បុណ្យចូលឆ្នាំចិន គ្មានគ្រោះថ្នាក់ចរាចរណ៍កើតឡើងទេ នៅក្នុងខេត្តកំពង់ឆ្នាំង ដែលនេះគឺជាការខំប្រឹងប្រែងរបស់អនុគណៈកម្មការសុវត្ថិភាពចរាចរណ៍ផ្លូវគោកខេត្ត

កំពង់ឆ្នាំង ៖ ឯកឧត្ដម ឈួរ ច័ន្ទឌឿន អភិបាលខេត្តកំពង់ឆ្នាំង បានថ្លែងនៅព្រឹកថ្ងៃទី៨ ខែកុម្ភៈ ឆ្នាំ២០១៩ ក្នុងពិធីប្រជុំបូកសរុបលទ្ធផលការងារ សុវត្ថិភាពចរាចរណ៍ផ្លូវគោក និងលទ្ធផល ការងារបង្ក្រាបគ្រឿងញៀន ឆ្នាំ២០១៨ នៅក្នុងសាលានយោបាយខេត្តកំពង់ឆ្នាំងថា ៖
សូមកោតសរសើរដល់គ្រប់ស្ថាប័នដែលពាក់ព័ន្ធទាំងអស់ និងអនុគណៈកម្មការសុវត្ថិភាពចរាចរណ៍ផ្លូវគោកខេត្ត ដែលបានយកចិត្តទុកដាក់ពង្រឹងសុវត្ថិភាពចរាចរណ៍ផ្លូវគោកល្អ ជាក់ស្ដែងនៅបុណ្យចូលឆ្នាំចិន៤ថ្ងៃ ថ្មីៗនេះ នៅក្នុងខេត្តកំពង់ឆ្នាំង ពុំកើតមានគ្រោះថ្នាក់ចរាចរណ៍ឡើយ។ ចំណែកបញ្ហាគ្រឿងញៀន គឺត្រូវប្រើប្រាស់កម្លាំងសរុប មធ្យោបាយសរុប បន្តសកម្មភាពបង្ក្រាបឲ្យបានព្រមៗគ្នានៅគ្រប់មូលដ្ឋាន ដោយត្រូវអនុវត្តន៍កុំ៣ គឺ ១.កុំចិញ្ចឹម ២.កុំឃុបឃិត និង ៣.កុំអត់គិតគូរ គឺនៅពេលអស់គ្រឿងញៀនទើបប្រជាពលរដ្ឋ យើងរស់នៅសុខដុមរមនា។

ឯកឧត្ដមអភិបាលខេត្តកំពង់ឆ្នាំងបានបន្តថា ចំពោះបញ្ហាសុវត្ថិភាពចរាចរណ៍ផ្លូវគោកថ្មី បើក្នុងឆ្នាំ២០១៨ កន្លងទៅនេះ មានករណីគ្រោះថ្នាក់ចរាចរណ៍ កើនឡើងច្រើនជាងឆ្នាំ២០១៧ ក៏ពិតមែន ប៉ុន្តែខេត្តកំពង់ឆ្នាំង បានទទួលការកោតសរសើរ ពីគណៈកម្មការ សុវត្ថិភាពចរាចរណ៍ ផ្លូវគោកថ្នាក់ជាតិ អំពីការពង្រឹងសុវត្ថិភាព ចរាចរណ៍ និងអត្រាគ្រោះថ្នាក់ចរាចរណ៍ដែលបានកាត់បន្ថយជាងខេត្តដទៃទៀត។

ដោយឡែក ចំពោះគ្រឿងញៀនវិញ តាមរបាយការណ៍របស់លោកស្នងការដ្ឋាននគរបាលខេត្ត បានបញ្ជាក់ថា ការបង្ក្រាបគ្រឿនញៀន បានជាច្រើនករណី ក៏ប៉ុន្តែយើងគ្រប់គ្នាមិនចង់ឃើញ ការបង្ក្រាបបែបនេះនោះទេ គឺយើងចង់ឃើញនៅក្នុងខេត្តកំពង់ឆ្នាំង គ្មានការប្រើប្រាស់គ្រឿងញៀន គ្មានការជួញដូរគ្រឿងញៀន ទើបប្រជាពលរដ្ឋរស់ដោយសុខសាន្ត គ្មានអ្នករបួស ឬស្លាប់ដោយអំពើហិង្សា និងគ្មានគ្រោះថ្នាក់ចរាចរណ៍ដោយឥទ្ធិពល នៃគ្រឿងញៀន។

