ឧត្តរមានជ័យ ៖ ស្រះទឹកមួយកន្លែងទំហំជាង ១ ហិកតា ដែលជាអំណោយរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ផ្តល់ជូនសម្រាប់ស្តុកទឹកផ្គត់ផ្គង់ឲ្យការប្រើប្រាស់ប្រចាំថ្ងៃនៅពន្ធនាគារខេត្តឧត្តរមានជ័យ ក៏ដូចជាកងទ័ព និងប្រជាពលរដ្ឋ ស្ថិតក្នុងសង្កាត់សំរោង ក្រុងសំរោង ត្រូវបានលោក ប៉ែន កុសល្យ អភិបាល នៃគណអភិបាលខេត្តឧត្តរមានជ័យ បើកការដ្ឋាន ជីក ហើយ នាព្រឹកថ្ងៃចន្ទ ៧កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែកុម្ភៈ ឆ្នាំ ២០១៩ នេះ។
ការបើកការដ្ឋាននេះបានធ្វើឡើង បន្ទាប់ពីលោក ចាន់ យុត្ថា រដ្ឋលេខាធិការក្រសួងធនធាន និងឧតុនិយម និងលោក ប៉ែន កុសល អភិបាល នៃគណអភិបាលខេត្តឧត្តរមានជ័យ ព្រមទាំងអភិបាលរង និងប្រធានមន្ទីរធនធានទឹក និងឧតុនិយមខេត្តឧត្តរមានជ័យ បានចុះពិនិត្យស្ថានភាពនៃការខ្វះខាតទឹកសម្រាប់ប្រើប្រាស់ប្រចាំថ្ងៃនៅក្នុងពន្ធនាគារខេត្តឧត្តរមានជ័យ ស្ថិតក្នុងសង្កាត់សំរោង ក្រុងសំរោង នារសៀលថ្ងៃសៅរ៍ ៥កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ០៩ ខែកុម្ភៈ ឆ្នាំ ២០១៩ នេះ។
ក្រសួង បានឲ្យដឹងថា ក្រោយពីពិនិត្យ រួច ដំណោះស្រាយចំពោះមុខ លោក អភិបាលខេត្ត បានសម្រេចផ្តល់នូវទឹកស្អាត ចំនួន ១០ ម៉ែត្រគូប ក្នុង ០១ ថ្ងៃ សម្រាប់ផ្គត់ផ្គង់ឲ្យការប្រើប្រាស់ប្រចាំថ្ងៃនៅក្នុងពន្ធនាគារ ហើយលោក ចាន់ យុត្ថា រដ្ឋលេខាធិការ ក៏បានផ្តល់ជាថវិកាចំនួន ១.០០០ ដុល្លារសហរដ្ឋអាមេរិក ដល់មន្ទីរធនធានទឹក និងឧតុនិយមខេត្ត ដើម្បីទិញស៊ីទែនទឹកចំណុះ ៥ ម៉ែត្រគូប ចំនួន ០២ ស៊ីទែន បំពាក់លើរថយន្តបែន សម្រាប់ដឹកជញ្ជូនទឹកទៅកាន់ពន្ធនាគារ។ ចំណែក ដំណោះស្រាយយូរអង្វែងទៅថ្ងៃអនាគត លោក លឹម គានហោ បានសម្រេចផ្តល់ស្រះទឹកមួយកន្លែង ទំហំជាង ១ ហិកតា ដែលមិនត្រឹមតែអាចផ្គត់ផ្គង់ទឹកដល់ការប្រើប្រាស់នៅក្នុងពន្ធនាគារប៉ុណ្ណោះទេ ទាំងកងទ័ព និងប្រជាពលរដ្ឋនៅតំបន់នោះ ក៏អាចប្រើប្រាស់បានគ្រប់គ្រាន់ផងដែរ។
ក្រោយពីមានការ ឯកភាព ពីភាគីពាក់ព័ន្ធ នាព្រឹកថ្ងៃចន្ទ ៧កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១១ ខែកុម្ភៈ ឆ្នាំ ២០១៩ នេះ ទឹកមួយកន្លែងទំហំជាង ១ ហិកតា ដែលជាអំណោយរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ផ្តល់ជូនសម្រាប់ស្តុកទឹកផ្គត់ផ្គង់ឲ្យការប្រើប្រាស់ប្រចាំថ្ងៃនៅពន្ធនាគារខេត្តឧត្តរមានជ័យ ក៏ដូចជាកងទ័ព និងប្រជាពលរដ្ឋ ស្ថិតក្នុងសង្កាត់សំរោង ក្រុងសំរោង ត្រូវបានលោក ប៉ែន កុសល្យ អភិបាល នៃគណអភិបាលខេត្តឧត្តរមានជ័យ បើកការដ្ឋានជីកហើយ៕
Source: Kampuchea Thmey Daily
0 Comments