កំពង់ឆ្នាំង ៖ ចោរប្លន់វ័យក្មេងម្នាក់ ត្រូវបានសមត្ថកិច្ចនគរបាលស្រុកកំពង់លែង ស្រាវជ្រាវដេញតាមចាប់ខ្លួនបាន ក្រោយពីធ្វើសកម្មភាពប្លន់បានលុយជាង៧លានរៀល នៅក្នុងកន្លែងវេរលុយមួយកន្លែង។
ករណីប្លន់លុយនេះ បានកើតឡើងនៅវេលាម៉ោង៨និង៤០នាទីយប់ ថ្ងៃទី០៦ ខែមករា ឆ្នាំ២០១៩ ស្ថិតនៅក្នុងភូមិកំពង់បឹង ឃុំកំពង់ហៅ ស្រុកកំពង់លែង ខេត្តកំពង់ឆ្នាំង។
សមត្ថកិច្ចនគរបាលស្រុកកំពង់លែងបានឲ្យដឹងថា ជនសង្ស័យនោះមាន ឈ្មោះ ផាន់ សុខភ័ស្ត (ហៅជា) ភេទប្រុស អាយុ២០ឆ្នាំ ស្រុកកំណើតនៅភូមិទំនប់ ឃុំត្រងិល ស្រុកកំពង់លែង ខេត្តកំពង់ឆ្នាំង បច្ចុប្បន្នរស់នៅ ភូមិខ្សាម សង្កាត់ខ្សាម ក្រុងកំពង់ឆ្នាំង។
សមត្ថកិច្ចនគរបាលស្រុកកំពង់លែងបានឲ្យដឹងថា មុនពេលកើតហេតុ ជនល្មើសបានដកកាំបិតភ្ជង់ស្ត្រីជាម្ចាស់ផ្ទះវេរលុយឲ្យនៅស្ងៀម ហើយទាញថតតុស្រវាបានលុយប្រមាណ៧លានរៀល ដាក់ចូលថង់ខ្មៅមួយ ហើយជិះម៉ូតូសេ១០០កូរ៉េ បើករត់ទៅទិសខាងទៅកើត តាមបណ្ដោយផ្លូវខេត្ត លេខ៥០C ឆ្ពោះទៅដីខេត្តកំពង់ធំ។
ប៉ុន្តែក្រោយពេលកើតហេតុ មានបងប្អូនប្រជាពលរដ្ឋឃើញស្រែកចោរៗ និងប្រដេញម៉ូតូតាមពីក្រោយរហូត និងធ្វើឲ្យជនល្មើសភិតភ័យផ្ដួលម៉ូតូ បោះកាំបិតចោល រួចរត់ចូលទៅពួនសម្ងំនៅក្រោមផ្ទះប្រជាពលរដ្ឋនៅក្នុងភូមិទំនប់ ឃុំត្រងិល ស្រុកកំពង់លែង។
ដោយមានការចូលរួមសហការពីអាជ្ញាធរស្រុក សមត្ថកិច្ចនគរបាលស្រុក យោធាស្រុក កងរាជអាវុធហត្ថស្រុក និងប្រជាការពារផងនោះ បានធ្វើការឡោមព័ទ្ធកន្លែងលាក់ខ្លួនរបស់ជនល្មើស រហូតដល់ម៉ោងប្រមាណ២២និង០០យប់ថ្ងៃ ទើបចាប់ខ្លួនជនល្មើសបាន។
សមត្ថកិច្ចបានបញ្ជាក់ឲ្យដឹងថា នៅពេលចាប់ខ្លួនជនល្មើសបាន សមត្ថកិច្ចដកហូតបានដាវមួយ ទូរស័ព្ទដៃមួយ ម៉ូតូសង់កូរ៉េ១គ្រឿង និងយកលុយបានមកវិញចំនួន៦លាន៣០ម៉ឺនរៀល។
ចំណែកជនល្មើស និងវត្ថុតាង ត្រូវបានសមត្ថកិច្ចនគរបាលស្រុកកំពង់លែងកំពុងកសាងសំណុំរឿង ដោយបញ្ជូនខ្លួនទៅស្នងការដ្ឋាននគរបាលខេត្តកំពង់ឆ្នាំង នៅល្ងាចថ្ងៃទី០៧មករានេះ ដើម្បីចាត់ការបន្តតាមនីតិវិធីបញ្ជូនទៅតុលាការផ្ដន្ទាទោសតាមច្បាប់៕
Source: Kampuchea Thmey Daily
0 Comments