ប្រធានាធិបតីអាមេរិកលោក Donald Trump បានវាយប្រហារទៅលើអ្នកប្រជាធិបតេយ្យលោកស្រី Nancy Pelosi កាលពីថ្ងៃអាទិត្យហើយលោកស្រីបានទទូចជាថ្មីម្តងទៀតថា គាត់ត្រូវតែបញ្ចប់ការបិទរដ្ឋាភិបាលមុនពេលកិច្ចចរចាអំពីសន្តិសុខព្រំដែនអាចចាប់ផ្តើមបានប៉ុន្តែទោះបីជាយ៉ាងណាក៏ដោយ គេឃើញមានលទ្ធភាពដែលអាចធ្វើទៅបាន។
លោក Trump បានរិះគន់នៅលើ Twitter មួយថ្ងៃបន្ទាប់ពីលោកស្រី Pelosi ដែលជាប្រធានសភាបានច្រានចោលសំណើរបស់លោក Trump ក្នុងការពង្រីកការការពារបណ្តោះអាសន្នដល់ជនអន្តោប្រវេសន៍ប្រហែលមួយលាននាក់ជាថ្នូរនឹងទឹកប្រាក់ចំនួន៥.៧ពាន់លានដុល្លារសម្រាប់ជញ្ជាំងដែលលោកចង់បាននៅព្រំដែនម៉ិកស៊ិក។
ការបិទរដ្ឋាភិបាលគឺជាបញ្ហានយោបាយដែលបានកើតឡើងនៅក្នុងរដ្ឋបាលផ្សេងៗហើយស្ទើរតែមានតែមួយគត់ចំពោះប្រព័ន្ធអាមេរិក។ ប៉ុន្តែការបិទរដ្ឋាភិបាលមួយនេះគឺជាកំណត់ត្រាវែងបំផុត។ វាបានធ្វើឲ្យបុគ្គលិកសហព័ន្ធប្រហែល៨០០,០០០នាក់មិនមានប្រាក់ឈ្នួល។ ក្នុងចំណោមពួកគេមានដូចជាមន្ដ្រីសន្តិសុខព្រលានយន្តហោះ, ភ្នាក់ងារ FBI, បុគ្គលិកសារមន្ទីរនិងសមាជិកឆ្មាំសមុទ្រ។
លោកប្រធានាធិបតីបានបង្ហោះTwitter ថា លោកស្រី Nancy Pelosi បានប្រព្រឹត្តទង្វើមិនសមហេតុសមផលហើយរហូតមកដល់ពេលនេះលោកស្រីបានក្លាយជាអ្នកប្រជាធិបតេយ្យរ៉ាឌីកាល់ជាផ្លូវការ។
វាគឺជាការវាយប្រហារដោយផ្ទាល់បំផុតរបស់លោក Trump ទៅលើលោកស្រី Pelosi ចាប់តាំងពីការបិទរដ្ឋាភិបាលដោយផ្នែកបានចាប់ផ្តើមហើយនេះបានបង្ហាញឲ្យឃើញនូវអារម្មណ៍ខឹងសម្បា។
ដោយមិនអើពើនឹងមតិរបស់លោក Trump, លោកស្រី Pelosi បានប្រើប្រាស់ Twitter ដូចគ្នាដោយសង្កត់ធ្ងន់លើសេចក្តីត្រូវការដើម្បីបញ្ចប់ការជាប់គាំងនេះដែលបានធ្វើឲ្យមានការឈឺចាប់កាន់តែខ្លាំងឡើងបន្ទាប់ពីរយៈពេលមួយខែ។
លោកស្រីបានបង្ហោះថា “បើករដ្ឋាភិបាលឡើងវិញ អនុញ្ញាតឲ្យកម្មករទទួលបានប្រាក់ខែហើយបន្ទាប់មកយើងអាចពិភាក្សាពីរបៀបដែលយើងអាចរួមគ្នាដើម្បីការពារព្រំដែន”។
ខណៈពេលដែលលោកស្រី Pelosi និងអ្នកប្រជាធិបតេយ្យដទៃទៀតបានច្រានចោលសំណើរបស់លោក Trump នោះ ពួកគេបានទទូចថា វាតំណាងឲ្យចលនាពិតប្រាកដរបស់លោកប្រធានាធិបតី។
លោកអនុប្រធានាធិបតី Mike Pence ដែលដឹកនាំទំនាក់ទំនងរដ្ឋបាលជាមួយសភាបាននិយាយថា ព្រឹទ្ធសភានឹងដាក់សំណើសុំឲ្យមានការបោះឆ្នោតនៅព្រឹកថ្ងៃអង្គារ។ លោកបានហៅវាថាជា “ការសម្រុះសម្រួលដោយស្មោះត្រង់”។
ការបោះឆ្នោតដែលបានគ្រោងទុកនេះក៏ឆ្លុះបញ្ចាំងពីការផ្លាស់ប្តូរដោយមេដឹកនាំគណបក្សសាធារណរដ្ឋនៅព្រឹទ្ធសភាលោក Mitch McConnell ផងដែរ។ លោកធ្លាប់បានទទូចថា លោកនឹងមិនទទួលយកសេចក្តីព្រាងច្បាប់បិទរដ្ឋាភិបាលណាមួយឡើយលុះត្រាតែលោក Trump និងមេដឹកនាំប្រជាធិបតេយ្យគាំទ្រវា៕ AFP
Source: Kampuchea Thmey Daily
0 Comments