អ្នក​ជំងឺ​ជាច្រើន​នៅ​កម្ពុជា​ ទទួល​បាន​ការ​ពិនិត្យ​ព្យាបាល​ និង​ថ្នាំពេទ្យ​ដោយ​ឥតគិតថ្លៃ​ ពី​មន្ទីរពេទ្យ​ជោ​រៃ ​និង DHG Phama

ភ្នំពេញ​ ៖​ អ្នក​ជំងឺ​ជាច្រើន ​នៅ​កម្ពុជា ​ទទួល​បាន​ការ​ពិនិត្យ​ព្យាបាល ​និង​ថ្នាំពេទ្យ​ដោយ​ឥតគិតថ្លៃ​ពី​កម្មវិធី​សប្បុរសធម៌​របស់​មន្ទីរពេទ្យ​ជោ​រៃ​ភ្នំពេញ ​ក្រោម​កិច្ចសហការ​ ជាមួយ​នឹង​ក្រុមហ៊ុន​ឱសថ DHG Phama​។​
​
នៅក្នុង​ពិធី​បិទ​វគ្គ នៃ​កម្មវិធី​សប្បុរសធម៌​របស់ មន្ទីរពេទ្យ​ជោ​រៃ ភ្នំពេញ​ ជាមួយ​នឹង​ក្រុមហ៊ុន​ឱសថ DHG Phama ក្នុង​ការ​ពិនិត្យ និង​ព្យាបាល​អ្នកជំងឺ​១,០០០​នាក់ ដោយ​ឥតគិតថ្លៃ កាលពី​ថ្ងៃ​ទី​១៧ ខែ​មករា ឆ្នាំ​២០១៩ វេជ្ជបណ្ឌិត ត្រាន់ ថា​ញ់​ទុង ប្រធាន​ចាត់ការ​ទូទៅ​ នៃ​មន្ទីរពេទ្យ​ជោ​រៃ​ភ្នំពេញ បាន​បញ្ជាក់​ថា នៅ​ឆ្នាំ​២០១៨​នេះ មន្ទីរពេទ្យ​ជោ​រៃ​ភ្នំពេញ និង DHP Phama បានទទួល​ពិនិត្យ​ជំងឺ និង​ផ្តល់​ថ្នាំ​ដោយ​ឥតគិតថ្លៃ ជូន​អ្នកជំងឺ​បាន​រហូតដល់​ទៅ​១,២២៧​នាក់។

កម្មវិធី​ពិនិត្យ និង​ព្យាបាល​ជំងឺ​ជូន​ប្រជាពលរដ្ឋ​ដោយ​ឥតគិតថ្លៃ ជូន​អ្នកជំងឺ​នេះ​ គឺជា​កម្មវិធី​មនុស្ស​ធម៌ ដ៏​មាន​អត្ថន័យ​របស់​មន្ទីរពេទ្យ​ជោរៃ​ភ្នំពេញ និង​ក្រុមហ៊ុន​ឱសថ DHG Pharma ចូលរួមចំណែក​លើក​កម្ពស់ សុខុមាលភាព​ជូន​ដល់​ប្រជាពលរដ្ឋ​ខ្មែរ ឲ្យ​មានឱកាស​ទទួល​បាន​ការថែទាំ​សុខភាព ប្រកប​ដោយ​គុណភាព ពី​សំណាក់​វេជ្ជបណ្ឌិត ឯកទេស​វៀតណាម ដែល​មាន​បទពិសោធន៍​ខ្ពស់ រួម​ជា​មួយ​សម្ភារ​បរិក្ខារ​ពេទ្យ​ទំនើប ដែល​មាន​បំពាក់​នៅ​មន្ទីរពេទ្យ​ជោ​រៃ​ភ្នំពេញ។

លោក Ngo Thanh Viet ប្រធាន​ផ្នែក​អភិវឌ្ឍន៍​ពាណិជ្ជកម្ម អន្តរជាតិ​របស់​ក្រុមហ៊ុន​ឱសថ DHG Pharma បាន​លើក​ឡើង​ថា រូបគាត់​ពិតជា​មានចិត្ត​សប្បាយរីករាយ​យ៉ាង​ខ្លាំង​ដែល​លទ្ធផល នៅ​ឆ្នាំ​២០១៨ មានការ​កើន​ឡើង​ខ្លាំង​ជាង​ឆ្នាំ​២០១៧ ហើយ​រូបលោក​ផ្ទាល់​ពិតជា​រីករាយ​ផង​ដែរ។ ដោយ​មាន​ឃើញ​បងប្អូន​ប្រជាពលរដ្ឋ​នៅ​កម្ពុជា​មាន​សុខភាព​ល្អ ក្រោម​ការពិនិត្យ និង​ព្យាបាល​ពី មន្ទីរ​ពេទ្យ​ជោ​រៃ និង​មានការ​សហការ​ជាមួយនឹង DHG Phama​។​
​
លោក​បន្ត​ទៀត​ថា ក្រោម​កិច្ចសហការ​រវាង DHG Phama និង​មន្ទីរពេទ្យ​ជោ​រៃ​ភ្នំពេញ ក៏បាន​លើក​កម្ពស់​វិស័យ​សុខាភិបាល​មួយ​ផ្នែក​ផង​ដែរ និង​ម្យ៉ាងវិញទៀត​ក៏បាន​កាត់បន្ថយ​ភាព​ក្រីក្រ​របស់​បង​ប្អូន​ប្រជាពលរដ្ឋ​កម្ពុជា ដោយសារតែ​ការពិនិត្យ និង​ព្យាបាល​ជំងឺ​របស់​ក្រុម​គ្រូពេទ្យ​ ដោយ​មិន​គិត​ប្រាក់​។

មួយវិញទៀត​ លោក​មើល​ឃើញ​ថា អ្នកជំងឺ​ជាង​១​ពាន់​នាក់ ​ដែល​បាន​ចូល​មក​ពិនិត្យ​ទាំង​អស់​នោះ ពិត​ជា​មាន​ភាព​សប្បាយ​រីករាយ​ផង​ដែរ ដោយមាន​ការ​ព្យាបាល​ពី​សំណាក​ក្រុម​គ្រូពេទ្យ​ជំនាញៗ នៅ​កម្ពុជា និង​ប្រទេស​វៀតណាម​។​

គួរ​បញ្ជាក់​ថា គណៈ​គ្រប់គ្រង​រវាង មន្ទីរពេទ្យ​ជោ​រៃ​ភ្នំពេញ និង​ក្រុមហ៊ុន​ផលិត​ឱសថ​ DHG Phama សន្យា​ នឹង​បន្ត​កិច្ច​សហ​ប្រតិបត្តិការ​ដ៏​ល្អ​មួយ​នេះ​ទៅ​មុខ​ទៀត​នៅ​ក្នុង​ឆ្នាំ​២០១៩​នេះ ដោយ​មើល​ឃើញ​លទ្ធផល​ល្អ​គួរ​ជាទី​គាប់ចិត្ត ក៏ដូចជា​មានការ​គាំទ្រ​ច្រើន​ពី​បងប្អូន​ប្រជាពលរដ្ឋ​នៅ​កម្ពុជា និង​ជា​ពិសេស​ទៅទៀត​នោះ​ នៅ​ក្នុង​កិច្ចសហការ​នេះ នឹង​បន្ថែម​អ្វី​ដែល​ថ្មី​ពិសេស​ទៀត ទៅលើ​កម្មវិធី​សប្បុរសធម៌​ផ្សេងៗ​ទៀត៕



​

Source: Kampuchea Thmey Daily