឡាយ អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងជួបប្រកួតជាមួយអ្នកប្រដាល់អ៊ូច ធារិទ្ធ ក្លិបអាណាចក្រគុនខ្មែរ។ ពីរនាក់នេះ ជួបគ្នាក្នុងប្រភេទទម្ងន់៦០គីឡូក្រាម។ យ៉ាងណា រវាងពួកគេពីរនាក់នេះ ពុំមាននរណាហ៊ានទស្សន៍ទាយមុនថា អ្នកណាឈ្នះ អ្នកណាចាញ់នោះឡើយ។ ចាំមើល តើ កូយ ឡាយ អាចយកឈ្នះអ៊ូច ធារិទ្ធ បានឬអត់?។
សុខ វីរ៉ា អ្នកប្រដាល់ក្លិបសំរោងកោងខេត្តបាត់ដំបង ត្រូវគេផ្គូឲ្យជួបប្រកួតជាមួយ ឡុក ប៊ុនសំណាង អ្នកប្រដាល់សមាគមកីឡាក្រសួងការពារជាតិ ដោយប្រកួតក្នុងប្រភេទទម្ងន់៥១គីឡូក្រាម៕
Source: Kampuchea Thmey Daily
0 Comments