អគ្គរដ្ឋអាជ្ញាស្តីទីលោក Matthew Whitaker បាននិយាយកាលពីថ្ងៃចន្ទថា ការស៊ើបអង្កេតរបស់រដ្ឋអាជ្ញាពិសេសលោក Robert Mueller ចូលទៅក្នុងការឃុបឃិតរវាងយុទ្ធនាការរបស់លោក Donald Trump និងរុស្ស៊ីក្នុងការបោះឆ្នោតប្រធានាធិបតីឆ្នាំ២០១៦គឺជិតបញ្ចប់ហើយ។
ទោះបីជាយ៉ាងណាក៏ដោយ ការិយាល័យរបស់លោក Mueller បានស្ងៀមស្ងាត់អំពីវឌ្ឍនភាពនៃការស៊ើបអង្កេតនេះហើយការកត់សម្គាល់របស់លោក Whitaker គឺជាការបង្ហាញជាផ្លូវការលើកដំបូងដែលថា ការស៊ើបអង្កេតនេះអាចនឹងដល់ទីបញ្ចប់។
លោក Whitaker បាននិយាយថា “ខ្ញុំបានទទួលការពន្យល់ពេញលេញពីការស៊ើបអង្កេតនេះហើយខ្ញុំទន្ទឹងរង់ចាំលោក Mueller ក្នុងការផ្ញើរបាយការណ៍ចុងក្រោយ”។
លោក Mueller អាចដាក់ជូនរបាយការណ៍របស់គាត់ដល់លោក Whitaker បានលុះត្រាតែគាត់ត្រូវបានជំនួសតំណែងជាអគ្គរដ្ឋអាជ្ញាដោយលោក Bill Barr ដែលត្រូវបានតែងតាំងឲ្យកាន់តំណែងនេះដោយលោកប្រធានាធិបតី Trump ប៉ុន្តែមិនទាន់ត្រូវបានបញ្ជាក់ដោយព្រឹទ្ធសភានៅឡើយទេ។
លោក Mueller ដែលជាអតីតប្រធាន FBI ត្រូវបានតែងតាំងដោយអគ្គរដ្ឋអាជ្ញា Rod Rosenstein នៅក្នុងខែឧសភាឆ្នាំ២០១៧ដើម្បីពិនិត្យមើលការជ្រៀតជ្រែករបស់រុស្ស៊ីក្នុងការបោះឆ្នោតឆ្នាំ២០១៦។
លោក Mueller ត្រូវបានតែងតាំងជារដ្ឋអាជ្ញាពិសេសបន្ទាប់ពីលោក Trump បានបណ្តេញប្រធាន FBI លោក James Comey យ៉ាងឆាប់រហ័សក្នុងខែដដែលនោះ។
ក្រុមរបស់គាត់បានចោទប្រកាន់មនុស្សសរុបចំនួន៣៤នាក់ប៉ុន្តែរហូតមកដល់ពេលនេះមិនមានការចោទប្រកាន់ពីការឃុបឃិតគ្នារវាងយុទ្ធនាការរបស់លោក Trump និងក្រុងមូស្គូទេ។
លោក Trump បានបដិសេធការចោទប្រកាន់នេះជាច្រើនដងថា វាជា “ការរៀបចំខាងនយោបាយ” និងបានបដិសេធយ៉ាងដាច់អហង្ការថា មិនមានការឃុបឃិតគ្នារវាងយុទ្ធនាការរបស់គាត់ជាមួយក្រុងមូស្គូទេ។
ជាញឹកញាប់លោកបានប្រើប្រាស់បណ្តាញសង្គម Twitter ដើម្បីថ្កោលទោសសមាជិកនៃក្រុមរបស់លោក Mueller ថាជា “ក្រុមនៃអ្នកប្រជាធិបតេយ្យដែលមានការខឹងសម្បា”៕ AFP
Source: Kampuchea Thmey Daily
0 Comments