ភ្នំពេញ ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និង អធិការកិច្ច តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងនូវការសាទរចំពោះបេក្ខភាពឆ្នើមក្នុងការសូត្រគម្ពីអាល់គួអានុលការីដើម្បីបន្តទៅប្រលងថ្នាក់អន្តរជាតិ។
លោកជំទាវកិត្តិសង្គហបណ្ឌិតថ្លែងបែបនេះ ខណៈអញ្ជើញ ជាអធិបតីដ៏ខ្ពង់ខ្ពស់ក្នុងពិធីបិទការសូត្រគម្ពី អាល់គូអានុការីមលើកទី២៨ និងការប្រឡងចាំមាត់លើកទី២ គម្ពីរអាល់គួរអានុលការីមថ្នាក់ជាតិ ឆ្នាំ២០១៩ ដើម្បីត្រៀម ជ្រើសរើសបេក្ខភាពទៅ សូត្រគម្ពីរ ថ្នាក់អន្ដរជាតិ។
ពិធីនេះ បានប្រព្រឹត្ដទៅ នៅវិហារឥស្លាមគីឡូម៉ែត្រលេខ៩ សង្កាត់ច្រាំងចំរេះទី១ ខណ្ឌឬស្សីកែវ រាជធានីភ្នំពេញ កាលពីរសៀលថ្ងៃអាទិត្យ ១៣ កើត ខែមាឃ ឆ្នាំចសំរឹទ្ធស័កព.ស ២៥៦២ ត្រូវនឹងថ្ងៃទី១៧ កុម្ភៈ ឆ្នាំ២០១៩។
លោកសុះ កំរ៉ី ប្រធានគណៈកម្មាធិការពិធីសូត្រគម្ពីរអាល់គួអានុការីម បានបញ្ជាក់ថា ពិធីសូត្រគម្ពីររបស់សាសនាឥស្លាមនេះ រៀបចំដោយគណៈដឹកនាំជាន់ខ្ពស់ នៃសាសនិកឥស្លាមកម្ពុជា សហការជាមួយ ក្រសួងធម្មការ និង សាសនា បានប្រព្រឹត្តទៅដោយរលូន ក្រោមប្រធានបទ “ឥស្លាម និងវប្បធម៌” រយ:ពេលពីរថ្ងៃ គឺថ្ងៃទី១៦ -១៧ ខែ កុម្ភៈ ឆ្នាំ២០១៩។ ក្នុងចំណោម ករី-ករីអះ (បេក្ខជន-បេក្ខនារី) ចំនួន៣៨ នាក់ មកពីរាជធានី ខេត្ត ទូទាំងប្រទេស អញ្ជើញចូលរួមសូត្រ គណ: មេប្រយោគ ក៏បានរកឃើញ ករី-ករីអះ ជ័យលាភីផ្នែកបុរសចំនួន ៣នាក់ និង ជ័យលាភីផ្នែកនារី ចំនួន ៣ នាក់ គឺផ្នែកបុរស លេខ១ បានទៅលើករី ឈ្មោះ កៅ អីសា មកពីខេត្តស្ទឹងត្រែង លេខ២ ករីឈ្មោះ សុប យ៉ាន អាលី មកពីខេត្ដក្រចេះនិង លេខ៣ ឈ្មោះ លឹម គ្រីយ៉ា មកពីខេត្ត បាត់ដំបង ។ ចំណែកផ្នែកនារី លេខ១ ករីអះ ឈ្មោះ ម៉ាន ម៉ារីយ៉ះ មកពីខេត្ដ ត្បូងឃ្មុំ លេខ២ ករីអះ ឈ្មោះ សាន សាក់ទីយ៉ាស មកពីខេត្ដ កោះកុង និង លេខ៣ ករីអះឈ្មោះ .ឯល ទ័រនីយ៉ាល់ មកពីខេត្ត បាត់ដំបង។ រីឯក្នុងចំណោមករី-ករីអះ ប្រឡងសូត្រចាំមាត់ចំនួន ៣នាក់ លេខ១ ករីឈ្មោះ ការីម សាន់ រ៉ូសាលី មកពីខេត្ត ក្រចេះ លេខ២ ករីឈ្មោះ ប៊ើ រីយ៉ាស់យើ មកពីខេត្តកំពត និង លេខ ៣ ករីឈ្មោះ រឹម ណាស៊ីរីន មកពីខេត្ត បន្ទាយមានជ័យ។
លោកជំទាវកិត្តិសង្គហបណ្ឌិតម៉ែន សំអន បានបញ្ជាក់ថា រាជរដ្ឋាភិបាល ដែលមាន ក្រសួងធម្មការ និង សាសនា ជាសេនាធិការ បានសហការ និងគាំទ្រចំពោះការជួបជុំគ្នារបស់បងប្អូនសាសនិកឥស្លាម ដើម្បីប្រារព្ធពិធីប្រពៃណីផ្សេងៗ របស់សាសនិកឥស្លាមកម្ពុជា ស្របតាមគោលនយោបាយសុខដុមនីកម្មជាតិ និងវប្បធម៌ពហុជនជាតិ ដែលមានសកម្មភាពយ៉ាងផុសផុល និងសស្រាក់សស្រាំ។
លោកជំទាវ ក៏បានបង្ហាញនូវការពេញចិត្តចំពោះប្រធានបទឆ្នាំនេះ “ឥស្លាម និងវប្បធម៌” ប្រធានបទទាំងអស់ពិតជាសមស្របបំផុតសម្រាប់បរិកាសបច្ចុប្បន្ន និងផ្សារ ភ្ជាប់នឹងគោលនយោបាយដែលត្រូវបានអនុវត្ត យ៉ាងសស្រាក់សស្រាំ និងកំពុងមានចលនាយ៉ាងផុសផុល នៅតាមមូលដ្ឋានគ្រប់ទិសទី នៃប្រទេសជាតិយើង។
លោកជំទាវកិត្តិសង្គហបណ្ឌិតថ្លែងបន្តថា ប្រធានបទទាំងនេះមានអត្ថន័យយ៉ាងជ្រាលជ្រៅ និងចូលរួមក្នុងចលនារក្សាគុណតម្លៃជាតិ ការពង្រឹង និងពង្រីកគុណធម៌ និងសីលធម៌ ក្នុងជួរសាសនិកឥស្លាម ការកសាងមោទនភាពជាតិ នៅ មូលដ្ឋាន សហគមន៍របស់បងប្អូន។ ពិតជាសមស្របបំផុតសម្រាប់បរិយាការណ៍បច្ចុប្បន្ន ដោយហេតុថាដែលពិតជាបង្ហាញពីគុណធម៌របស់គម្ពីរសាសនាឥស្លាម ដែលនឹងត្រូវស្តែងចេញជាសកម្មភាពជាក់ស្តែង និងរស់រវើក នៅក្នុងសហគមន៍ ឥស្លាម ក្នុងការឆ្លើយតបទៅនឹងបរិបទពិភពលោក ជា ពិសេសរដ្ឋាភិបាលកម្ពុជាចំពោះប្រជាជាតិ ដែលតែងតែយកចិត្តទុកដាក់លើបញ្ហាសីលធម៌ជាអាទិភាព។
ក្នុងនាមសម្តេចតេជោ នាយករដ្ឋមន្ត្រី និងតាងនាមរាជ រដ្ឋាភិបាលកម្ពុជា លោកជំទាវកិត្តិសង្គហបណ្ឌិតម៉ែន សំអន ក៏បានចូលរួមអបអរសាទរ និងកោតសរសើរ ចំពោះជោគជ័យ និង លទ្ធផលល្អ ដែលសហគមន៍ឥស្លាមទទួលបាន ក្នុងការចូលរួមសូត្រគម្ពីររបស់ករី-ករីអះ តំណាងឲ្យកម្ពុជា លើឆាកអន្តរជាតិកន្លងមក ដែលបានបង្ហាញថា កម្ពុជា ពិតមែនតែជាប្រទេសតូច មានសាសនិកឥស្លាមតិចតួចបំផុត តែទទួលបានលទ្ធផលល្អ អាចប្រជែងជាមួយប្រទេសធំៗ និងមានសាសនិកឥស្លាមជាច្រើន ដែលបាចូលរួមសូត្រ។
លោកជំទាវកិត្តិសង្គហបណ្ឌិតក៏បានកោតសរសើរដល់បងប្អូនសាសនិកឥស្លាមទូទាំងប្រទេស ដែលបានខិតខំថែរក្សាប្រពៃណីដ៏ល្អរបស់ខ្លួន ពិសេសការសូត្រគម្ពីរអាល់គួអាន ដែល មានការលំបាកបំផុត នៅតាមសហគមន៍ និងគ្រួសារ៕
Source: Kampuchea Thmey Daily
0 Comments