ភ្នំពេញ ៖ នៅឆ្នាំ២០១៩នេះ ក្រសួងការងារ និងបណ្ដុះបណ្ដាលវិជ្ជាជីវៈ នឹងធ្វើកំណែទម្រង់លើវិស័យបណ្ដុះបណ្ដាលជំនាញបច្ចេកទេសវិជ្ជាជីវៈនៅទូទាំងប្រទេស ដើម្បីឆ្លើយតបទៅនឹងការរីកចម្រើនបច្ចេកវិទ្យានាពេលបច្ចុប្បន្ន។
លោកបណ្ឌិត ពេជ សោភ័ន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍ថា ចាប់ពីឆ្នាំ២០១៩នេះតទៅ ក្រសួងនឹងធ្វើទំនើបកម្មទៅលើកម្មវិធីសិក្សា ពង្រឹងគុណភាពគ្រូ និងថ្នាក់ដឹកនាំ នៅតាមអង្គភាពបណ្ដុះបណ្ដាលនានា ដើម្បីស្របទៅតាមការវិវត្តន៍ នៃបដិវត្តឧស្សាហកម្មជំនាន់ទី៤ ដែលផ្តោតសំខាន់ទៅលើការប្រើបច្ចេកវិទ្យាអ៊ីនធឺណិត។
លោកបណ្ឌិតបានបន្តថា «គោលដៅឬយុទ្ធសាស្ត្ររបស់ក្រសួង គឺផ្អែកទៅលើគោលនយោបាយរបស់រាជរដ្ឋាភិបាលអាណត្តិទី៦នេះ គឺការកែទម្រង់ស៊ីជម្រៅ ដូច្នេះដើម្បីអាចអភិវឌ្ឍន៍គុណភាពនេះបានលុះត្រាយើងតម្រូវឲ្យពិនិត្យឡើងវិញនូវរចនាសម្ព័ន្ធ យន្តការក៏ដូចជាសមត្ថភាពដើម្បីធ្វើកំណែទម្រង់មួយនៅតាមអង្គភាព ហើយកំណែទម្រង់នេះ ទាំងគុណភាព កម្មវិធីសិក្សា គុណភាពគ្រូ និងអ្នកដឹកនាំជាកញ្ចប់មួយដែលយើងនឹងអនុវត្តនៅឆ្នាំថ្មីនេះ ហើយសង្ឃឹមថាតាមរយៈនេះនឹងធ្វើឲ្យគុណភាពកើនឡើង»។
លោកបណ្ឌិត បានបន្ថែមទៀតថា ការធ្វើកំណែទម្រង់វិស័យអប់រំបណ្ដុះបណ្ដាលវិជ្ជាជីវៈបច្ចេកទេសនេះ គឺផ្តោតសំខាន់ទៅលើកត្តាហេដ្ឋារចនាសម្ព័ន្ធ យន្តការ និងបុគ្គល នៃអង្គភាពបណ្ដុះបណ្ដាលនីមួយៗដើម្បីបង្កើនប្រសិទ្ធភាព និងផលិតភាពការងារនៅក្នុងវិស័យនេះឲ្យកាន់តែប្រសើរឡើងថែមទៀត។
ជាមួយគ្នានេះដែរ លោកបណ្ឌិតបានជំរុញឲ្យគ្រឹះស្ថានបណ្ដុះបណ្ដាលរដ្ឋ និងឯកជនទាំងអស់ ត្រូវធ្វើទំនើបកម្មទាំងកម្មវិធីសិក្សា និងសម្ភារៈដើម្បីបណ្ដុះបណ្ដាលដល់សិស្ស និស្សិត ឲ្យកាន់តែមានសមត្ថភាពខ្ពស់ថែមទៀត សំដៅចូលរួមប្រែក្លាយកម្ពុជាពីប្រទេសមានប្រាក់ចំណូលមធ្យមកម្រិតទាប ទៅមធ្យមកម្រិតខ្ពស់ នាឆ្នាំ២០៣០ខាងមុខនេះ។
លោក ណុប នរិន្ទ ប្រធានសមាគមគ្រឹះស្ថានឧត្ដមសិក្សាបច្ចេកទេស និងបណ្ដុះបណ្ដាលវិជ្ជាជីវៈឯកជនបានថ្លែង កាលពីព្រឹកថ្ងៃទី៧ ខែមករា ឆ្នាំ២០១៩ ដោយបង្ហាញនូវការគាំទ្រយ៉ាងខ្លាំងចំពោះក្រសួងដែលធ្វើកំណែទម្រង់លើវិស័យបណ្ដុះបណ្ដាលនេះ ព្រោះនឹងជួយឲ្យយុវជនកម្ពុជាទទួលបាននូវចំណេះជំនាញបានច្បាស់លាស់ ងាយស្រួលក្នុងការស្វែងរកការងារធ្វើ និងប្រកបមុខរបរអាជីវកម្មដោយខ្លួនឯង។
លោកបានសន្យាថា នឹងធ្វើការណែនាំដល់គ្រូស្ថានបណ្ដុះបណ្ដាលឯកជន ត្រូវធ្វើទំនើបកម្មទាំងកម្មវិធីសិក្សា និងសម្ភារៈដើម្បីចូលរួមអភិវឌ្ឍន៍វិស័យបណ្ដុះបណ្ដាលបច្ចេកទេសវិជ្ជាជីវៈនេះកាន់តែរីកចម្រើនថែមទៀត។
ចំណែក លោក ឈឹម ម៉ូលី នាយកវិទ្យាស្ថានបច្ចេកទេសជួសជុលរថយន្តបានថ្លែងកាលពីថ្ងៃទី៧មករាឲ្យដឹងដែរថា វិទ្យាស្ថានរបស់លោក បានធ្វើកំណែទម្រង់រួចហើយ ដើម្បីបណ្ដុះបណ្ដាលធនធានមនុស្សស្របទៅតាមបច្ចេកវិទ្យាសម័យថ្មីនេះដូចជា បង្ហាត់បង្រៀនដល់សិស្សឲ្យអនុវត្តផ្ទាល់ទៅលើការជួសជុលរថយន្តស៊េរីថ្មីឆ្នាំ២០១៧ និង២០១៨តែម្ដង ដើម្បីឲ្យសិស្សដើរឲ្យទាន់បច្ចេកវិទ្យាទំនើបនាពេលបច្ចុប្បន្ន។
លោក ឈឹម ម៉ូលី បានបន្តទៀតថា ក្រៅពីនេះ វិទ្យាស្ថាន ក៏បានចូលរួមបណ្ដុះបណ្ដាលដល់គ្រូផ្នែកជួសជុលរថយន្តមកពីអង្គភាពសាលារដ្ឋនានាដើម្បីយកទៅបង្រៀនបន្តដល់សិស្សផងដែរ។
គួរបញ្ជាក់ថា បច្ចុប្បន្ននេះ ក្រសួងការងារ និងបណ្ដុះបណ្ដាលវិជ្ជាជីវៈមាន វិទ្យាស្ថាន និងសាលាបណ្ដុះបណ្ដាលវិជ្ជាជីវៈបច្ចេកទេស ដែលស្ថិតក្រោមឱវាទក្រសួងសរុបចំនួន៣៩កន្លែងនៅទូទាំងប្រទេស៕
Source: Kampuchea Thmey Daily
0 Comments