ស្ទឹងត្រែង ៖ ជនជាតិដើមភាគតិច(គ្រឹង) បានបង្ហាញពីស្រាពាងរបស់បងប្អូន(ជនជាតិគ្រឹង)ជាផ្នែកមួយបម្រើឲ្យវិស័យទេសចរណ៍ ព្រោះអាចសន្មតថា ជាផលិតផលមួយ ភូមិមួយ តែសូមឱ្យម្ចាស់អ្នកផលិតគិតពីសុវត្ថិភាពផ្នែកសុខភាព ដល់អតិថិជនអ្នកបរិភោគ។
ក្នុងឱកាសចុះពិនិត្យផលិតផលទេសចរណ៍នៅភូមិរាជានុកូលសង្កាត់ ក្រុង ខេត្តស្ទឹងត្រែងនៅថ្ងៃទី១១ ខែកុម្ភៈ ឆ្នាំ២០១៩ លោកអ៊ន ប៉ោសឿន ប្រធានមន្ទីរទេសចរណ៍ខេត្តបានបញ្ជាក់ថា ៖ តាមការឱ្យដឹងពីមេកន្ទ្រាញជនជាតិថា ស្រាពាង ច្រើនតែជនជាតិ គួយ- ព្នង -ស្ទៀង- កាវែត-ចារាយ-ខោល-នឹងជនជាតិគ្រឹងប្រើប្រាស់នៅក្នុងពិធីសែនព្រេនឡើងអ្នកតា- បុណ្យកម្សាន្តភូមិ-ឬពិធីសេន ដូនតាពិធីរៀបការកូន-ដើម្បីសុំសេចក្តីសុខចម្រើន បើនៅក្នុងវង្សសិល្បៈ គេនិយមហៅថា(កាប់ក្របីផឹកស្រា)។
លោកបញ្ជាក់ថា ៖ ទាំងនេះ ក៏ជាផ្នែកមួយទៀត បានចូលរួមចំណែកលើកស្ទួយទៅលើវិស័យទេសចរណ៍ផងដែរ នៅពេលដែលស្រាពាងមានអតិថិជន និងភ្ញៀវទេសចរ បានគាំទ្រនូវផលិតផលនេះ ប៉ុន្តែដើម្បីរក្សានូវសុខភាពរបស់ប្រជាពលរដ្ឋ ក៏ដូចជាភ្ញៀវទេសចរស្គាល់ ចង់ភ្លក់អីនឹង សូមម្ចាស់អ្នករៀបចំធ្វើម៉េចគិតគូរពីសុវត្ថិភាព ដើម្បីជាការចូលរួមចំណែកធ្វើឲ្យជីវភាពគាត់ដែលជាកូនចៅជនជាតិភាគតិច មានភាពល្អទៅអនាគត។
អ្នកស្រីមានដាវីជនជាតិគ្រឹងនៅសង្កាត់ស្ទឹងត្រែង អ្នកផលិតស្រាពាងបានអះអាងថា ៖ ការផលិតស្រានេះ ក្រុមគ្រួសារអ្នកស្រីបានចេះ តពីដូនតាមក ព្រោះបងប្អូនជនជាតិ តែងយកស្រាប្រភេទនេះដាក់ក្នុងពិធីសែនព្រេន ទៅតាមទម្លាប់ពីចាស់ទុំជនជាតិតរៀងមក តែពេលនេះនាងខ្ញុំផលិតវាច្រើនសម្រាប់លក់ដើម្បីថែរក្សាអភិរក្សស្រាពាងរបស់ជនជាតិរបស់នាងខ្ញុំនេះរហូតទៅមុខទៀត កុំឲ្យវាបាត់បង់ បើសិនជាយើងគ្មានការអភិរក្សាទេ វានឹងបាត់បង់នៅថ្ងៃណាមួយជាមិនខានទេ។
លោកជា ហាក់ អ្នកលក់ស្រាពាងនេះដែរ បានគាំទ្រចំពោះការគំនិតដ៏ល្អនេះ ព្រោះផលិតផលស្រាពាងបច្ចុប្បន្ន បានជួយកែប្រែជីវភាពរស់នៅរបស់យើងបាន ហើយផលិតផលនេះ មានការបញ្ជាទិញខ្លះៗហើយ ដែលនេះជាការលើកទឹកចិត្តឱ្យបងប្អូនជនជាតិកាន់តែរក្សាបាននូវប្រពៃណីបន្តទៀត។
លោកថា ៖ ស្រាពាងនេះ បងប្អូនជនជាតិបានផលិតឡើងមានធាតុផ្សំ ពីអង្ករដំណើបចំហុយឆ្អិន អង្កាម និងដាក់មេដំបែរផលិតពីដើម និងមើម រុក្ខជាតិ ធម្មជាតិ មិនមានបង្កផលប៉ះពាល់ដល់សុខភាពទេ។ ទាក់ទងនឹងគុណភាពស្រា ហើយនិងអនាម័យនេះខាងយើង ខ្ញុំនឹងទាក់ទងទៅខាងមន្ទីរជំនាញដូចជាមន្ទីរសុខាភិបាលមន្ទីរពាណិជ្ជកម្មដើម្បីឲ្យគាត់ចុះមកសិក្សាស្រាវជ្រាវវាយតម្លៃតើយើងមានគុណភាពពិតប្រាកដឬអត់ដើម្បីឲ្យគាត់ទទួលស្គាល់ថាយើងពិតជាបានធ្វើតាមការណែនាំមានអនាម័យល្អ។
លោកស្រីរីណា ជនជាតិអូទ្រីស ធ្លាប់បរិភោគស្រានេះ បានស្ងើចសរសើរថា ៖ បងប្អូនជនជាតិពិតជាមានទេពកោសល្យផលិតស្រានេះ ព្រោះពេលបរិភោគមានរសជាតិឆ្ងាញ់មិនចាញ់ស្រាបៀរទេ ហើយមានគុណភាពមិនប៉ះពាល់ផ្នែកសុខភាពទៀត។
សូមបញ្ជាក់ថា ៖ ការផលិតស្រាពាងរបស់ជនជាតិគ្រឹងនេះ បានបង្ហា្ញញពីការអភិរក្សផលិតផលរបស់បងប្អូនជនជាតិដើមភាគតិច ដែលមាននៅបណ្ដាខេត្តនៃភូមិភាគឦសានមួយចំនួនដូចជាខេត្តស្ទឹងត្រែង រតនគីរី និងខេត្តមណ្ឌលគិរីជាដើម៕
Source: Kampuchea Thmey Daily
0 Comments