ស្វាយរៀង ៖ លោក តូច ប៉ូលីវ៉ា អភិបាលរងខេត្តស្វាយរៀងបានថ្លែងថា ការអភិវឌ្ឍ វិស័យអប់រំ យុវជន និងកីឡា គឺជាមូលដ្ឋានគ្រឹះដ៏សំខាន់បំផុតក្នុងការកសាងប្រភពធនធានមនុស្សដើម្បីអភិវឌ្ឍប្រទេសជាតិ។
អភិបាលរងខេត្តស្វាយរៀងថ្លែងបែបនេះនៅក្នុងកិច្ចប្រជុំសន្និបាតបូកសរុបលទ្ធផលការងារ អប់រំ យុវជន និងកីឡា ឆ្នាំសិក្សា២០១៧.២០១៨ និងលើកទិសដៅសកម្មភាពការងារឆ្នាំ២០១៨ និង២០១៩ នាព្រឹកថ្ងៃទី២១ ខែមករា ឆ្នាំ២០១៩ នៅសាលប្រជុំមន្ទីរអប់រំ យុវជន និងកីឡាខេត្ត ដែលមានការចូលរួមពី លោក ខៀវ សំអុល ប្រធានអប់រំ យុវជន និងកីឡាខេត្ត លោកគ្រូ អ្នកគ្រូ ជានាយកសាលា ប្រធានការិយាល័យអប់រំ ស្រុក ក្រុងទាំង៨ នៃខេត្តស្វាយរៀង និងអស់លោក លោកស្រីជាប្រធានមន្ទីរជុំវិញខេត្តជាច្រើនរូបផងដែរ។
លោក តូច ប៉ូលីវ៉ា បានថ្លែងនូវការកោតសរសើរដល់មន្ទីរអប់រំ យុវជននិងកីឡា ខេត្ត ដែលបានខិតខំបំពេញការងារតាមតួនាទីរៀងៗខ្លួន ប្រកបដោយលទ្ធផលល្អជាទីពេញចិត្ត ស្របតាមទិសដៅរបស់ក្រសួងអប់រំ យុវជន និងកីឡាដែលបានដាក់ចេញ។
អភិបាលរងខេត្តស្វាយរៀង ក៏បានសំណូមពរអង្គសន្និបាតទាំងមូល និងមន្ត្រីគ្រប់គ្រងអប់រំទាំងអស់ត្រូវយកចិត្តទុកដាក់ដល់បញ្ហាសំខាន់ៗមួយចំនួន ក្នុងនោះ ត្រូវយកចិត្តទុកដាក់ប្រមូលកុមារដល់វ័យសិក្សាឲ្យចូលរៀនបានច្រើនជាអតិបរមាទាំងនៅទីប្រជុំជន និងនៅទីជនបទ ចាប់ពីមត្តេយ្យសិក្សាឡើងទៅ និងរក្សាបាននៅស្ថិរភាពសិស្សឲ្យបន្តការសិក្សារៀនសូត្ររហូតចប់មធ្យមសិក្សា និងបន្តចូលរៀនរហូតបញ្ចប់ឧត្តមសិក្សា។
លោកបានបន្តថា ត្រូវបន្តកែលំអបរិស្ថានសាលារៀនឲ្យក្លាយជាទីមនោរម្យ ដើម្បីទាក់ទាញកុមារឲ្យចាប់អារម្មណ៍ និងមានចិត្តចង់ទៅសាលារៀន។
មួយវិញទៀត ទន្ទឹមនឹងការយកចិត្តទុកដាក់ទាំងបរិមាណ ក៏ត្រូវយកចិត្តទុកដាក់ពង្រឹងបន្ថែមទៀត នូវគុណភាពប្រកបដោយគណៈនេយ្យភាព។
លោក តូច ប៉ូលីវ៉ា បានបញ្ជាក់ថា ការពង្រឹងគុណភាពអប់រំវាមានហេតុផលពាក់ព័ន្ធទៅនឹងកត្តាជាច្រើនដូចជាកត្តាគ្រូ សិស្ស កត្តាគ្រប់គ្រងដឹកនាំ គឺជាកត្តាសំខាន់ដូចពាក្យស្លោកមួយពោលថា គ្រូល្អ សិស្សល្អ គ្រូពូកែ សិស្សពូកែ នាយកល្អ សាលាល្អ។ ហើយក្រៅពីនេះ ក៏នៅមានកត្តាមួយចំនួនទៀត ដែលជះឥទ្ធិពលលើគុណភាពអប់រំមានកត្តាគ្រួសារ និងកត្តាសង្គម ដែលកត្តាទាំងអស់នេះជាកត្តាដែលមិនអាចខ្វះកត្តាមួយណាបានឡើយ ពីព្រោះតាមគោលដៅអប់រំប្រកបដោយចីរភាពរបស់យើង គឺកសាងពលរដ្ឋសកលប្រកបដោយសមត្ថភាពទាំងចំណេះដឹង ចំណេះធ្វើ មានសីលធម៌ មានសុជីវធម៌ និងចេះ រួមរស់ជាមួយគ្នាប្រកបដោយភាពសុខដុមរមនា។
សូមបញ្ជាក់ថា នៅក្នុងពិធីបើកអង្គសន្និបាតនេះ ក៏បានចែកទង់កិត្តិយស និងបំពាក់មេដាយជូនដល់លោកប្រធានមន្ទីរអប់រំ និងអស់លោក លោកស្រីជាអនុប្រធានមន្ទីរ នាយកសាលាផងដែរ៕
Source: Kampuchea Thmey Daily
0 Comments