ក្រុម Cambodia All Stars ដែលបង្កើតឡើងដោយសហព័ន្ធកីឡាបាល់ទាត់កម្ពុជា (ស.ប.ក) បានប្រកួតមិត្តភាពអន្តរជាតិ ឈ្នះក្រុមបាល់ទាត់ SCG Muangthong United សមាជិកក្នុងពានរង្វាន់លីគកំពូលប្រទេសថៃ ដោយលទ្ធផល ២ទល់១ នៅល្ងាចថ្ងៃសៅរ៍ ទី៩ ខែកុម្ភៈ ឆ្នាំ២០១៩ នេះលើទីលានពហុកីឡដ្ឋានជាតិ ក្នុងរាជធានីភ្នំពេញ។
គ្រាប់បាល់ជ័យជម្នះនេះរកបានដោយកីឡាករ Privat ភាគីក្រុមកម្ពុជា បានរកគ្រាប់បាល់បើកឆាកនៅនាទី២៣ ហើយកីឡាករ ឈិន ឈឿន បន្តរកបានគ្រាប់ទី២ នៅនាទី៣៨ មុនចប់តង់ទី១។ ចូលដល់តង់ទី២នៅនាទី៧៥ កីឡាករ Heberty បានរកគ្រាប់បាល់វាយបកឱ្យក្រុម SCG Muangthong United។
ក្រុម Cambodia All Stars លើកនេះដឹកនាំដោយលោក ភា សុភត្រា គ្រូបង្វឹករបស់ក្រុមក្រសួងការពារជាតិ ខណៈថ្នាក់ដឹកនាំក្រុមផ្សេងទៀតមានលោក ឈូក ពិសិដ្ឋ តែងតាំងជាអ្នកចាត់ការទូទៅ លោក អ៊ុំ សាវង្ស គ្រូជំនួយ លោក ហោ សុខហេង គ្រូជំនួយ លោក យឿម សារ៉ាន់ គ្រូជំនួយ លោក ស៊ឹម ម៉េងហៃ គ្រប់គ្រងសម្ភារៈ និងលោក នី លក្ខណា គ្រប់គ្រងសម្ភារៈ។ ចំណែកសមសភាពកីឡាករវិញមានដូចជា សំរឹទ្ធ សីហា, ឈង់ ប៊ុនណាត, សេត រ៉ស៊ីប, នួន បូរី, សឿយ វិសាល, ប្រាក់ មុន្នីឧត្តម, អ៊ុំ វិចិត្រ, គួច សុកុម្ភៈ, កែវ សុខផេង, សុះ ស៊ូហាណា, សារ៉េត គ្រីយ៉ា, រ៉ឹង ប៊ុនហៀង, ស៊ិន កក្កដា, ឈិន ឈឿន, ម៉ាត់ ណូរ៉ុន, ឆេង ម៉េង, ហុង ផេង, ភួង សុខសាណា, ស៊ូ យ៉ាទី, អ៊ន ចាន់ប៉ូលីន, លី វ៉ាហេទ, អ៊ុព កាម៉ុល, Joichiro Sugiyama, Anderson Zogbe, Mizuno Hikaru, Mohamad Hamza, Privat។
ក្រុម Cambodia All Stars គឺជាការប្រមូលផ្ដុំកីឡាករល្អៗនៅក្នុងលីគកំពូលកម្ពុជា ទាំងកីឡាករខ្មែរនិងបរទេស ខណៈក្រុមនេះធ្លាប់បានប្រកួតមិត្តភាព៥លើករួចមកហើយ។ លោក ប្រាក់ សុវណ្ណារ៉ា និង លោក ទេព ឡុងរចនា ក៏ធ្លាប់មានបទពិសោធន៍ដឹកនាំក្រុមមួយនេះដែរ ខណៈចុងក្រោយលោក Leonardo Vitorino គឺជាគ្រូបង្វឹកម្តង។ ក្រុម Cambodia All Stars ត្រូវបានសហព័ន្ធកីឡាបាល់ទាត់កម្ពុជា បង្កើតឡើងនៅចុងឆ្នាំ២០១៥ មកម្ល៉េះ។
សូមរំលឹកថាក្រុម Cambodia All Stars ធ្លាប់បានប្រកួតគ្នាជាមួយក្រុម SCG Muangthong United ២លើកមកហើយដែលលើកទី១ ក្រោមការដឹកនាំរបស់លោក ប្រាក់ សុវណ្ណារ៉ា បានយកឈ្នះដោយលទ្ធផល៤ទល់៣ តែលើកទី២ ដែលដឹកនាំដោយលោក Leonardo Vitorino បានប្រកួតចាញ់ដោយលទ្ធផល៤ទល់០៕
Source: Kampuchea Thmey Daily
0 Comments