សមាជិកសភាអង់គ្លេសនឹងបោះឆ្នោតនៅថ្ងៃអង្គារទៅលើថា តើត្រូវព្យាយាមគ្រប់គ្រងដំណើរការ Brexit ដែរឬអត់។ នេះជាការបោះឆ្នោតជាបន្តបន្ទាប់ដែលគំរាមកំហែងដាក់គំនាបកាន់តែច្រើនទៅលើលោកស្រីនាយករដ្ឋមន្ត្រី Theresa May។
ខណៈដែលកាលកំណត់ Brexit នៅសល់រយៈពេលត្រឹមតែ៦០ថ្ងៃទៀតប៉ុណ្ណោះនោះ សមាជិកសភានឹងបោះឆ្នោតលើ “ផែនការ B” របស់លោកស្រី May ដែលលោកស្រីបានបង្ហាញសភាកាលពីសប្តាហ៍មុនបន្ទាប់ពីកិច្ចព្រមព្រៀងដំបូងរបស់លោកស្រីត្រូវបានបដិសេធនៅថ្ងៃទី១៥ខែមករា។
ពួកគេក៏នឹងបោះឆ្នោតលើការធ្វើវិសោធនកម្មដែលនឹងបង្ហាញថាតើតំណាងរាស្ត្រមានចំនួនដើម្បីជំរុញការគ្រប់គ្រងសភាដោយស្របច្បាប់ទៅក្នុងដំណើរការនេះដែរឬអត់ផងដែរ។
វិសោធនកម្មមួយនឹងបើកទ្វារសម្រាប់សភាតំណាងរាស្ត្រដើម្បីនាំយកច្បាប់ដែលរារាំងអង់គ្លេសចាកចេញពីសហភាពអឺរ៉ុបបើគ្មានកិច្ចព្រមព្រៀងជាផ្លូវការមួយនៅថ្ងៃទី២៩ខែមីនា។
វានឹងបង្ខំឲ្យលោកស្រី May ពន្យារពេល Brexit ក្នុងរយៈពេលប្រាំបួនខែប្រសិនបើកិច្ចព្រមព្រៀងរបស់លោកស្រីមិនត្រូវបានអនុម័តមុនថ្ងៃទី២៦ខែកុម្ភៈហើយផ្តល់ឲ្យសមាជិកសភានូវសមត្ថភាពក្នុងការពន្យារពេលកំណត់ជាបន្តទៀតដោយគ្មានកាលបរិច្ឆេទកំណត់ច្បាស់លាស់។
ការកើនឡើងចំនួននៃរដ្ឋមន្ត្រីរដ្ឋាភិបាលគឺជាសារព្រមានថា ពួកគេនឹងមិនទទួលយកលទ្ធភាពនៃការចាកចេញរបស់អង់គ្លេសដោយគ្មានកិច្ចព្រមព្រៀងដែលនឹងកាត់ផ្តាច់ទំនាក់ទំនងទាំងអស់ភ្លាមៗជាមួយដៃគូពាណិជ្ជកម្មធំបំផុតរបស់ខ្លួនទេ។
លោកស្រី May កំពុងព្យាយាមស្រោចស្រង់កិច្ចព្រមព្រៀងរបស់លោកស្រីហើយសង្ឃឹមថានឹងឈ្នះលើសមាជិកសភាក្នុងការបោះឆ្នោតនាពេលអនាគតបើទោះបីជាបាត់បង់សំឡេងចុងក្រោយ២៣០សំឡេងក៏ដោយ។
រដ្ឋាភិបាលបាននិយាយថា “ការបោះឆ្នោតប្រកបដោយអត្ថន័យជាលើកទីពីរ” នេះក៏នឹងត្រូវកែសម្រួលផងដែរដែលប្រហែលជាអាចបញ្ចុះបញ្ចូលសមាជិកសភាមួយចំនួនមិនឲ្យចាត់វិធានការខ្លាំងក្លានៅថ្ងៃអង្គារ។
អ្នកជំនាញសភាក៏បានព្រមានផងដែរថា កិច្ចខិតខំប្រឹងប្រែងរបស់សមាជិកសភាអាចមិនស្របតាមរដ្ឋធម្មនុញ្ញ៕ AFP
Source: Kampuchea Thmey Daily
0 Comments