រដ្ឋមន្ត្រីការបរទេស អំពាវនាវឲ្យ NGO បរទេសទាំងអស់ ធ្វើប្រតិបត្តិការហិរញ្ញវត្ថុ តាមប្រព័ន្ធធនាគារស្របច្បាប់ និងជៀសវាងសកម្មភាពណា ដែលជាប់ពាក់ព័ន្ធហិរញ្ញប្បទានភេរវកម្ម

ភ្នំពេញ ៖ ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បានទទូចឲ្យអង្គការមិនមែនរដ្ឋាភិបាលបរទេសទាំងអស់ ធ្វើប្រតិបត្តិការហិរញ្ញវត្ថុតាមប្រព័ន្ធធនាគារស្របច្បាប់ និងជៀសវាងសកម្មភាពណា ដែលជាប់ពាក់ព័ន្ធហិរញ្ញប្បទានភេរវកម្ម និងហិរញ្ញប្បទានអាវុធមហាប្រល័យ ដែលបានកំណត់ឡើងដោយក្រុមប្រទេសអាស៊ី ប៉ាស៊ីហ្វិក ស្តីពីការសម្អាតប្រាក់ ជៀសឲ្យផុតពីការធ្លាក់ចូលទៅក្នុងបញ្ជីប្រផេះរបស់ស្ថាប័ននេះ និងកុំឲ្យមានជាបច្ច័យអវិជ្ជមានដល់កម្ពុជា លើផ្នែកប្រព័ន្ធហិរញ្ញវត្ថុ លំហូរវិនិយោគ និងនយោបាយជាដើម។

រដ្ឋមន្ត្រីក្រសួងការបរទេសកម្ពុជា អំពាវនាវបែបនេះ នៅក្នុងពិធីបើកកិច្ចប្រជុំពិគ្រោះយោបល់ជាមួយអង្គការមិនមែនរដ្ឋាភិបាលបរទេស កាលពីព្រឹកថ្ងៃទី២៩ ខែមករា ឆ្នាំ២០១៩។

លោកលើកឡើងថា ការជួបប្រជុំគ្នាលើកដំបូង ជាផ្លូវការ ជាមួយ NGO បរទេសនាពេលនេះ បានធ្វើឡើងក្រោយពីច្បាប់ ស្តីពីសមាគម និងអង្គការមិនមែនរដ្ឋាភិបាល (Law on Associations and Non-Governmental Organizations-LANGO) ត្រូវបានប្រកាសដាក់ឲ្យអនុវត្ត កាលពីថ្ងៃទី១២ ខែសីហា ឆ្នាំ២០១៥។

ជាមួយគ្នានោះ លោករំពឹងថា កិច្ចប្រជុំពិគ្រោះយោបល់នាថ្ងៃនេះ នឹងរួមចំណែកលើកកម្ពស់ និងពង្រឹងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស (Foreign NGOs) ឲ្យបានកាន់តែល្អប្រសើរថែមទៀត ដើម្បីបម្រើ និងការពារនូវឧត្តមប្រយោជន៍ជាតិ និងប្រជាជនកម្ពុជាយ៉ាងពិតប្រាកដ ហើយវេទិកានេះ ក៏នឹងផ្តល់ឱកាសឲ្យរួមគ្នាកំណត់នូវបញ្ហាប្រឈមនានា និងស្វែងរកដំណោះស្រាយសមស្រប ដើម្បីពង្រឹងការអនុវត្ត ច្បាប់ និងបទបញ្ញត្តិជាធរមាន ឲ្យកាន់តែមានប្រសិទ្ធភាពសក្ដិសមជានីតិរដ្ឋ។

ឆ្លៀតក្នុងឱកាសនេះ ក្នុងនាមរាជរដ្ឋាភិបាល និងក្រសួងការបរទេស ឯកឧត្ដមឧបនាយករដ្ឋមន្ត្រី ប្រាក់ សុខុន បានថ្លែងអំណរគុណចំពោះគ្រប់បណ្តាអង្គការមិនមែនរដ្ឋាភិបាលបរទេសទាំងអស់ដែល មានសមានចិត្ត និងសុឆន្ទៈស្មោះសរ ក្នុងការជួយឧបត្ថម្ភគាំទ្រដល់ដំណើរការកសាងជាតិ និងអភិវឌ្ឍន៍ ប្រទេសកម្ពុជា ក្នុងគ្រប់កាលៈទេសៈ ដោយឥតលក្ខខណ្ឌ ចាប់តាំងពីគ្រាក្រលំបាក រហូតដល់កម្ពុជា សម្រេចបាននូវសន្តិភាពពេញលេញ, ឯករាជ្យភាព, ការឯកភាពជាតិ, ដំណើរការលទ្ធិប្រជាធិបតេយ្យ និងវឌ្ឍនភាពជាទូទៅលើគ្រប់វិស័យ។

