សង់សំណង់រំលោភលើអូរសាធារណៈទាំងបំពានហើយ បែរជាមកបង្ហាញឯកសារបញ្ជាក់ថា ខ្លួនមានសិទ្ធិគ្រប់គ្រាន់ក្នុងការសាងសង់ទៅវិញ

តាកែវ ៖ ម្ចាស់សំណង់ ឈ្មោះ ម៉េង សុខុម ដែលកំពុងសាងសង់សំណង់រឹងលើអូរបង្ហូរទឹកសាធារណៈនៅក្នុងស្រុកគីរីវង់ បានបញ្ចេញនៅឯកសារជាច្រើន ពាក់ព័ន្ធនឹងសំណង់ដែលត្រូវបានប្រជាពលរដ្ឋមួយភូមិផ្ទុះប្រតិកម្មនឹងការសាងសង់ ដែលមានវិញ្ញាបនបត្រសំគាល់ម្ចាស់អចលនវត្ថុ ការសម្រេចឲ្យឈ្នះក្តីពីតុលាការកំពូល និងសិទ្ធិអនុញ្ញាតឲ្យសាងសង់ ដោយ លោក សុក សិត អតីតប្រធានមន្ទីរសុរិយោដីនគរោបនីយកម្ម និងសំណង់ខេត្តតាកែវ ដែលបានចូលនិវត្តន៍ប្រមាណជា២ឆ្នាំកន្លងទៅហើយ។

ក្រោយពីមានការផ្ទុះការតវ៉ាពីប្រជាពលរដ្ឋនាំគ្នាផ្តិតមេដៃ កាលពីព្រឹកថ្ងៃទី១៥ ខែកុម្ភៈ ឆ្នាំ២០១៩ដែលជំទាស់លើការសាងសង់សំណង់រឹងលើអូរសាធារណៈ១១៧គ្រួសារ និងស្នើសុំឲ្យ សម្តេចអគ្គមហាសេនាបតីតេជោ ហ៊ុន សែន ជួយអន្តរាគមន៍ដល់ពួកគាត់ ព្រោះខ្លាចសំណង់ខាងលើសាងសង់រួចធ្វើឲ្យមានការកកស្ទះចរន្តទឹក បណ្តាលឲ្យមានការលិចលង់ផ្ទះសំបែងរបស់ពួកគាត់ ថែមទាំងឃើញសារព័ត៌មានមួយចំនួនចុះផ្សាយព្រោងព្រាតផងនោះ ម្ចាស់សំណង់ដែលមាន ឈ្មោះ ម៉េង សុខុម បានបង្ហាញនៅឯកសាររបស់ខ្លួនតាមរយៈបណ្តាញសង្គមហ្វេសបុកផ្ទាល់ខ្លួនរបស់គាត់ កាលពីថ្ងៃទី១៦ ខែកុម្ភៈ ឆ្នាំ២០១៩ សម្រាប់ការពារ និងបង្ហាញនូវភាពស្អាតស្អំរបស់ខ្លួន។

ពាក់ព័ន្ធនឹងករណីដ៏ចម្រូងចម្រាសនេះដែរ មានមន្ត្រីជាន់ខ្ពស់ក្នុងខេត្តមួយរូប សូមមិនបញ្ចេញឈ្មោះបាននិយាយថា ថ្វីត្បិតតែម្ចាស់សំណង់មានឯកសារគ្រប់គ្រាន់ លើការគ្រប់គ្រងលើក្បាលដីរបស់ខ្លួន និងមានសិទ្ធិសាងសង់យ៉ាងណាក៏ដោយ តែមានប្រជាពលរដ្ឋជាច្រើនបានធ្វើការជំទាស់ ហើយក៏បានដឹងថា ទីតាំងសំណង់រឹងដែលកំពុងសាងសង់នោះ គឺជាដីអូរសាធារណៈ មិនមែនជារបស់បុគ្គលណាម្នាក់នោះឡើយ ហើយអូរនេះគឺមានតាំងពីយូរយារណាស់មកហើយ និងជាផ្លូវទឹកដ៏សំខាន់មួយសម្រាប់ការរំដោះ ឬបញ្ចៀសទឹកចេញកុំឲ្យមានការលិចលង់ដល់ផ្ទះរបស់បងប្អូនប្រជាពលរដ្ឋ។

លោកបន្តថា ក្នុងករណីនេះ គួរតែមានការសើរើឡើងវិញ លើសំណុំឯកសារដែលមានការសង្ស័យថា មិនប្រក្រតី។ ចំណែក លោក មិញ សុភាព នាយកសាលាបឋមសិក្សា សុខ អាន ទន្លាប់ បានប្រកាសគោលជំហរយ៉ាងរឹងមាំថា រូបលោក រួមជាមួយនឹងប្រជាពលរដ្ឋ១ភូមិ ក្នុងភូមិកំពង់ ឃុំព្រះបាទជាន់ជុំ នៅតែជំទាស់ ដើម្បីជាប្រយោជន៍រួមរបស់ប្រជាជន ព្រោះថាអូររំដោះទឹកនេះ គឺជាផ្លូវទឹកមួយដែលអាចបញ្ចៀសទឹកចេញមិនឲ្យជន់លិចផ្ទះសំបែងរបស់បងប្អូនប្រជាពលរដ្ឋ។

លោកបានបន្តថា ក្រោយមានការតវ៉ាជំទាស់មិនឲ្យមានការសាងសង់សំណង់រឹង កាលពីថ្ងៃទី១៥កុម្ភៈនេះដែរ រូបលោក រួមជាមួយប្រជាពលរដ្ឋ បានដាក់ពាក្យបណ្ដឹងនេះទៅតំណាងរាស្ត្រមណ្ឌលតាកែវ ឯកឧត្ដម សុខ សុកាន ផងដែរ។ ហើយមកទល់ពេលនេះ លោក មិញ សុភាព បានបញ្ជាក់ថា ម្ចាស់សំណង់នៅតែបន្តសាងសង់ និងដាក់ជាងធ្វើកាន់តែច្រើនជាងមុនទៀត ដោយនៅមិនទាន់មានអាជ្ញាធរណាចុះមកពិនិត្យឡើយ៕