ស្ទឹងត្រែង ៖ បុរសម្នាក់ ដែលគេប្រទះឃើញអណ្ដែតទឹកកាលពីថ្ងៃទី៤ ខែកុម្ភៈ ឆ្នាំ២០១៩ កន្លងមកនេះនៅថ្ងៃទី៧ ខែកុម្ភៈនេះ ត្រូវបានសមត្ថកិច្ចជំនាញការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសហការជាមួយអធិការស្រុកសេសានស្រាវជ្រាវរកឃើញ និងលាតត្រដាងដឹងពីការពិតគឺជាកូនរបស់ជនដៃដល់, ប្រពន្ធ និងប្អូនថ្លៃ ដែលជាប់ពាក់ព័ន្ធក្នុងករណីនេះ។
លោកវរសេនីយ៍ទោដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់ខេត្តបានឲ្យដឹងថាជនរងគ្រោះ ដែលត្រូវកូនសម្លាប់នោះ ឈ្មោះថង រិទ្ធី ភេទប្រុស អាយុ 36 ឆ្នាំ។ ចំណែកជនដៃដល់ជាកូនមាន១ឈ្មោះ រិទ្ធី សុមន្នី ភេទប្រុស អាយុ19 ឆ្នាំ(កូន) ២ម្ដាយឈ្មោះ ម៉េត អាប់ ភេទស្រី អាយុ 33 ឆ្នាំ(ប្រពន្ធ) និងទី ៣ ឈ្មោះ ម៉េត គី ភេទប្រុស អាយុ 22ឆ្នាំ(ប្អូនថ្លៃ)។ ជនរងគ្រោះ និងជនដៃដល់មានទីលំនៅក្នុងភូមិភ្លុក ឃុំភ្លុក ស្រុកសេសាន ខេត្តស្ទឹងត្រែង។
លោកនាយការិយាល័យ បានបន្តឲ្យដឹងទៀតថា នៅថ្ងៃកើតហេតុ ប្ដីស្រវឹង បានឈ្លោះជាមួយប្រពន្ធរួមទាំងកូន ពេលដែលឈ្លោះគ្នានោះ ឪពុកបានយកដំបងបម្រុងវាយទៅលើកូន តែកូនចាប់យកដំបងបាន ក៏វាយទៅលើឪពុកចំនួន២ ដំបងចំក្បាលផ្នែកខាងក្រោយ និងមួយដំបងទៀតចំស្មា ធ្វើឲ្យឪពុកដេកស្ដូកស្ដឹងស្លាប់ភ្លាមៗនៅលើផ្ទះតែម្ដង។
លោកវរសេនីយ៍ទោបន្តថា តាមម្ដាយសារភាពចំពោះមុខសមត្ថកិច្ចថា ក្រោយកើតហេតុ ជនដៃដល់ជាកូន បានអៀវឪពុក ដែលស្លាប់ ចុះទៅក្នុងទន្លេយកខ្មោចចងសណ្ដូនជាមួយថ្មជាច្រើនដុំទម្លាក់ចូលទៅក្នុងទឹកទន្លេសេសាន។
លោកថា សពនោះ នៅថ្ងៃទី 4 ខែកុម្ភៈ ត្រូវបានប្រជានេសាទប្រទះឃើញ អណ្ដែតក្នុងទន្លេ ដែលមានខ្សែចងដុំថ្មជាច្រើនដុំ ហើយបានរាយការណ៍ទៅដល់សមត្ថកិច្ចចុះស្រាវជ្រាវ និងធ្វើកោសល្យវិច័យរកឃើញថា សាកសព ត្រូវបានគេសម្លាប់ចងនឹងថ្មសណ្ដូនទម្លាក់ទឹកហើមស្អុយមិនត្រូវបានស្គាល់អត្តសញ្ញាណនោះទេ។
បន្ទាប់ពីមានករណីឃាតកម្មនេះកើតឡើង អាជ្ញាធរភូមិឃុំ បានចុះស្រាវជ្រាវនៅតាមភូមិក្នុងឃុំកើតហេតុ សួរសមាជិកក្រុមគ្រួសារ មានបាត់មនុស្សឬទេ តែក្រុមគ្រួសារ ដែលត្រូវបានសម្លាប់ហាក់បីដូចមិនបានរាយការណ៍ថា បាត់មនុស្សនោះទេ ហាក់បីដូចជាមានអាថ៌កំបាំង។
