ភ្នំពេញ ៖ ក្មេងប្រុសជំទង់ពីរនាក់ បានជិះម៉ូតូឌុបគ្នាយ៉ាងលឿនមិនប្រយ័ត្ន ក៏ជ្រុលទៅបុករថយន្តដឹកដីចំពីមុខទាំងកំរោល បណ្តាលឲ្យស្លាប់ម្នាក់ភ្លាមៗនៅនឹងកន្លែងកើតហេតុ ហើយម្នាក់ទៀតរងរបួសធ្ងន់ ចំណែកតៃកុងឡានដឹកដីឃើញសភាពបែបនេះ បានចុះពីលើឡានគេចខ្លួនបាត់ កាលពីវេលា ម៉ោង៦និង៥០នាទីព្រលប់ ថ្ងៃ ទី៩ ខែមករា ឆ្នាំ២០១៩ស្ថិតនៅតាមផ្លូវបេតុង ក្នុងភូមិបឹងធំទី៣ សង្កាត់បឹងធំ ខណ្ឌពោធិ៍សែនជ័យ។
ម៉ូតូ រងគ្រោះម៉ាកស៊ុយហ្សុយគី និច ពណ៌ស ពាក់ស្លាកលេខ ភ្នំពេញ 1CU-5073 ជិះគ្នា២នាក់ ក្នុងទិសដៅពីលិចទៅកើត។ ចំណែក រថយន្ត ម៉ាកនីសាន់ ពណ៌ខៀវ ពាក់ស្លាកលេខ ចង្កូតស្តាំ PP-0368បើកបរក្នុងទិសដៅពីកើតទៅលិច។
ជនរងគ្រោះ ដែលស្លាប់មានឈ្មោះ ទិត្យ ប៊ុនលី ភេទប្រុស អាយុ១៥ឆ្នាំជាសិស្ស មានទីលំនៅភូមិបឹងធំទី១ សង្កាត់បឹងធំ ខណ្ឌពោធិ៍សែនជ័យ ស្លាប់ភ្លាមៗនៅកន្លែង និងអ្នកបើកបរ ឈ្មោះ សុខ ម៉េងសឺ ភេទប្រុស អាយុ១៦ឆ្នាំជាសិស្ស មានទីលំនៅ ភូមិបឹងធំទី១ សង្កាត់ បឹងធំ ខណ្ឌពោធិ៍សែនជ័យ រងរបួសធ្ងន់។
តាមប្រភពពីប្រជាពលរដ្ឋបានឲ្យដឹងថា នៅមុនពេលកើតហេតុ គេឃើញជនរងគ្រោះ ជិះម៉ូតូឌុបគ្នាក្នុង ល្បឿនយ៉ាងលឿន តាមបណ្តោយផ្លូវបេតុង ពីលិចទៅកើត នៅពេលមកដល់ចំណុចកើតហេតុបានជ្រុល ទៅបុកជាមួយរថយន្ត ចំពីមុខ បញ្ច្រាសទិសគ្នា បណ្ដាលឲ្យ អ្នកបើកបរម៉ូតូ បុកផ្ទប់កញ្ចក់រថយន្ត រងរបួសធ្ងន់ ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ រីឯអ្នករួមដំណើរ ជិះខាងក្រោយខ្ទាតផ្លោងទៅបុកផ្ទប់លូដាក់នៅចិញ្ចើមផ្លូវ បណ្តាលឲ្យ បាក់កស្លាប់ ភ្លាមៗនៅកន្លែង ដោយបែកទាំងលូផង។ ម៉ូតូរងការខូចខាតផ្នែកខាងមុខស្ទើរតែទាំងស្រុង។ ចំណែកឯរថយន្តរងការខូចខាតផ្នែកខាងមុខចំហៀងខាងស្តាំកំពិតកាង និងបែកចង្កៀងភ្លើងបំភ្លឺផ្លូវអស់មួយចំហៀង។ ក្រោយពីបុកហើយ តៃកុងរថយន្ត បានបើកទ្វារចុះរត់បាត់ស្រមោល បន្សល់ទុកតែរថយន្តនៅកន្លែងកើតហេតុ។
ក្រោយមកក៏មានសមត្ថកិច្ចមូលដ្ឋានចុះមកដល់ ហើយក៏ទំនាក់ទំនងទៅសមត្ថកិច្ចជំនាញចរាចរណ៍មកវាស់វែងយក ម៉ូតូនិងរថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញរង់ចាំម្ចាស់រថយន្តចូលខ្លួនមកដោះស្រាយតាមផ្លូវច្បាប់។ ចំណែកសាកសពត្រូវបាន សមត្ថកិច្ចធ្វើកំណត់ហេតុ រួចប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments