ធន់ ចាន់តាក់ អ្នកប្រដាល់សមាគមកីឡាក្រសួងការពារជាតិ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃ ចាក់រ៉ូត ភេត (Chakrout Phat) ដោយប្រកួតគ្នាក្នុងទម្ងន់៦៣,៥ ០០ គ.ក្រ។ ពីរនាក់នេះ ប្រកួតគ្នានៅលើសង្វៀនBoostrong Fighter On Fire របស់SEATV នាព្រឹកថ្ងៃអាទិត្យ ទី១០ ខែកុម្ភៈ ឆ្នាំ២០១៩នេះ។
ចាន់តាក់ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេបានឆ្លងកាត់ការប្រកួតជាមួយអ្នកប្រដាល់ថៃប្រមាណជាង២០នាក់ទាំងលើកនេះ។ កាលពីជួបប្រកួតជាមួយថៃលើកចុងក្រោយនៅសង្វៀនSEATVនេះ(០២កញ្ញា២០១៨) គេបានវាយឈ្នះថៃSoun Tepheap ដោយពិន្ទុ។
ធន់ ចាន់តាក់ មានប្រវត្តិប្រកួតចំនួន៧២លើក ក្នុងនោះវាយឈ្នះ៥៩ ចាញ់១១ លើក មិនដែលស្មើ។ គេជាអ្នកប្រដាល់ជើងខ្លាំងស្រករក្រោយ ដែលមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា ចាន់តាក់អាចយកឈ្នះចាក់រ៉ូត ភេត បានឬក៏អត់នោះទេ? ។
ចាក់រ៉ូត ភេត ជាជើងខ្លាំងដែលមានស្នៀតទាត់ និងកណ្ដាប់ដៃល្អ។ ដូច្នេះធន់ ចាន់តាក់ ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អនិងខ្លាំង។ អ្នកប្រដាល់ថៃរូបនេះ មិនធ្លាប់មកប្រកួតនៅកម្ពុជានោះទេកន្លងមក។
អ្នកប្រដាល់ថៃរូបនេះ មានប្រវត្តិប្រកួតចំនួន៥៣លើក ឈ្នះ៤៣លើកចាញ់០៩លើក និង ស្មើ០១លើក។ ចាំមើល រវាងធន់ ចាន់តាក់ និង ចាក់រ៉ូត ភេត តើនរណាជាអ្នកឈ្នះនៅក្នុងការជួបគ្នានេះ?។
ចំពោះការប្រកួតមិត្តភាពរវាងខ្មែរ និងខ្មែរវិញ សួង សុវណ្ណថា អ្នកប្រដាល់ក្លិបបូរីរាជសីហ៍មានរិទ្ធ នឹងជួបសងសឹកជាមួយ ថន ភឿត អ្នកប្រដាល់ក្លិបឃ្លាំងមឿងកីឡាខេត្តពោធិ៍សាត់ ដោយប្រកួតក្នុងទម្ងន់៦០គីឡូក្រាម។
សួង សុវណ្ណថា បានវាយចាញ់ថន ភឿត ដោយពិន្ទុចំនួន២លើកមកហើយ កាលពីក្នុងឆ្នាំ២០១៧កន្លងមក តែការចាញ់របស់គេនេះ ធ្វើឲ្យគេមិនអស់ចិត្តនោះឡើយ។
យ៉ាងណា សួង សុវណ្ណថា ប្រហែលជានៅតែយ៉ាប់ជាមួយថន ភឿត ដដែលហ្នឹង ត្បិតអ្នកប្រដាល់ថនភឿត នេះ គេល្អនិងខ្លាំង ហើយមួយទៀត សុវណ្ណថា ឥឡូវគេក៏វាយធ្លាក់ដែរ។
កាលពីឡើងប្រកួតថ្ងៃទី០៣ ខែកុម្ភៈ ឆ្នាំ២០១៩ កន្លងទៅនេះ សួង សុវណ្ណថា ត្រូវធា នុរាជ វាយឲ្យសន្លប់ក្នុងទឹកទី៤ ដោយការទាត់ផ្កាប់ចានត្រូវកញ្ចឹង ក នោះ។ ដូច្នេះ ចាំមើល សួង សុវណ្ណថា អាចសងសឹកយកឈ្នះ ថន ភឿត បានសម្រេច ឬអត់នៅក្នុងការជួបប្រកួតគ្នាលើកទី៣នេះ?។
សូមបញ្ជាក់ថា ថន ភឿត គេឡើងប្រកួតលើកចុងក្រោយនេះ(២០មករា២០១៩) គេ វាយចាញ់ ណាម ម៉ូរ៉ាក់ អ្នកប្រដាល់ក្លិបពន្លឺសាមគ្គីខេត្តបាត់ដំបង ក្នុងទឹកទី៥។
សល់ ពិសិដ្ឋ អ្នកប្រដាល់ក្លិបកុសលកីឡា ត្រូវគេផ្គូឲ្យជួបប្រកួតជាមួយណាក់ សុខា អ្នកប្រដាល់ក្លិបយុវវាលស្បូវខណ្ឌច្បារអំពៅ ដោយប្រកួតក្នុងទម្ងន់៦៣,៥០០គីឡូក្រាម។ ពួកគេទាំងពីរនាក់នេះ មិនធ្លាប់ជួបគ្នាទេពីមុនមក។
ណាក់ សុខា ជាអ្នកប្រដាល់ស្រករក្រោយ ឯសល់ ពិសិដ្ឋ ជាអ្នកប្រដាល់ជើងចាស់ ប៉ុន្តែបានអាក់ខានឡើងប្រកួតយូរហើយ ទើបតែវិលមកសង្វៀនថ្មីៗនេះប៉ុណ្ណោះ។ សុខា បានមកឡើងប្រកួតវិញ នាថ្ងៃទី០៥ ខែមករា ឆ្នាំ២០១៩ ហើយបានវាយចាញ់ជើងចាស់ភុន សោភ័ណ្ឌ ក្លិបស្វាយរលំឫទ្ធិជ័យ ក្នុងទឹកទី២។
ដូច្នេះចាំ មើល ការជួបគ្នារវាងសល់ ពិសិដ្ឋនិងណាក់ សុខា នេះ តើនរណាជាអ្នកឈ្នះនោះ?។ ណាក់ សុខា គេប្រកួតលើកចុងក្រោយនេះ(២៩ធ្នូ២០១៨) ដោយវាយចាញ់អេ រាជសីហ៍ អ្នកប្រដាល់ជើងថ្មីក្លិបអេភូថងកីឡា ក្នុងទឹកទី៤។
ចំណែក ឆោម ប៊ុនឡុង អ្នកប្រដាល់ក្លិបអាណាចក្រគុនខ្មែរ នឹងត្រូវជួបប្រកួតជាមួយម៉ន ចិន្តា អ្នកប្រដាល់ក្លិបការិយាល័យ កងទ័ពជើងគោក ក្នុងទម្ងន់៦៣,៥០០គីឡូក្រាម ហើយកាន់ ម៉េងហុង ក្លិបនាគរាជមានជ័យ ជួបប្រកួតជាមួយសេក ទីណាល់ ក្លិបអង្គរមានជ័យខេត្តសៀមរាប ដោយប្រកួតក្នុងទម្ងន់៥១គីឡូក្រាម៕
Source: Kampuchea Thmey Daily
0 Comments