តាមឯកឧត្ដមឧបនាយករដ្ឋមន្ត្រី ប្រាក់ សុខុន “សមិទ្ធផលដែលរាជរដ្ឋាភិបាលសម្រេចបានកន្លងមក ពិតជាមានការចូលរួមចំណែកមិនអាចខ្វះបានពីគ្រប់ភាគីពាក់ព័ន្ធ ក្នុងនោះមានវិស័យឯកជន ដៃគូអភិវឌ្ឍន៍ និងអង្គការសង្គមស៊ីវិល។ អង្គការសង្គមស៊ីវិល ទាំងក្នុងស្រុក និងបរទេសបានដើរតួនាទីយ៉ាងសំខាន់ក្នុងការរួមចំណែកផ្តល់សេវា និងគាំទ្រដល់វិស័យសំខាន់ៗ ដែលពាក់ព័ន្ធនឹងសេដ្ឋកិច្ច សង្គមកិច្ចនៅតាមមូលដ្ឋានជនបទ និងសហគមន៍ដាច់ស្រយាល នៅក្នុងប្រទេសកម្ពុជា។

រាជរដ្ឋាភិបាល ប្ដេជ្ញាបន្តសហការយ៉ាងជិតស្និទ្ធ និងបើកទ្វារចំហរង់ចាំស្វាគមន៍នូវកិច្ចសហប្រតិបត្តិការ ជាមួយអង្គការមិនមែនរដ្ឋាភិបាលបរទេសទាំងអស់ ដែលប្រតិបត្តិដោយសុឆន្ទៈ និងឈរលើឧត្តមគតិ នៃការគិតគូរដល់ប្រយោជន៍ប្រជាជនជាធំ។

ទាក់ទងដល់ច្បាប់ ស្តីពីសមាគម និងអង្គការមិនមែនរដ្ឋាភិបាល ឯកឧត្ដមឧបនាយករដ្ឋមន្ត្រី ប្រាក់ សុខុន លើកឡើងថា ច្បាប់នេះ រៀបចំឡើងក្នុងគោលបំណងការពារសិទ្ធិសេរីភាពក្នុងការបង្កើតសមាគម និងអង្គការមិនមែនរដ្ឋាភិបាលនៅកម្ពុជា ដើម្បីការពារសិទ្ធិ និងផលប្រយោជន៍ស្របច្បាប់របស់ប្រជាពលរដ្ឋ និងផលប្រយោជន៍សាធារណៈ ព្រមទាំងលើកកម្ពស់កិច្ចសហប្រតិបត្តិការក្នុងភាពជាដៃគូរវាងសមាគម និងអង្គការមិនមែនរដ្ឋាភិបាល ជាមួយអាជ្ញាធរសាធារណៈ ដើម្បីអភិវឌ្ឍន៍សង្គមកម្ពុជាឲ្យមានការរីកចម្រើនលើគ្រប់វិស័យ ដូចមានចែងនៅក្នុងមាត្រា១ និងមាត្រា២ នៃច្បាប់នេះ។

លោកបន្តថា រាជរដ្ឋាភិបាលកម្ពុជា តែងប្រកាន់ខ្ជាប់នូវគោលការណ៍ នៃការអភិវឌ្ឍប្រកប ដោយបរិយាប័ន្ន ហើយតែងឲ្យតម្លៃជានិច្ចដល់ការចូលរួមពីគ្រប់ភាគីពាក់ព័ន្ធ ដែលជាផ្នែកមួយដំណើរការលទ្ធិប្រជាធិបតេយ្យ។ ក្នុងនាមជារដ្ឋអធិបតេយ្យ និងជាអង្គ ដែលទទួលបានអាណត្តិស្របច្បាប់ តែមួយគត់ពីប្រជាពលរដ្ឋម្ចាស់ឆ្នោត ក្នុងការដឹកនាំ, រាជរដ្ឋាភិបាលមានបំណងប្រាថ្នាតែមួយគត់ គឺរួមគ្នាធ្វើយ៉ាងណាឲ្យការចូលរួមទាំងនោះប្រព្រឹត្តទៅដោយការគោរពគ្នាទៅវិញទៅមកនូវអាណត្តិកិច្ច និងស្ថិតត្រឹមដែនកំណត់ នៃសិទ្ធិ ក្នុងកិច្ចប្រតិបត្តិការរៀងៗខ្លួន។

ឯកឧត្ដមឧបនាយករដ្ឋមន្ត្រីបញ្ជាក់ទៀតថា “ច្បាប់ស្ដីពីសមាគម និងអង្គការមិនមែនរដ្ឋាភិបាល បានកំណត់យ៉ាងច្បាស់អំពីសមត្ថកិច្ចរបស់ក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ក្នុងការចុះបញ្ជី សមាគម និងអង្គការមិនមែនរដ្ឋាភិបាល។ សមាគម និងអង្គការមិនមែនរដ្ឋាភិបាល ក្នុងស្រុក (Local Associations/NGOs) ត្រូវចុះបញ្ជីនៅក្រសួងមហាផ្ទៃ ហើយសមាគម និងអង្គការមិនមែនរដ្ឋាភិបាលបរទេស (Foreign Associations/NGOs) ត្រូវចុះបញ្ជីនៅក្រសួងការបរទេស និងសហប្រតិបត្តិការអន្តរជាតិ ក្រោមទម្រង់អនុស្សរណៈ នៃការយោគយល់គ្នា (MoU)។