លោកវរសេនីយ៍ទោ បានបញ្ជាក់បន្ថែមថា បន្ទាប់ពីមានករណីនេះ កើតឡើងហើយមិនស្គាល់អត្តសញ្ញាណនោះ ត្រូវបានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តដឹកនាំដោយលោកដួងស៊ីវុត្ថា សហការជាមួយអធិការដ្ឋាននគរបាលស្រុកសេសាន ចុះស្រាវជ្រាវក្នុងករណីខាងលើនេះ ទើបដឹងនូវ ផ្ទះដែលជាឃាតកបាត់មនុស្សមិនបាន រាយការណ៍ ហើយបានចុះស្រាវជ្រាវដល់ផ្ទះនោះ រកឃើញនូវវត្ថុតាងជាច្រើន ដូចជាខ្សែអន្ទាក់ចងសណ្ដូនថ្មទម្លាក់ជនរងគ្រោះចូលទៅក្នុងទឹកជាភស្តុតាង , ខ្សែអន្ទាក់ដែលនៅផ្ទះជនរងគ្រោះ ហើយបានឃាត់ខ្លួនមនុស្សបីនាក់ដែលដែលជាប់ពាក់ព័ន្ធក្នុងករណីខាងលើនេះ មានកូនប្រុស ម្តាយ និងប្អូនថ្លៃនាំខ្លួនមកអធិការដ្ឋាននគរបាលស្រុកសេសាន និងបញ្ជូនមកកាន់ស្នងការដ្ឋាននគរបាលខេត្តសាកសួរ។
លោកនាយការិយាល័យបន្តថា នៅថ្ងៃទី 7 ខែកុម្ភៈ បន្ទាប់ពីមានការសាកសួរជនដៃដល់ជាកូនមិនត្រូវបានសារភាពថា ខ្លួនបានសម្លាប់ឪពុកនោះទេ តែម្ដាយបានសារភាពចំពោះសមត្ថកិច្ចថា នៅថ្ងៃកើតហេតុប្តីរបស់គាត់ឈ្លោះជាមួយគាត់ និងកូន ហើយ បានយកដំបងបម្រុងវាយគាត់ និងកូន។ ពេលនោះ កូនក៏បានស្ទុះទៅឆក់យកដំបងពីឪពុកវាយទៅលើឪពុកចំនួន 2 ទៅ 3 ដំបងបណ្ដាលឱ្យស្លាប់តែម្ដង ហើយអៀវជនរងគ្រោះជាឪពុក ចុះទៅក្នុងទន្លេនិងចងសណ្តូនថ្មទម្លាក់ទឹកដើម្បីបំបាត់ភស្តុតាង។
តែទោះជាយ៉ាងណាការិយាល័យព្រហ្មទណ្ឌកម្រិតធ្ងន់ សហការជាមួយអធិការដ្ឋានស្រុកសេសានបានចុះស្រាវជ្រាវដល់ផ្ទះជនរងគ្រោះ និងបានរកឃើញនូវវត្ថុតាង និងអាចឈានដល់ការឃាត់ខ្លួនជនសង្ស័យទាំងបីនាក់នោះ ដែលជាប់ពាក់ព័ន្ធ។
ម្តាយបានសារភាពថា ប្ដីគាត់ពិតជាត្រូវបានកូនវាយនឹងដំបងពិតប្រាកដមែន ហើយក្នុងហេតុការណ៍នោះ ជនដៃដល់ជាកូនមិនបានសារភាពថា ខ្លួនបានវាយសម្លាប់ឪពុកនោះទេ។ ក្នុងហេតុការណ៍នេះក៏មានវត្តមានប្អូនថ្លៃរបស់គាត់ នៅទីនោះដែរ តែមិនបានពាក់ព័ន្ធក្នុងករណីឃាតកម្មនោះទេ។
បច្ចុប្បន្នជនសង្ស័យទាំងបីនាក់មានកូនម្ដាយ និងប្អូនថ្លៃ ដែលជាប់ពាក់ព័ន្ធក្នុងករណីនេះ ស្ថិតក្រោមការសាកសួរពីសមត្ថកិច្ចជំនាញនៃស្នងការដ្ឋាននគរបាលខេត្ត នៅថ្ងៃទី 8ស្អែកនេះ។ ជនសង្ស័យទាំង 3 នាក់ នឹងត្រូវបញ្ជូនទៅកាន់តុលាការដើម្បីចាត់ការបន្តទៅតាមនីតិវិធី៕
Source: Kampuchea Thmey Daily
0 Comments