ការិយាល័យរបស់រដ្ឋអាជ្ញាពិសេសលោក Robert Mueller បានចាត់វិធានការដ៏កម្រមួយកាលពីថ្ងៃសុក្រដោយជំទាស់ទៅនឹងរបាយការណ៍ព័ត៌មានមួយស្ដីពីការស៊ើបអង្កេតរបស់គាត់លើបញ្ហារុស្ស៊ីដោយនិយាយថា អត្ថបទ BuzzFeed ដែលចោទប្រកាន់ថាលោកប្រធានាធិបតីសហរដ្ឋអាមេរិក President Donald បានបញ្ជាឲ្យអតីតមេធាវីរបស់គាត់កុហកសភាគឺ“មិនត្រឹមត្រូវ”ទេ។
លោក Mueller បានបដិសេធរួចទៅហើយចំពោះរបាយការណ៍នេះដែលបាននិយាយថា លោកប្រធានាធិបតីបានបង្គាប់ឲ្យលោក Michael Cohen និយាយកុហកអំពីគម្រោងអគារខ្ពស់មួយរបស់រុស្ស៊ីដែលពួកគេបានធ្វើការក្នុងអំឡុងការបោះឆ្នោតឆ្នាំ២០១៦។
អ្នកនាំពាក្យលោក Peter Carr បាននិយាយនៅក្នុងសេចក្តីថ្លែងការណ៍មួយថា ការពណ៌នារបស់សារព័ត៌មាន BuzzFeed អំពីសេចក្តីថ្លែងជាក់លាក់ទៅការិយាល័យរដ្ឋអាជ្ញាពិសេសនិងការកំណត់អត្តសញ្ញាណឯកសារនិងសក្ខីកម្មដែលទទួលបានដោយការិយាល័យនេះទាក់ទងនឹងសក្ខីកម្មរបស់លោក Michael Cohen គឺមិនត្រឹមត្រូវទេ។
ការស៊ើបអង្កេតរបស់លោក Mueller ស្តីពីការជ្រៀតជ្រែករបស់រុស្ស៊ីនៅក្នុងការបោះឆ្នោតឆ្នាំ២០១៦និងការឃុបឃិតដែលអាចធ្វើទៅបានរវាងយុទ្ធនាការរបស់លោក Trump និងទីក្រុងមូស្គូគឺជាប្រធានបទនៃអត្ថបទនិងការប៉ាន់ស្មានដ៏ច្រើនលើសលុប។
ប៉ុន្តែវាកម្រណាស់សម្រាប់ការិយាល័យរបស់គាត់ដែលចេញសេចក្តីថ្លែងការណ៍បែបនេះ។
ទោះបីជាយ៉ាងណាក៏ដោយ និពន្ធនាយករបស់សារព័ត៌មាន BuzzFeed បានថ្លែងថា អង្គភាពព័ត៌មាននេះឈរលើការងាររបស់ខ្លួន។
លោក Ben Smith បានសរសេរថា “យើងឈរលើការរាយការណ៍របស់យើងនិងប្រភពដែលបានជូនដំណឹងហើយយើងបានជំរុញឲ្យរដ្ឋអាជ្ញាពិសេសបញ្ជាក់ពីអ្វី ដែលគាត់បានជំទាស់”។
នៅក្នុងសេចក្តីអធិប្បាយមួយដែលបញ្ជូនទៅកាន់អ្នកសារព័ត៌មានសេតវិមានមួយចំនួន មេធាវីរបស់លោក Trump គឺលោក Rudy Giuliani បានហៅការចោទប្រកាន់នៅក្នុងរបាយការណ៍របស់ BuzzFeed ថាជាការមិនពិត ខណៈដែលអ្នកនាំពាក្យសេតវិមានលោក Hogan Gidley បានហៅរបាយការណ៍នេះថាគួរឲ្យអស់សំណើច៕ AFP
Source: Kampuchea Thmey Daily
0 Comments