ក្រុម Cambodia All Stars បរាជ័យ​ក្នុង​ប្រកួត​មិត្តភាព​ក្រៅផ្លូវការ​មុន​ប៉ះ​ក្រុម​Muangthong United របស់​ថៃ

ក្រុម Cambodia All Stars ដែល​បង្កើត​ឡើង​ដោយ​សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បាន​ចាប់ផ្តើម​ប្រមូល​ផ្តុំ​ជា​ផ្លូវការ​នៅ​ថ្ងៃ​ចន្ទ ដើម​សប្ដាហ៍​នេះ​ ដើម្បី​ត្រៀម​ប្រកួត​មិត្តភាព​អន្តរជាតិ​ជាមួយ​ក្រុមបាល់ទាត់​ Muangthong United សមាជិក​ក្នុង​ពានរង្វាន់​លី​គ​កំពូល​ប្រទេស​ថៃ​នៅ​ដើមខែ​កុម្ភៈ ឆ្នាំ​២០១៩ ឆាប់ៗ​នេះ។

​ក្រោយ​ប្រមូលផ្តុំ​បាន​រយៈពេល​ខ្លី​នេះ​ក្រុម Cambodia All Stars បាន​ប្រកួត​មិត្តភាព​កម្តៅ​សាច់ដុំ​ក្រៅផ្លូវការ​ចាញ់​ក្រុម​African All Stars (​បណ្តុំ​កីឡាករ​មកពី​ទ្វីបអាហ្វ្រិក​ដែល​ប្រកប​អាជីព​បាល់ទាត់​នៅ​កម្ពុជា​) ដោយ​លទ្ធផល ៣​ទល់​០ កាលពី​នៅ​ថ្ងៃទី​៦ ខែកុម្ភៈ ឆ្នាំ​២០១៩ ថ្មីៗ​នេះ លើ​ទីលាន​ពហុ​កីឡដ្ឋាន​ជាតិ​ក្នុង​រាជធានី​ភ្នំពេញ​។ តាម​គម្រោង​ក្រុម Muangthong United របស់​ថៃ​នឹង​ប្រកួត​ជាមួយ​ក្រុម Cambodia All Stars នៅវេលា​ម៉ោង​៦​ល្ងាច​ថ្ងៃទី​៩ ខែកុម្ភៈ ឆ្នាំ​២០១៩ ខាងមុខ​លើ​ទីលាន​ពហុ​កីឡដ្ឋាន​ជាតិ​។​

ក្រុម Cambodia All Stars លើក​នេះ​ដឹកនាំ​ដោយ​លោក ភា សុភ​ត្រា គ្រូបង្វឹក​របស់​ក្រុម​ក្រសួងការពារជាតិ ខណៈ​ថ្នាក់ដឹកនាំ​ក្រុម​ផ្សេងទៀត​មាន​លោក ឈូក ពិសិដ្ឋ តែងតាំង​ជា​អ្នកចាត់ការ​ទូទៅ លោក អ៊ុំ សាវង្ស គ្រូ​ជំនួយ លោក ហោ សុខ​ហេង គ្រូ​ជំនួយ លោក យឿ​ម សារ៉ាន់ គ្រូ​ជំនួយ លោក ស៊ឹម ម៉េង​ហៃ គ្រប់គ្រង​សម្ភារៈ និង​លោក នី លក្ខណា គ្រប់គ្រង​សម្ភារៈ​។​

​ចំណែក​សម​សភាព​កីឡាករ​វិញ​មានដូចជា សំរឹទ្ធ សីហា​, ឈ​ង់ ប៊ុន​ណាត​, សេត រ៉​ស៊ី​ប​, នួន បូរី​, សឿ​យ វិសាល​, ប្រាក់ មុន្នី​ឧ​ត្ត​ម​, អ៊ុំ វិចិត្រ​, គួច សុ​កុម្ភៈ​, កែវ សុខ​ផេង​, សុះ ស៊ូ​ហា​ណា​, សារ៉េត គ្រី​យ៉ា​, រ៉ឹង ប៊ុន​ហៀ​ង​, ស៊ិន កក្កដា​, ឈិន ឈឿន​, ម៉ាត់ ណូ​រ៉ុ​ន​, ឆេង ម៉េង​, ហុង ផេង​, ភួង សុខ​សា​ណា​, ស៊ូ យ៉ា​ទី​, អ៊​ន ចាន់​ប៉ូ​លីន​, លី វ៉ា​ហេ​ទ​, អ៊ុ​ព កា​ម៉ុ​ល​, Joichiro Sugiyama, Anderson Zogbe, Mizuno Hikaru, Mohamad Hamza, Privat​។​

​ក្រុម Cambodia All Stars គឺជា​ការប្រមូលផ្ដុំ​កីឡាករ​ល្អៗ​នៅក្នុង​លី​គ​កំពូល​កម្ពុជា ទាំង​កីឡាករ​ខ្មែរ​និង​បរទេស ខណៈ​ក្រុម​នេះ​ធ្លាប់បាន​ប្រកួត​មិត្តភាព​៥​លើក​រួចមកហើយ​។ លោក ប្រាក់ សុវណ្ណារ៉ា និង លោក ទេព ឡុង​រចនា ក៏​ធ្លាប់មាន​បទពិសោធន៍​ដឹកនាំ​ក្រុម​មួយ​នេះដែរ​ ខណៈ​ចុងក្រោយ​លោក Leonardo Vitorino គឺជា​គ្រូបង្វឹក​ម្តង​។ ក្រុម Cambodia All Stars ត្រូវបាន​សហព័ន្ធ​កីឡាបាល់ទាត់​កម្ពុជា បង្កើតឡើង​នៅ​ចុងឆ្នាំ​២០១៥ មកម្ល៉េះ​។​

​សូម​រំលឹកថា​គោលដៅ​នៃ​ការប្រកួត​រវាង​ក្រុម Muangthong United និង​ក្រុម Cambodia All Stars កន្លងទៅ​គឺ​ដើម្បី​ដកស្រង់​បទពិសោធន៍ រវាង​ក្រុម​ទាំង​២​ក៏ដូចជា​រឹត​ចំណងមិត្តភាព​រវាង​ប្រទេស​ទាំង ជាពិសេស​គឺ​ដើម្បី​ប្រមូល​ថវិកា​សម្រាប់​សកម្មភាព​ពង្រឹងសមត្ថភាព​កីឡាករ​បាល់ទាត់​វ័យក្មេង​កម្ពុជា​នៅ​ទូទាំង ២៥​រាជធានី​-​ខេត្ត​នានា​ក្នុង​ព្រះរាជាណាចក្រ​កម្ពុជា ក្នុងការ​ត្រៀមខ្លួន​ឆ្ពោះ​ទៅកាន់​ការប្រកួត​ស៊ី​ហ្គេម​ឆ្នាំ​២០២៣ ដែល​កម្ពុជា​គ្រោង​ធ្វើ​ម្ចាស់ផ្ទះ​៕​
​

Source: Kampuchea Thmey Daily