ក្រុមកីឡាករអាយុក្រោម១៣ឆ្នាំ (U13) របស់ក្លិបភ្នំពេញក្រោនក្លាយជាម្ចាស់ជើងឯក ក្នុងប្រកួតពានរង្វាន់ទិវាបាល់ទាត់អាយុក្រោម១៣ឆ្នាំ ២០១៨ ឬហៅថាU-13 Football Festival 2018 ដែលរៀបចំដោយសហព័ន្ធកីឡាបាល់ទាត់កម្ពុជា (ស.ប.ក) ខណៈព្រឹត្តិការណ៍នេះមានក្រុមចូលរួមចំនួន២៣ក្រុម ហើយរៀបចំការប្រកួតរយៈពេល៣ថ្ងៃជាប់ៗគ្នា។
អ្នកគ្រូបង្វឹកក្រុមកីឡាករអាយុក្រោម១៣ឆ្នាំភ្នំពេញក្រោន ម៉ៅ សាវីន បានបញ្ជាក់ថា នេះជាលើកទីមួយហើយ ដែលខ្លួនដឹកនាំក្រុមកីឡាបាល់ទាត់ជាផ្នែកបុរសទទួលបានជោគជ័យ ហើយអ្នកគ្រូក៏សូមអរគុណនូវការខិតខំប្រឹមប្រែងរបស់កូនក្រុមរបស់ខ្លួនផងដែរ។ តែទន្ទឹមគ្នានេះដែរក៏មានមតិរិះគន់មួយចំនួនជុំវិញការឈ្នះរបស់ក្រុមកីឡាករអាយុក្រោម១៣ឆ្នាំភ្នំពេញក្រោន ដោយលើកឡើងថាជាក្រុមដែលមានកីឡាករធំ ឬមានអាយុលើសក្រុមដទៃទៀត។
ជុំវិញបញ្ហានេះអ្នកគ្រូបង្វឹកខាងលើបានបញ្ជាក់ថា៖«ខ្ញុំក៏បានដឹងពីបញ្ហាទាំងនេះដែរ តែខ្ញុំសូមបញ្ជាក់ថាកីឡាករអាយុក្រោម១៣ឆ្នាំភ្នំពេញក្រោន គឺមានអាយុត្រឹមត្រូវទៅតាមការកំណត់របស់សហព័ន្ធ ហើយយើងក៏មានឯកសារបញ្ជាក់ត្រឹមត្រូវផងដែរ។ កីឡាករយុវជនថ្នាលរបស់យើងគឺមានកាយសម្បទារល្អ ដោយសារតែពួកគេមានការហូបចុកល្អ មានការហ្វឹកហាត់ត្រឹមត្រូវ ហើយអ្វីដែលសំខាន់នោះគឺយើងរើសយកតែកីឡាករដែលមានគុណភាពដើម្បីចូលរួមក្នុងការប្រកួតនេះ»។
គ្រូបង្វឹកដែលមានប្រភពមកពីខេត្តបាត់ដំបងរូបនេះបានបន្តថា ៖«ខ្ញុំចង់ឲ្យក្រុមដែលរិះគន់លើភ្នំពេញក្រោន យកពេលវេលាបង្កើនសមត្ថភាពក្រុមខ្លួនឯង ដើម្បីឲ្យការប្រកួតប្រជែងនៅពេលខាងមុខកាន់តែខ្លាំងក្លាជាងនេះទៀត»។ សូមបញ្ជាក់ថាមុនក្លាយជាម្ចាស់ជើងឯកថ្នាក់ជាតិនេះក្រុមភ្នំពេញក្រោន បានប្រកួតឈ្នះក្រុមខេត្តស្វាយរៀង នៅវគ្គផ្តាច់ព្រ័ត្រដោយលទ្ធផល ២-១ លើទីលានមជ្ឈមណ្ឌលនិងសាលាបាល់ទាត់ជាតិបាទី នៅល្ងាចថ្ងៃពុធ ទី១៦ ខែមករា ឆ្នាំ២០១៩ថ្មីៗនេះ៕
Source: Kampuchea Thmey Daily
0 Comments