នៅក្នុងពិធីនោះដែរ លោក កែវ ពៅ ប្រធានលេខាធិការដ្ឋាន អនុគណៈកម្មការសុវត្ថិភាពចរាចរណ៍ផ្លូវគោកខេត្ត និងជាប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង បានអានរបាយការណ៍ឲ្យដឹងថា នៅក្នុងឆ្នាំ ២០១៨ គិតចាប់ពីថ្ងៃទី១៩ ខែវិច្ឆិកា ឆ្នាំ២០១៧ ដល់ថ្ងៃទី២០ ខែវិច្ឆិកា ឆ្នាំ២០១៨ នៅក្នុងខេត្តគ្រោះថ្នាក់ចរាចរណ៍បានកើតឡើងចំនួន១១៣លើក កើនឡើងជាងឆ្នាំចាស់ ៣៥លើក បណ្ដាលឲ្យរងរបួសធ្ងន់ចំនួន៩៤នាក់ , កើនឡើងជាង ឆ្នាំចាស់១៤នាក់ , រងរបួសស្រាល ចំនួន៧១នាក់ , ថយចុះ២៨នាក់ បណ្ដាលឲ្យមានអ្នកស្លាប់៤៤នាក់ , ប្រៀបធៀបទៅនឹងឆ្នាំចាស់ មានអ្នកស្លាប់ចំនួន៣៣នាក់ ,កើនឡើង១១នាក់។

ដោយឡែក លោក ឡុច វណ្ណារ៉ា ស្នងការនគរបាលខេត្ត បានអានរបាយការណ៍ឲ្យឲ្យដឹងថា ក្នុងឆ្នាំ២០១៨ កន្លងទៅ។ បង្ក្រាបគ្រឿងញៀនបានចំនួន១៣២ករណី ឃាត់ខ្លួនមនុស្សចំនួន៥៩១នាក់ ចាប់ដកហូតបានគ្រឿងញៀន មាន មេតំហ្វេតាមីន( ICE )ទម្ងន់ជិត៦ពាន់ក្រាម , ថ្នាំញៀនប្រភេទ w y ចំនួន១៨៣ គ្រាប់, កញ្ឆាក្រៀម១៦ក្រាម , ជញ្ជីងថ្លឹងថ្នាំចំនួន ៦គ្រឿង , រថយន្ត៣គ្រឿង,ម៉ូតូ៣៤ គ្រឿង ទូកចំនួន៣គ្រឿង, ទូរស័ព្ទដៃចំនួន១៩២គ្រឿង , កាំភ្លើងកែច្នៃ៦ដើម , ដាវ២៣ដើម កាំបិត ៤ , ដែកឆាប១ ,កន្ត្រៃ៤ លុយខ្មែរជិត២លានរៀល , លុយដុល្លារ៤៩ដុល្លារ , និងឧបករណ៍វេចខ្ចប់ មួយចំនួនធំទៀត។

លោកស្នងការនគរបាលខេត្ត ក៏សំណូមពរដល់សមត្ថកិច្ចនគរបាលគ្រប់ប៉ុស្តិ៍រដ្ឋបាលទាំង៧០ឃុំសង្កាត់ ត្រូវសកម្មស្រាវជ្រាវទប់ស្កាត់ និងបង្ក្រាបមុខសញ្ញាគ្រឿងញៀនឲ្យបានជោគជ័យនៅក្នុងដែនសមត្ថកិច្ចទទួលខុសត្រូវរបស់ខ្លួន។ ដោយយើងគិតថា នៅក្នុងខេត្តមាន៧០ប៉ុស្តិ៍ បើក្នុង១ខែយើងបង្ក្រាបបានតែ១ករណីនោះ សរុបទៅនៅក្នុងខេត្តក៏បាន៧០ករណីហើយដែរ គឺគ្រឿងញៀននឹងអាចកាត់បន្ថយបានជាបន្តបន្ទាប់ គ្មានគ្រឿងញៀនទើបយុវជនជាអ្នកបន្តវេនមានការអភិវឌ្ឍ ប្រទេសជាតិ និងមានសុខសន្តិភាព មានការអភិវឌ្ឍលើគ្រប់វិស័យ។

សូមបញ្ជាក់ថា នៅក្នុងពិធីប្រជុំបូកសរុបនេះ មានលោកមេភូមិមកពីភូមិទាំង២៦៩ភូមិ មេឃុំទាំង៧០ឃុំសង្កាត់ លោកមេប៉ុស្តិ៍នគរបាលមក៧០ប៉ុស្តិ៍ ដែលមកពីគ្រប់ស្រុកក្នុងខេត្ត រួមនឹងមន្ត្រីមកពីមន្ទីរអង្គភាពជុំវិញខេត្តបានចូលរួមជាង៨០០នាក់៕