បាត់ដំបង ៖ ជនសង្ស័យចំនួន ២ នាក់ ដែលជាប់ពាក់ព័ន្ធនឹងករណី រក្សាទុកដោយខុសច្បាប់ នូវសារធាតុញៀន ត្រូវបានកម្លាំងសមត្ថកិច្ចធ្វើការឃាត់ខ្លួនបានជាបន្តបន្ទាប់ ទៅតាមការឯកភាពរបស់លោកព្រះរាជអាជ្ញា ផងដែរ ខណៈដែលកម្លាំងបានចុះល្បាតតាមដងផ្លូវ។
កិច្ចប្រតិបត្តិការនេះបានធ្វើឡើង កាលពីថ្ងៃទី៩ ខែកុម្ភៈ ឆ្នាំ២០១៩ វេលាម៉ោង ៩ និង ៤៥ នាទី យប់ នៅចំណុច ភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង គឺខណៈដែលកម្លាំងចេញល្បាតតាមដងផ្លូវ ហើយមានការសង្ស័យ។
ជនសង្ស័យដែលសមត្ថកិច្ចឃាត់ខ្លួននោះមានឈ្មោះ ធី ស៊ីថៃ ហៅវ៉ិត ភេទប្រុស អាយុ ២៦ ឆ្នាំ រស់នៅក្នុងភូមិ ឃុំ ខាងលើ ដោយសមត្ថកិច្ចបានរកឃើញថ្នាំញៀនប្រភេទម៉ាទឹកកកចំនួន ២ ថង់ ស្មើនឹងទម្ងន់ ២,៥៦ ក្រាម ជញ្ជីងសម្រាប់ថ្លឹងថ្នាំញៀន ១ ទូរស័ព្ទដៃ ១ គ្រឿង និងសម្ភារៈសម្រាប់វេចខ្ចប់ មួយចំនួនទៀត។
ក្រោយពីទទួលបាននូវចម្លើយសារភាព និងដោយមានការឯកភាពពីលោកព្រះរាជអាជ្ញា ផងនោះ សមត្ថកិច្ចបានបន្តកិច្ចប្រតិបត្តិការក្នុងភូមិសាស្ត្រខាងលើព្រមទាំងបានឃាត់ខ្លួនជនសង្ស័យដែលជាបក្ខពួកបានម្នាក់បន្ថែមទៀត ដែលមានឈ្មោះ យ៉ុន ចាន់រ៉ា ហៅលិញ ភេទប្រុស អាយុ២៥ឆ្នាំ ដោយដកហូតបានទូរស័ព្ទដៃ ១ គ្រឿង ប៉ុណ្ណោះ។ បច្ចុប្បន្នជនសង្ស័យទាំង ២ ត្រូវបានកម្លាំងបញ្ជូនទៅកាន់សាលាដំបូងខេត្តហើយ ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments