រតនគិរី ៖ នៅវេលាម៉ោង៩និង១០នាទីព្រឹក ថ្ងៃច័ន្ទ ២កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី៧ ខែមករា ឆ្នាំ២០១៩ កម្លាំងអធិការក្រុងបានលុង សហការជាមួយកម្លាំងប៉ុស្តិ៍ឡាបានសៀក ចុះបង្ក្រាបករណីប្រើប្រាស់អាវុធខុសច្បាប់(អាវុធកែច្នៃ)២កន្លែងផ្សេងគ្នា។
មន្ត្រីនគរបាលបានឲ្យដឹងថា ឃាត់ខ្លួនជនសង្ស័យម្នាក់ ឈ្មោះ ហូ វ៉ាន់ទី ភេទប្រុស អាយុ៣៤ឆ្នាំ ជនជាតិវៀតណាម រស់នៅភូមិជ័យជំនះ សង្កាត់ឡាបានសៀក ក្រុងបានលុង។ ក្នុងនោះសមត្ថកិច្ចបានដកហូតវត្ថុតាងអាវុធកែច្នៃចំនួន១ដើម និងរណាអាទឹកកក១ដើមផងដែរ។
មន្ត្រីនគរបាលបានបន្តទៀតថា នៅក្នុងថ្ងៃតែមួយវេលាម៉ោង១១ព្រឹក កម្លាំងជំនាញខេត្តសហការជាមួយកម្លាំងអធិការក្រុងបានលុង និងកម្លាំងប៉ុស្តិ៍ឡាបានសៀក បានធ្វើការចុះបង្ក្រាបល្បែងស៊ីសង (ជល់មាន់) នៅចំណុចចម្ការស្វាយចន្ទី ស្ថិតក្នុងភូមិថ្មី សង្កាត់ឡាបានសៀក ក្រុងបានលុង។
ក្រោយការចុះបង្ក្រាប សមត្ថកិច្ចបានដកហូតសម្ភារៈរួមមានម៉ូតូចំនួន៧គ្រឿង រថយន្ត១គ្រឿង ទ្រុងក្រុងមាន់ចំនួន១ ជញ្ជីងថ្លឹងចំនួន១ និងសម្ភារៈសម្រាប់ជល់មាន់មួយចំនួនទៀត។
បច្ចុប្បន្ន សម្ភារៈ ត្រូវបានសមត្ថកិច្ចដកហូតយកមករក្សាទុកនៅអធិការដ្ឋាននគរបាលក្រុងបានលុងដើម្បីចាត់ការបន្តទៅតាមនីតិវិធីច្បាប់៕
Source: Kampuchea Thmey Daily
0 Comments