ភ្នំពេញ ៖ ចៅក្រមសាលាដំបូងរាជធានីភ្នំពេញ កាលពីព្រឹកថ្ងៃទី២៩ ខែមករា ឆ្នាំ២០១៩នេះ បានប្រកាសសាលក្រមសម្រេចផ្ដន្ទាទោសបុរស/ស្ត្រី៣នាក់ ដាក់ពន្ធនាគារ២ឆ្នាំ និង៦ខែ តែអនុវត្តទណ្ឌកម្មទោសក្នុងពន្ធនាគារ១ឆ្នាំ ក្រោមការចោទប្រកាន់ ពីបទហិង្សាដោយចេតនា មានស្ថានទម្ងន់ទោស តាមមាត្រា២១៨ នៃក្រមព្រហ្មទណ្ឌ។
ជនជាប់ចោទទី១-ឈ្មោះ មាន ឆយី ហៅ ស៊ិន ចរិយា ហៅ កាទ្រីត ភេទស្រី អាយុ២៤ឆ្នាំ មុខរបរ ម៉ាស្សា ពីបទ ហិង្សាដោយចេតនា មានស្ថានទម្ងន់ទោស យោងតាមមាត្រា ២១៧ និងមាត្រា ២១៨នៃក្រមព្រហ្មទណ្ឌ។ ជនជាប់ចោទទី២-ឈ្មោះ ណុប ចំណាប់ ហៅ ស្វិត ភេទប្រុស អាយុ៣៤ឆ្នាំ មុខរបរ រត់ម៉ូតូឌុប (ប្តី) និងទី៣-ឈ្មោះ សោម ធី ភេទស្រី អាយុ២៤ឆ្នាំ មុខរបរ មេផ្ទះ ពីបទ លក់ដូរមនុស្សដោយមានគោលដៅ យោងតាមមាត្រា ១៥ នៃច្បាប់ ស្តីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
សវនាការរឿងក្ដីនេះ បានធ្វើឡើងកាលពីថ្ងៃទី២១ ខែមករា ឆ្នាំ២០១៩ ដោយចៅក្រម ឈ្មោះ សេង លាង។
សូមជម្រាបជូនថា កាលពីថ្ងៃទី២៨ ខែមីនា ឆ្នាំ២០១៨ ជនរងគ្រោះ ឈ្មោះ ប៊ី សុខគង់ ហៅ នៅ ភេទប្រុស អាយុ៣៩ឆ្នាំ មុខរបរ ថៅកែផ្ទះជួល (ទើបលក់ដីបានលុយច្រើន) បានពឹងឲ្យជនជាប់ចោទឈ្មោះ ណុប ចំណាប់ និង ឈ្មោះ សោម ធី ជួយរកស្រីដេកជាមួយ ដោយសន្យាថា នឹងឲ្យលុយ២៥០ដុល្លារទិញ ម៉ូតូ១ជិះ ឲ្យរកស្រីស្អាតបាន ចំណែកសេវាស្រីស្អាត ទុកលោកថៅកែជាអ្នកចាត់ចែងផ្ទាល់។
បន្ទាប់មក ឈ្មោះ សោម ធី ក៏ទាក់ទងហៅជនជាប់ចោទ ឈ្មោះ មាន ឆយី ហៅ ស៊ិន ចរិយា ហៅ កាទ្រីត ឲ្យទៅដេកជាមួយ លោកថៅកែ ឈ្មោះ ប៊ី សុខគង់ តាមសំណូមពរ។
នៅក្នុងសវនាការ ឈ្មោះ មាន ឆយី ហៅ ស៊ិន ចរិយា ហៅ កាទ្រីត បដិសេធថា ខ្លួនមិនបានទៅលក់ខ្លួនទេ គឺគ្រាន់តែទៅផឹកស៊ី ជាមួយលោកថៅកែ នៅក្នុងបន្ទប់ដេកតែប៉ុណ្ណោះ ហើយក៏អត់បានលុយដែរ ដោយនៅយប់កើតហេតុ ថ្ងៃទី២៩ ខែមីនា ឆ្នាំ២០១៨ លោកថៅកែ បានឲ្យលុយទៅ ឈ្មោះ សោម ធី និងប្តីឈ្មោះ ស្វិត ទៅទិញ គ្រឿងសមុទ្រ និងស្រាបៀផឹកស៊ីនៅក្នុងបន្ទប់ នៅភូមិព្រៃទា សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
លោកថៅកែ ក៏បានទិញគ្រឿងញៀន មកជក់ ជុំគ្នាថែមទៀតផង លុះយប់ជ្រៅបន្តិច ឈ្មោះ សោម ធី និង ឈ្មោះ ស្វិត បានចេញពីបន្ទប់ ទុកឱកាសឲ្យលោកថៅកែ បង្កាត់ភ្លើងស្នេហ៍ជាមួយនាង ឆយី ។ ប៉ុន្តែ ដោយសារតែនាងមិនព្រមរួមភេទជាមួយលោកថៅកែ ធ្វើឲ្យលោកថៅកែ ខឹងក៏កើតជារឿងហិង្សាតែម្តងទៅ ដោយនាងចាក់លោកថៅកែ បាន៣កាំបិត ចំណែកលោកថៅកែ បានចាប់នាងបោកក្បាលនឹងឥដ្ឋការ៉ូ បែកឈាមពេញខ្លួន។
ចំណែកជនជាប់ចោទ ឈ្មោះ សោម ធី និងឈ្មោះ ណុប ចំណាប់ ហៅស្វិត បានសារភាពថា ថៅកែ ប៊ី សុខគង់ ហៅ នៅ ជាម្ចាស់ផ្ទះជួលរបស់ពួកគេ ហើយលោកថៅកែ ចង់បានស្រីដេក ទើបពួកគេ ហៅ ឈ្មោះ ឆយី ឲ្យដេកជាមួយ ព្រោះ នាង ឆយី ធ្លាប់រកស៊ីដេកជាមួយភ្ញៀវ កាលពីនៅធ្វើការក្នុងហាងម៉ាស្សា យីហោ ១៦៨ ក្នុងភូមិព្រៃទា ជាមួយឈ្មោះ សោម ធី។
បន្ទាប់ពីទាក់ទង ឈ្មោះ ឆយី ឲ្យលោកថៅកែ ពួកគេ បានលុយចាយ១០០ដុល្លារ និងម៉ូតូ វីវ៉ា មួយគ្រឿង តម្លៃ២៥០ដុល្លារ ចំណែក ឈ្មោះ ឆយី បានលុយ១០០ដុល្លារ និងទូរស័ព្ទ iPhone 5 មួយគ្រឿង។
គួររំលឹកថា កម្លាំងកងរាជអាវុធហត្ថរាជធានីភ្នំពេញ បានឃាត់ខ្លួន ក្រុមជនជាប់ចោទ ទាំង៣នាក់ខាងលើ ភ្លាមៗ ក្រោយពី ឈ្មោះ ឆយី បើកឆាកប្រយុទ្ធគ្នា ជាមួយលោក ថៅកែ នៅ រងរបួស ទាំងសងខាង ហើយត្រូវលោកថៅកែ នៅ ហៅអ្នកជិតខាងឲ្យជួយ។
នៅក្នុងឆាកប្រយុទ្ធនោះ លោកថៅកែ ប៊ី សុខគង់ ហៅ នៅ ត្រូវ ឈ្មោះ ឆយី ចាក់ត្រូវ៣កាំបិត រងរបួសធ្ងន់៕
Source: Kampuchea Thmey Daily
0 Comments