MoU រវាងក្រសួងការបរទេស ជាមួយអង្គការមិនមែនរដ្ឋាភិបាលបរទេស មានសុពលភាព ៣ (បី)ឆ្នាំ និងអាចបន្តសុពលភាពបាន។ ក្រោយច្បាប់នេះ ចូលជាធរមាន ក្រសួង បានធ្វើការកែតម្រូវខ្លឹមសារនៃ MoU គំរូចាស់ ឲ្យស្របតាមខ្លឹមសារ នៃច្បាប់ និងបានអនុវត្ត MoU គំរូថ្មី ចាប់ពីខែមករា ឆ្នាំ២០១៦ ព្រមទាំងបានទទួលចុះ MoU ជាមួយអង្គការមិនមែនរដ្ឋាភិបាលបរទេសថ្មីចំនួន៦៥ បន្ថែមទៀត។

គិតត្រឹមខែធ្នូ ឆ្នាំ២០១៨ មានអង្គការមិនមែនរដ្ឋាភិបាលបរទេសចំនួន៣៨៦ នៅមានសុពលភាព ហើយអង្គការមិនមែនរដ្ឋាភិបាលបរទេសទាំងនោះ មកពីប្រទេសផ្សេងៗនៃទ្វីបអាស៊ី អាមេរិក អឺរ៉ុប និងអូស្ត្រាលី ដែលមានគម្រោងសំខាន់ៗផ្តោតលើវិស័យមួយចំនួនដូចជា អប់រំ សុខាភិបាល សង្គមកិច្ច កសិកម្ម បណ្ដុះបណ្ដាល វិជ្ជាជីវៈ អភិវឌ្ឍន៍សហគមន៍ បរិស្ថាន និងបោសសម្អាតមីន។

ថ្លែងក្នុងឱកាសនោះដែរ ឯកឧត្ដមឧបនាយករដ្ឋមន្ត្រី ប្រាក់ សុខុន បានអំពាវនាវដល់ក្រសួង-ស្ថាប័នពាក់ព័ន្ធ ដែលជាដៃគូរបស់អង្គការមិនមែនរដ្ឋាភិបាល បរទេស ត្រូវបន្តសហការ សម្របសម្រួល និងបង្កលក្ខណៈងាយស្រួលដល់អង្គការ ដែលនៅមាន សុពលភាព MoU ជាមួយក្រសួងការបរទេស ក្នុងកិច្ចប្រតិបត្តិការសកម្មភាពរបស់ពួកគាត់។

ទន្ទឹមនេះ សូមអង្គការមិនមែនរដ្ឋាភិបាលបរទេសទាំងអស់ អនុវត្តសកម្មភាពរបស់ខ្លួនឲ្យស្របតាមក្របខ័ណ្ឌច្បាប់ និងលិខិតបទដ្ឋានគតិយុត្តិនានាជាធរមាន។ លើសពីនេះទៀត សូមជៀសវាងជាដាច់ខាតនូវ សកម្មភាពទាំងឡាយណា ដែលអាចជាប់ពាក់ព័ន្ធ ឬគាំទ្រដល់ការលាងសម្អាតប្រាក់ ហិរញ្ញប្បទាន ភេរវកម្ម និងហិរញ្ញប្បទានអាវុធមហាប្រល័យ ដែលបានកំណត់ឡើង ដោយក្រុមប្រទេសអាស៊ី ប៉ាស៊ីហ្វិក ស្តីពីការសម្អាតប្រាក់ ដើម្បីជៀសផុតពីការធ្លាក់ចូលទៅក្នុងបញ្ជីប្រផេះរបស់ស្ថាប័ននេះ និងកុំឲ្យមានជាបច្ច័យអវិជ្ជមានដល់កម្ពុជាយើងលើផ្នែកប្រព័ន្ធហិរញ្ញវត្ថុ លំហូរវិនិយោគ និងនយោបាយជាដើម។ ទន្ទឹមនឹងនេះ សូមអង្គការមិនមែនរដ្ឋាភិបាលបរទេសទាំងអស់ ធ្វើប្រតិបត្តិការហិរញ្ញវត្ថុរបស់ខ្លួនតាមប្រព័ន្ធធនាគារដែលស្របច្បាប់ និងមានអាជ្ញាប័ណ្ណផ្លូវការចេញដោយធនាគារជាតិ នៃកម្ពុជា៕