អតីតប្រធានតុលាការកំពូលកូរ៉េខាងត្បូងម្នាក់ត្រូវបានចាប់ខ្លួននៅថ្ងៃព្រហស្បតិ៍លើការចោទប្រកាន់ពីបទរំលោភបំពានអំណាចសម្រាប់ការជ្រៀតជ្រែកក្នុងការកាត់ក្តីដើម្បីជួយដល់លោកស្រីប្រធានាធិបតី Park Geun-hye ដែលឥឡូវនេះត្រូវបានបណ្តេញចេញពីតំណែង។
លោក Yang Sung-tae គឺជាប្រធានចៅក្រមនៅតុលាការកំពូលរយៈពេល៦ឆ្នាំរហូតដល់គាត់ចូលនិវត្តន៍នៅក្នុងឆ្នាំ២០១៧។
អ្នកនយោបាយនៅកូរ៉េខាងត្បូងមានបញ្ហាផ្លូវច្បាប់ជាយូរមកហើយដោយអតីតប្រធានាធិបតីដែលនៅមានជីវិតទាំងអស់របស់ប្រទេសនេះកំពុងជាប់ពន្ធនាគារឬជាប់ពន្ធនាគាររួចហើយ។
ប៉ុន្តែលោក Yang គឺជាអតីតចៅក្រមកំពូលដំបូងគេដែលត្រូវបានចាប់ខ្លួនក្នុងករណីមួយដែលបានលើកឡើងជាសំណួរអំពីការបែងចែកអំណាចនិងឯករាជ្យភាពនៃប្រព័ន្ធតុលាការនៅក្នុងប្រទេសនេះ។
បុរសវ័យ៧១ឆ្នាំរូបនេះកំពុងស្វែងរកការបង្កើតសាលាឧទ្ធរណ៍មួយដាច់ដោយឡែកពីគ្នាហើយត្រូវបានគេចោទប្រកាន់ពីបទព្យាយាមជ្រៀតជ្រែកក្នុងករណីដើម្បីឲ្យលោកស្រីប្រធានាធិបតី Park Geun-hye ឈ្នះការគាំទ្រផ្នែកនយោបាយ។
គាត់ត្រូវបានគេចោទប្រកាន់ថាមានចេតនាព្យាយាមពន្យាពេលពាក្យបណ្តឹងអំពីប្រាស់សំណងដែលត្រូវបានលើកឡើងដោយអតីតជនរងគ្រោះដោយពលកម្មទាំងបង្ខំសម័យសង្គ្រាមប្រឆាំងនឹងក្រុមហ៊ុនជប៉ុនចំពេលលោកស្រី Park ព្យាយាមធ្វើឲ្យប្រសើរឡើងនូវទំនាក់ទំនងជាមួយទីក្រុងតូក្យូ។
យោងតាមសេចក្តីរាយការណ៍បានឲ្យដឹងថា ការចោទប្រកាន់របស់រដ្ឋអាជ្ញាមានប្រហែល២៦០ទំព័រហើយមានចំនួនប្រហែល៤០ករណីរួមទាំងការរំលោភបំពានអំណាចនិងការលេចធ្លាយអាថ៌កំបាំងរដ្ឋផងដែរ។
គាត់ត្រូវបានគេនិយាយថា បានបញ្ជាឲ្យបង្កើតបញ្ជីឈ្មោះចៅក្រមដែលប្រឆាំងនឹងគំនិតផ្តួចផ្តើមរបស់គាត់ក្នុងគោលបំណងធ្វើឲ្យខូចដល់អាជីពរបស់ពួកគេ។
ទោះបីជាយ៉ាងណាក៏ដោយ អតីតប្រធានតុលាការកំពូលរូបនេះបានបដិសេធការចោទប្រកាន់ទាំងអស់ហើយបានស្នើសុំឲ្យសាធារណជន “មានជំនឿលើចៅក្រម”។
សារព័ត៌មាន Yonhap បានរាយការណ៍ថា លោក Yang ត្រូវបានគេនាំទៅឃុំខ្លួនភ្លាមៗនៅឯមណ្ឌលឃុំឃាំងក្រុងសេអ៊ូល។
លោកមិនបានធ្វើអត្ថាធិប្បាយណាមួយចំពោះអ្នកយកព័ត៌មានទេនៅពេលលោកមកដល់តុលាការកាលពីថ្ងៃពុធ៕ AFP
Source: Kampuchea Thmey Daily
0 Comments