ភ្នំពេញ ៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងដឹកនាំគណៈប្រតិភូអញ្ជើញទៅចូលរួមកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប ដែលនឹងប្រព្រឹត្តទៅនៅទីក្រុងព្រុចស៊ែល ប្រទេសបែលហ្ស៊ិក នៅថ្ងៃទី២១ ខែមករា ឆ្នាំ២០១៩ខាងមុខ នេះបើតាមសេចក្តីប្រកាសព័ត៌មានចុះថ្ងៃទី ១៧ ខែមករា ឆ្នាំ២០១៩ ។
សេចក្តីប្រកាសព័ត៌មានរបស់នាយកដ្ឋានព័ត៌មាននៃក្រសួងការបរទេសបានអះអះអាងថា ការដឹកនាំគណៈប្រតិភូទៅចូលរួមកិច្ចប្រជុំខាងលើនេះ តាមការអញ្ជើញរបស់លោកស្រី ហ្វេដឺរីកា ម៉ូហ្គេរីនី តំណាងជាន់ខ្ពស់នៃសហភាពអឺរ៉ុប ទទួលបន្ទុកកិច្ចការបរទេស និងគោលនយោបាយសន្តិសុខ និងជាអនុប្រធាននៃគណៈកម្មាការអឺរ៉ុប។ នៅក្នុងអំឡុងពេលនៃកិច្ចប្រជុំ រដ្ឋមន្ត្រីការបរទេសអាស៊ាន និងសមភាគីអឺរ៉ុបនោះ នឹងមានពិភាក្សាគ្នាអំពីវិស័យនៃកិច្ចសហប្រតិបត្តិការមួយចំនួន ដែលមានផលប្រយោជន៍រួម ដើម្បីសម្រេចនូវគោលបំណងរួមមួយ នៃសមាហរណកម្មតំបន់ប្រកបដោយសន្តិភាព ស្ថិរភាព និងវិបុលភាព។
ក្នុងអំឡុងពេលស្នាក់នៅទីក្រុងព្រុចសែល លោកឧបនាយករដ្ឋមន្ត្រី ប្រាក់ សុខុន មានគម្រោងនឹងជួបទ្វេភាគី ជាមួយលោក ឌីឌ្យ៉េរ រ៉េនឌ័រ ឧបនាយករដ្ឋមន្ត្រី និងជារដ្ឋមន្ត្រីការបរទេស និងកិច្ចការអឺរ៉ុប របស់បែលហ្ស៊ិក លោកជំទាវ សេស៊ីលីយ៉ា ម៉ាលស្ត្រុម ស្នងការពាណិជ្ជកម្មសហភាពអឺរ៉ុប និងជាមួយប្រធានគណៈប្រតិភូផ្សេងៗទៀត។
សូមបញ្ជាក់ថា សហភាពអឺរ៉ុបបានក្លាយជាដៃគូសន្ទនាអាស៊ាន នៅឆ្នាំ១៩៧៧ ហើយចាប់តាំងពីពេលនោះមក ទំនាក់ទំនងរវាងតំបន់ទាំងពីរ បានឈានដល់កំរិតខ្ពស់មួយ ដោយគ្របដណ្តប់លើវិស័យកិច្ចសហប្រតិបត្តិការជាច្រើន រួមមាននយោបាយ សេដ្ឋកិច្ច និងពាណិជ្ជកម្ម សង្គម និងការតភ្ជាប់ជាដើម។ ឈរលើភាពជាដៃគូជាច្រើនទសវត្សរ៍មកនេះ កិច្ចព្រមព្រៀងជាច្រើនត្រូវបានចុះហត្ថលេខា ដែលជាមូលដ្ឋានដ៏រឹងមាំសម្រាប់ទិសដៅ នាពេលអនាគតនៃតំបន់ទាំងពីរ។
លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា ធ្លាប់បានប្រាប់អ្នកសារព័ត៌មានកាលពីថ្ងៃទី០៨ ខែមករា ឆ្នាំ២០១៩កន្លងមកថ្មីៗនេះថា លោកឧបនាយករដ្ឋមន្ត្រី ប្រាក់ សុខុន នឹងអញ្ជើញទៅចូលរួមប្រជុំរដ្ឋមន្ត្រីការបរទេសអាស៊ាន ជាមួយសហភាពអឺរ៉ុប ហើយនៅឯកិច្ចប្រជុំនោះ នឹងមានជំនួបជាមួយឧត្តមស្នងការពាណិជ្ជកម្មរបស់ EU និយាយពីរឿងប្រព័ន្ធអនុគ្រោះពន្ធ (EBA) នេះ។
លោក កេត សោផាន់ បញ្ជាក់ថា “ខ្ញុំសូមបញ្ជាក់ជំហរមួយ គឺនៅតែបន្តកិច្ចសហប្រតិបត្តិការជាមួយសហភាពអឺរ៉ុប លើបញ្ហាប្រព័ន្ធអនុគ្រោះពន្ធ (EBA) នេះ ប៉ុន្តែទោះជាយ៉ាងណាក៏ដោយ ជំហររបស់រាជរដ្ឋាភិបាលច្បាស់ហើយថា មិនប្ដូរជំនួយជាមួយអធិបតេយ្យជាតិនោះទេ ដូចអ្នកសារព័ត៌មាន ក៏ដូចជាប្រជាពលរដ្ឋ និងអន្តរជាតិបានដឹងរួចហើយថា ជំហររាជរដ្ឋាភិបាលច្បាស់លាស់ណាស់លើបញ្ហានេះ យើងមានសុទិដ្ឋិនិយមក្នុងការនិយាយចរចាជាមួយគ្នា យើងមិនមែន មិននិយាយរកគ្នានោះទេ គឺយើងនៅតែបន្តកិច្ចសន្ទនាជាមួយគ្នា”។
