កំពង់ធំ ៖ ដើម្បីជួយសម្រួលដល់តម្រូវការទឹក សម្រាប់ហូបចុកប្រចាំថ្ងៃរបស់បងប្អូនប្រជាពលរដ្ឋ លោករដ្ឋមន្ត្រីក្រសួងធនធានទឹក បានសម្រេចដោយប្រើប្រាស់អ៊ិចស្កាវ៉ាទ័រមួយចំនួន ដែលមានទីតាំងនៅភូមិភាគកំពង់ធំរួចជាស្រេច ដើម្បីកាយជាអណ្តូងទៅតាមបណ្តោយនៃស្ទឹងស្ទោង។
ក្រសួងបានឲ្យដឹងថា កាលពីថ្ងៃសុក្រ ៤កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៨ ខែកុម្ភៈ ឆ្នាំ២០១៩ នេះ លោក រដ្ឋមន្ត្រី លឹម គានហោ អមដំណើរដោយលោករដ្ឋលេខាធិការ ប៊ុន ហ៊ាន ដែលជាប្រធានមុខព្រួញតាមដានដោះស្រាយបញ្ហាទឹកក្នុងខេត្តកំពង់ធំ និងសៀមរាប ព្រមទាំងសហការី អ្នកបច្ចេកទេសមួយចំនួន បានចុះពិនិត្យជាក់ស្តែងដើម្បីមានវិធានការចំពោះមុខ និងយូរអង្វែង។
ក្រសួងបានបន្តថា ជាស្ថានភាពជាក់ស្តែងរហូតដល់ថ្ងៃនេះ ពាក់ព័ន្ធនឹងការងារបង្កបង្កើនផលស្រូវប្រាំង មន្ទីរធនធានទឹក និងឧតុនិយមខេត្តកំពង់ធំ បានដោះស្រាយចប់សព្វគ្រប់ ក្រោយពីវិធានការអន្តរាគមន៍ទម្លាក់ទឹកពីអាងទឹក៣០កញ្ញា និងបន្តបូមបាចបញ្ចូលស្រែ ដែលបច្ចុប្បន្នរង់ចាំតែការច្រូតកាត់តែប៉ុណ្ណោះ។ អ្វីដែលជាការព្រួយបារម្ភ ក្នុងរយៈពេល ២សប្តាហ៍ទៅមុខទៀត ដែលបច្ចុប្បន្នស្ថានភាពស្ទឹងស្ទោងបានដាច់ជាកង់ៗរួចទៅហើយនោះ គឺតម្រូវការទឹកសម្រាប់ហូបចុកប្រចាំថ្ងៃរបស់បងប្អូនប្រជាពលរដ្ឋ។
ស្ថិតក្នុងស្ថានភាពដូចនេះ លោក រដ្ឋមន្ត្រីបានសម្រេចដោយប្រើប្រាស់អ៊ិចស្កាវ៉ាទ័រមួយចំនួន ដែលមានទីតាំងនៅភូមិភាគកំពង់ធំរួចជាស្រេច ដើម្បីកាយជាអណ្តូងទៅតាមបណ្តោយនៃស្ទឹងស្ទោង។ ចំពោះវិធានការបន្តទៅមុខ គឺការស្ថាបនានូវសំណង់ស្ទាក់ទឹក នៅចំណុចឃុំម្សារក្រង និងសំណង់ចែកចាយទឹក-ស្ពាន នៅក្បែរនោះផងដែរ៕
Source: Kampuchea Thmey Daily
0 Comments