សៀមរាប ៖ លួចម៉ូតូបានសម្រេចខណៈជនរងគ្រោះស្រវឹងស្រាចតឈប់ដេកនៅចិញ្ចើមផ្លូវ សំណាងល្អ ម្ចាស់ និងប្រជាពលរដ្ឋបានឃើញ រាយការណ៍ឲ្យសមត្ថកិច្ច ពេលនោះ ជនសង្ស័យភ័យពេកជិះគេចបានប្រហែល៤០០ម៉ែត្រ ក៏ក្រឡាច់ដួលខ្លួនឯងរងរបួសស្រាល ទើបសមត្ថកិច្ចក្របួចជាប់។
លោកឧត្តមសេនីយ៍ត្រី ភឹង ចន្តារ៉េត ស្នងការរងទទួលផែនកណ្តាលព្រហ្មទណ្ឌនៃស្នងការដ្ឋានខេត្តសៀមរាបបានឲ្យដឹងថា ករណី អំពើលួច(ម៉ូតូ) នៅថ្ងៃទី១០ ខែកុម្ភៈ ឆ្នាំ២០១៩ នៅវេលាម៉ោង១៩និង០០នាទី នៅចំណុចភូមិរលួសខាងលិច ឃុំរលួស ស្រុកប្រាសាទបាគង ខេត្តសៀមរាប។
លោកបន្តថា រឿងហេតុ នៅថ្ងៃទី១០ខែកុម្ភៈ ឆ្នាំ២០១៩នេះ មានឈ្មោះ ជាក់ ចិន ភេទប្រុសនៅភូមិសាលាកន្សែង សង្កាត់ស្វាយដង្គំ ក្រុងសៀមរាប បានជិះម៉ូតូម៉ាកស៊ូមម័រ ស៊េរីឆ្នាំ២០០៦ពណ៌ស ពាក់ស្លាកលេខ សៀមរាប1Y0-3981មកហូបការនៅភូមិរកាកំបុត ឃុំត្រពាំងធំ ស្រុកប្រាសាទបាគង រហូតដល់ម៉ោងប្រហែល៤ជាង ទើបជិះម៉ូតូត្រឡប់ទៅសៀមរាបវិញម្នាក់ឯងតាមផ្លូវជាតិលេខ៦ ដល់ចំណុចភូមិរលួសខាងលិច ឃុំរលួស ស្រុកប្រាសាទបាគង ស្រវឹងទៅមុខពុំរួចក៏ឈប់ម៉ូតូដេកនិងជំរះផ្លូវតែម្តង។លុះម៉ោង១៩និង០០នាទី ស្រាប់តែមានជនសង្ស័យបានធ្វើសកម្មភាព យកម៉ូតូជិះមកទិសខាងលិច ពេលនោះម្ចាស់ និងប្រជាពលរដ្ឋបានឃើញ បានរាយការណ៍អោយសមត្ថកិច្ចយើង ពេលនោះ ជនសង្ស័យជិះគេចមកទិសខាងលិចបានប្រហែល៤០០ម៉ែត្រ ក៏ក្រឡាច់ដួលខ្លួនឯងបណ្តាលឲ្យរងរបួស ហើយបញ្ជូនទៅមន្ទីរពេទ្យ ក្នុងក្រុងសៀមរាប។
លោកបន្តថា បន្ទាប់ពីព្យាបាលរួចកម្លាំងនគរបាលជំនាញស្រុកប្រាសាទបាគងបាននាំខ្លួនជនសង្ស័យឈ្មោះ ឆេង ស្រស់ អាយុ៤៤ឆ្នាំរស់នៅភូមិចុងឃ្នៀសសង្កាត់ចុងឃ្នៀស ក្រុងសៀមរាប មកសួរនាំនៅស្នងការដ្ឋានខេត្តដើម្បីរៀបចំសំណុំរឿងបញ្ជូនទៅតុលាការចាត់ការបន្ត៕
Source: Kampuchea Thmey Daily
0 Comments