ទាក់ទងបញ្ហានេះ លោក George Edgar ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជាធ្លាប់បានបញ្ជាក់កាលពីថ្មីៗនេះថា បញ្ហាប្រព័ន្ធអនុគ្រោះពន្ធ (EBA) នេះ រាជរដ្ឋាភិបាលកម្ពុជា និងសហភាពអឺរ៉ុប កំពុងធ្វើការប្រជុំគ្នា និងទំនាក់ទំនងគ្នាជាប្រចាំផងដែរ។ លោកបញ្ជាក់ថា “អីចឹងខ្ញុំមិនចង់ព្យាករណ៍ថា តើអ្វីទៅជាលទ្ធផលនៃការប្រាស្រ័យទាក់ទងគ្នារវាងរាជរដ្ឋាភិបាល និងសហភាពអឺរ៉ុបនោះទេ...ដំណើរការនេះ ជាដំណើរការមួយដ៏ស្មុគស្មាញ ដើម្បីធ្វើការពន្យល់ឲ្យបានក្បោះក្បាយនោះ ហើយបច្ចុប្បន្ននៅទីក្រុងព្រុចសែល ខាងគណៈកម្មការកំពុងតែដំណើរការ ក្នុងការដកយកមកវិញជាផ្លូវ នូវប្រព័ន្ធអនុគ្រោះពន្ធ (EBA)” ។
តាមលោក George Edgar ដំណើរការក្នុងចរចាគ្នាអំពីការដកប្រព័ន្ធអនុគ្រោះពន្ធនេះ ជាដំណើរការដ៏ស្មុគស្មាញមួយ ហើយដំណើរការជាលក្ខណៈផ្លូវការនេះ វាត្រូវការពេលវេលាច្រើន ជាពិសេសក្នុងរយៈ៦ខែដំបូងនេះ វាត្រូវការពិភាក្សាគ្នា ចរចាគ្នារវាងសហភាពអឺរ៉ុប និងរាជរដ្ឋាភិបាលកម្ពុជា ហើយបន្ទាប់មកទៀត បញ្ហាដទៃទៀត នឹងអាចដោះស្រាយបាន បន្ទាប់ពីកិច្ចពិភាក្សារយៈពេល៦ខែទៅលើបញ្ហា ដែលមាននេះ។ លោកឯកអគ្គរដ្ឋទូតសហភាពអឺរ៉ុបបញ្ជាក់ថា ក្រោយពីដំណើរការមួយឆ្នាំ ទាក់ទងទៅនិងប្រព័ន្ធអនុគ្រោះពន្ធ EBA នេះ ទើបមានការសម្រេចចិត្តថា នឹងត្រូវព្យួរទៅលើប្រព័ន្ធអនុគ្រោះពន្ធនេះ ឬក៏អត់ គឺត្រូវការរយៈពេលមួយឆ្នាំ។ ដូច្នេះបច្ចុប្បន្ននេះ យើងកំពុងស្ថិតនៅក្នុងដំណាក់កាលកំពុងរៀបចំនៅឡើយ ហើយដំណាក់កាលជាផ្លូវការនោះ មិនទាន់ចាប់ផ្តើមនៅឡើយទេ។
គណៈកម្មការអឺរ៉ុប កាលពីថ្មីៗនេះ បានប្រកាសអំពីដំណើរការដកប្រព័ន្ធអនុគ្រោះពន្ធ EBA ចេញពីប្រទេសកម្ពុជា និងប្រទេសមីយ៉ាន់ម៉ា ក្នុងករណីដែលមិនមានការកែសម្រួលអ្វីមួយតាមការចង់បានរបស់ខ្លួន ប៉ុន្តែគម្រោងនេះ ត្រូវបានសភាពាណិជ្ជកម្មអន្តរជាតិសំខាន់ៗ៥ស្ថាប័នរបស់អឺរ៉ុប ដែលជាតំណាងឲ្យប្រទេសធំៗចំនួន៩ប្រទេសនៅអឺរ៉ុប បានសរសេរលិខិតពិសេសមួយច្បាប់ផ្ញើជូនលោកស្រី Cecilia Malmstrom ស្នងការទទួលបន្ទុកពាណិជ្ជកម្ម គណៈកម្មការអឺរ៉ុប ដោយប្រឆាំងចំពោះការកំណត់ដកប្រព័ន្ធអនុគ្រោះពន្ធ (EBAs) ចេញពីប្រទេសកម្ពុជានេះ ហើយតំណាងក្រុមប្រឹក្សាធុរកិច្ចអាស៊ាន សហភាពអឺរ៉ុប ប្រចាំអាស៊ីអាគ្នេយ៍ បានថ្លែងថា ប្រសិនបើមានការដកពន្ធអនុគ្រោះ EBA ពីកម្ពុជាមែននោះ ក្រុមហ៊ុនអឺរ៉ុបប្រមាណ៤០០ក្រុមហ៊ុន នឹងចាត់ទុកថា គណៈកម្មការអឺរ៉ុប អនុវត្ត EBA នេះ ជាឧបករណ៍នយោបាយបរទេសរបស់ខ្លួនសម្រាប់កម្ពុជា៕
Source: Kampuchea Thmey Daily
0 Comments