អតីត​ប្រេសិត​ ៖​ សហរដ្ឋអាមេរិក​គ្មាន​ផែនការ​ទេ​ ខណៈ​ការ​ដកទ័ព​ចេញពី​ប្រទេស​ស៊ី​រី​កំពុង​ចាត់ចែង

មន្ត្រី​ជាន់ខ្ពស់​ម្នាក់​ ដែល​បាន​លាលែង​ពី​តំណែង​ដើម្បី​ជា​ការ​តវ៉ា​ចំពោះ​គោលនយោបាយ​បាន​និយាយ​កាលពី​ថ្ងៃអាទិត្យ​ថា សហរដ្ឋអាមេរិក​មិនមាន​ផែនការ​សម្រាប់​ប្រទេស​ស៊ី​រី​ទេ​ ខណៈដែល​ខ្លួន​ត្រូវ​សម្រេច​តាម​បញ្ជា​របស់​លោក​ប្រធានាធិបតី Donald Trump ក្នុង​ការ​ដក​កងទ័ព​អាមេរិក​ចេញពី​ប្រទេស​នេះ។

​លោក Brett McGurk ដែលជា​បេសកជន​អាមេរិក​ប្រចាំ​ក្រុមចម្រុះ​សកល​ដឹកនាំ​ដោយ​អាមេរិក​ប្រឆាំងនឹង​ក្រុម​រដ្ឋ​ឥស្លាម​បាន​និយាយថា “​មិនមាន​ផែនការ​សម្រាប់​អ្វីដែល​នឹង​កើតឡើង​ទៀត​ទេ​ហើយ​នេះ​កំពុង​បង្កើន​ហានិភ័យ​ដល់​កងកម្លាំង​អាមេរិក​”​។​

លោក​បាន​និយាយ​បែបនេះ​នៅក្នុង​បទសម្ភាសន៍​មួយ​ជាមួយ​កម្មវិធី “Face the Nation” របស់​ទូរទស្សន៍ CBS បន្ទាប់ពី​អ្នក​បំផ្ទុះ​គ្រាប់បែក​អត្តឃាត​ម្នាក់​បានសម្លាប់​ជនជាតិ​អាមេរិក​៤​នាក់​និង​មនុស្ស​១៥​នាក់​ទៀត​នៅ​ទីក្រុង Manbij ភាគ​ខាងជើង​ប្រទេស​ស៊ី​រី​កាលពី​ថ្ងៃ​ពុធ​។ វា​គឺជា​ការវាយប្រហារ​សម្លាប់​កងទ័ព​សហរដ្ឋអាមេរិក​ច្រើន​បំផុត​ចាប់តាំងពី​ពួកគេ​ត្រូវបាន​បញ្ជូនទៅ​ប្រទេស​ស៊ី​រី​ក្នុង​ឆ្នាំ​២០១៤​ដើម្បី​ជួយ​ដល់​កងកម្លាំង​ក្នុង​តំបន់​ប្រឆាំងនឹង​ក្រុម​រដ្ឋ​ឥស្លាម​។​

ការ​បំផ្ទុះ​គ្រាប់បែក​នេះ​បាន​កើតឡើង​បន្ទាប់ពី​ការប្រកាស​របស់លោក Trump កាលពី​ខែ​មុន​ថា លោក​បាន​បញ្ជា​ឲ្យ​ដក​ទាហាន​អាមេរិក​ទាំង​២,០០០​នាក់​ចេញពី​ប្រទេស​ស៊ី​រី​។ ការប្រកាស​នោះបាន​ធ្វើ​ឲ្យ​សម្ព័ន្ធមិត្ត​មាន​ភាព​ភ្ញាក់ផ្អើល​និង​នាំ​ឲ្យ​មានការ​លាលែង​ពី​តំណែង​របស់​រដ្ឋមន្ត្រី​ការពារជាតិ​លោក Jim Mattis ក៏ដូចជា​លោក McGurk ផងដែរ​។​

មន្ត្រីជាន់ខ្ពស់​អាមេរិក​បានផ្តល់​សេចក្តីថ្លែងការណ៍​ផ្ទុយ​ពី​គោលបំណង​របស់​សហរ​ដ្ឋ​អាមេរិក​ប៉ុន្តែ​មន្ទីរ​បញ្ច​កោណ​បាន​និយាយថា ខ្លួន​បានចាប់ផ្តើម​ការដក​ទ័ព​បើទោះបីជា​គេ​នៅតែ​មិន​ច្បាស់លាស់​ថា​តើ​វា​នឹង​ចំណាយ​រយៈពេល​យូរ​យ៉ាងណាក៏ដោយ​។​
​
លោក McGurk បាន​ថ្លែងថា “​លោក​ប្រធានាធិបតី​បានបញ្ជាក់​យ៉ាងច្បាស់​ថា យើង​នឹង​ចាកចេញ​។ ហើយ​នោះ​មានន័យថា កងកម្លាំង​របស់​យើង​គួរតែមាន​បេសកកម្ម​មួយ​គឺ​ត្រូវ​ចេញ​ដោយ​សុវត្ថិភាព​”​។ ប៉ុន្តែ​លោក​បាន​បន្ថែមថា “​ឥឡូវនេះ​យើង​មិនមាន​ផែនការ​ទេ​។ វា​បង្កើន​ភាព​ងាយ​រងគ្រោះ​ដល់​កងកម្លាំង​របស់​យើង​។ វា​កំពុង​បង្កើន​ហានិភ័យ​ដល់​ប្រជាជន​របស់​យើង​នៅលើ​ដី​ក្នុងប្រទេស​ស៊ី​រី​ហើយនឹង​បើកចំហ​កន្លែង​សម្រាប់​ក្រុម ISIS”​។​
​
លោក McGurk បាន​អះអាងថា អ្វីដែល​សំខាន់បំផុត​នោះ​គឺថា សហរដ្ឋអាមេរិក​មិនអាច​រំពឹងថា ដៃគូ​ដូចជា​ប្រទេស​ទួរគី​ដែលជា​សម្ព័ន្ធមិត្ត​របស់​អង្គការ​ណា​តូ​នឹង​ជំនួស​សហរដ្ឋអាមេរិក​បានទេ​៕ AFP

​

Source: Kampuchea Thmey Daily