ភ្នំពេញ ៖ ទីតាំងអាជីវកម្មខារ៉ាអូខេ PRO KTV ដែលស្ថិតតាមបណ្តោយមហាវិថីព្រះមុនីវង្ស ផ្ទះលេខ៧៥៧ និង៧៥៨ ស្ថិតនៅក្រុម២៦ ភូមិ៧ សង្កាត់បឹងត្របែក ខណ្ឌចំការមន រាជធានីភ្នំពេញ ត្រូវបាន អាជ្ញាធរសម្រេចចុះបិទបញ្ឈប់លែងឲ្យធ្វើអាជីវកម្ម កាលពីរសៀលថ្ងៃទី២០ ខែមករា ឆ្នាំ២០១៩ បន្ទាប់ពី សមត្ថកិច្ចជំនាញរកឃើញទីតាំងនោះ ផ្តល់ជាកន្លែងជួញដូរ និងប្រើប្រាស់គ្រឿងញៀន ដោយបានឃាត់ខ្លួន ជនសង្ស័យ៥៨នាក់ ជាមួយនឹងថ្នាំញៀនមួយចំនួន។
អាជ្ញាធរ ក្រុងភ្នំពេញ ដែលបានចុះបិទទីតាំងខាងលើបានឲ្យដឹងថា បន្ទាប់ពីធ្វើការស្រាវជ្រាវរួចមក ទីតាំងខាងលើនេះ មិនត្រូវបានអាជ្ញាធរអនុញ្ញាតឲ្យបើកដំណើរការទៀតទេ ព្រោះសមត្ថកិច្ចធ្លាប់បង្ក្រាបករណីគ្រឿងញៀនម្តងរួចមកហើយ ប៉ុន្តែទីតាំងនេះ នៅតែបន្តបើក ដោយគ្មានច្បាប់ រហូតដល់ យប់ឈានចូលថ្ងៃទី១៩ ខែមករា ឆ្នាំ២០១៩ កម្លាំងនគរបាលមន្ទីរប្រឆាំងគ្រឿងញៀន បានឆ្មក់ចូល បង្ក្រាបទីតាំង អាជីវកម្មខារ៉ាអូខេ PRO KTV ដែលស្ថិតតាមបណ្តោយមហាវិថីព្រះមុនីវង្ស ផ្ទះលេខ៧៥៧ និង៧៥៨ ស្ថិតនៅក្រុម២៦ ភូមិ៧ សង្កាត់បឹងត្របែក ខណ្ឌចំការមន ដោយបានឃាត់ខ្លួន ជនសង្ស័យ៥៨នាក់ ជាមួយនឹងថ្នាំញៀនមួយចំនួន រួមទាំងម្ចាស់ទីតាំង ជាជនជាតិបរទេសទៀតផង។
សូមជម្រាបថា កាលពីម៉ោង១២និង១៥នាទី ឈានចូលថ្ងៃទី១៩ ខែមករា ឆ្នាំ២០១៩ កម្លាំងជំនាញ (ក៨) និង (ក៣) នៃមន្ទីរប្រឆាំងគ្រឿងញៀន បានបើកកិច្ចប្រតិបត្តិការបង្ក្រាបករណីជួញដូរគ្រឿងញៀន និងផ្តល់ទីតាំងឲ្យជួញដូរ និងប្រើប្រាស់គ្រឿងញៀន នៅក្នុងក្លិប PRO KTV ដោយឃាត់ខ្លួនជនសង្ស័យ៥៨នាក់ (ស្រី២៤នាក់) មាន៥ជនជាតិ រួមមាន ជនជាតិចិន២៩នាក់ (ស្រី៥នាក់), ជនជាតិវៀតណាម២៣នាក់ (ស្រី១៥នាក់), ជនជាតិថៃ០២នាក់, ជនជាតិខ្មែរ០៣នាក់ (ស្រី២នាក់) និងជនជាតិកូរ៉េម្នាក់។ ក្រោយធ្វើតេស្តរួចមក សមត្ថកិច្ចរកឃើញថា ជនសង្ស័យ៥២នាក់វិជ្ជមាន (មានជាប់សារធាតុញៀន) និងអវិជ្ជមាន០៦នាក់ (មិនមានប្រើប្រាស់) ហើយបើបែងចែកប្រភេទជនសង្ស័យរួមមាន អនុប្រធានក្រុមហ៊ុនម្នាក់ ជាម្ចាស់ទីតាំង, មេការធំម្នាក់ មេការតូចម្នាក់ ជាអ្នកចាត់ចែង, អ្នកប្រើប្រាស់៥៣នាក់ និងអ្នកកំដរ០២នាក់។
ចំពោះវត្ថុតាងដែលចាប់យកបានរួមមាន អ៊ិចស្តាស៊ីគ្រាប់ទម្ងន់២.០៥ក្រាម, ម្សៅគេតាមីន៦.៥៨ក្រាម និងម្សៅកាហ្វេអ៊ិចស្តាស៊ី ៩៧.០៨ក្រាម។ វត្ថុតាងទាំងនេះ មិនទាន់មានអ្នកទទួលខុសត្រូវទេ ដោយថ្នាំទាំងនេះរាយប៉ាយលើតុ ជ្រុះដី ពួកគេបដិសេធទាំងអស់គ្នា។
បច្ចុប្បន្ន ជនសង្ស័យ ព្រមទាំងវត្ថុតាង បានបញ្ជូនទៅមន្ទីរប្រឆាំងគ្រឿងញៀន ដើម្បីកសាងសំណុំរឿងបញ្ជូនទៅតុលាការតាមនីតិវិធី នៅថ្ងៃទី២១ ខែមករា ឆ្នាំ២០១៩ នេះ។
សូមបញ្ជាក់ ទីតាំងខាងលើ កាលពីថ្ងៃទី១៨ ខែកញ្ញា ឆ្នាំ២០១៨ ត្រូវបានសមត្ថកិច្ចបង្ក្រាបម្តងរួចមកហើយ បានឃាត់ខ្លួនមនុស្ស១៧នាក់ (ស្រី៣) ក្នុងនោះ អ្នកជួញដូរ២នាក់ និងអ្នកប្រើប្រាស់១៥នាក់ (ស្រី៣នាក់) និងបានចាប់យកវត្ថុតាងថ្នាំញៀនប្រភេទខេតាមីន៣០គ្រាប់ និងម៉េតំហ្វេតាមីន ICE ១៨កញ្ចប់តូចទៀតផង៕
Source: Kampuchea Thmey Daily
0 Comments