កណ្ដាល ៖ សមត្ថកិច្ចនគរបាលស្រុកស្អាង បាននិងកំពុងធ្វើការស្រាវជ្រាវចាប់ខ្លួនបុរសជាប្តី ដែលបានប្រើអំពើហិង្សាយកផ្លែទួរណឺវិស ចាក់ត្រង់បំពង់កប្រពន្ធបណ្ដាលអោយរបួសធ្ងន់ ក្រោយពីបានទៅសុំរួមរស់គ្នាវិញ តែប្រពន្ធបដិសេធក្នុងថ្ងៃនៃសេចក្ដីស្រឡាញ់។
ហេតុការណ៍នេះ បានកើតឡើងនៅថ្ងៃព្រហស្បតិ៍ ១០កើត ខែមាឃ ពស២៥៦២ ត្រូវនឹងថ្ងៃទី១៤ ខែខែកុម្ភៈ ឆ្នាំ២០១៩ វេលាម៉ោង២១និង០០នាទី នៅចំណុចភូមិតានូ ឃុំស្អាងភ្នំ ស្រុកស្អាង ខេត្តកណ្ដាល។
នគរបាលស្រុកស្អាងបានឲ្យដឹងថា ជនរងគ្រោះ ឈ្មោះ សុខ ផល្លា ភេទស្រី អាយុ ៣៦ឆ្នាំ ជាតិខ្មែរ(ជាប្រពន្ធ) មានទីលំនៅភូមិតានូ ឃុំស្អាងភ្នំ ស្រុកស្អាង ខេត្តកណ្ដាល មុខរបរ កម្មការិនីរោងចក្រ(មានរបួសបំពង់ក)បច្ចុប្បន្នបញ្ជូនទៅព្យាបាលរបួសនៅមន្ទីរពេទ្យជ័យជំនះ ខេត្តកណ្ដាល។
ជនសង្ស័យ(ជាប្តី) ឈ្មោះជួង ជឹម ភេទប្រុស អាយុ៣៨ ឆ្នាំ ជនជាតិខ្មែរ មានទីលំនៅ ភូមិតានូ ឃុំស្អាងភ្នំ ស្រុកស្អាង ខេត្តកណ្ដាល មុខរបរ លាងម៉ូតូ (គេចខ្លួនបាត់)។
សាក្សីបានអោយដឹងថា នៅថ្ងៃទី១៤ ខែកុម្ភៈ ឆ្នាំ ២០១៩ វេលាម៉ោង២១និង០០នាទី ឈ្មោះ ជួង ជឹម បានមកដល់ផ្ទះឪពុកក្មេក ឈ្មោះសុខ ព្រិច មកតាមរកប្រពន្ធឈ្មោះសុខ ផល្លា អោយទៅផ្ទះរួមរស់ជាមួយគ្នាវិញ ប៉ុន្តែប្រពន្ធ ឆ្លើយថា អស់និស្ស័យហើយ មិនទៅវិញទេ បន្ទាប់មកឈ្មោះជួង ជឹម ក៏បិទភ្លើងអគ្គិសនី រួចចាប់អូសដៃឈ្មោះសុខ ផល្លា ទៅក្នុងរោងបាយក្បែរពាងទឹក រួចចាក់ប្រពន្ធចំបំពង់ក ដោយទួរណឺវិស ស្របពេលនោះ បានឮសូរសំឡេងកូនស្រែក ឈ្មោះសុខ ព្រិច ក៏រត់ទៅជួយឃាត់ទាញចេញពីគ្នា ទើបឈ្មោះជួង ជឹម ប្រលែងប្រពន្ធ រួចរត់គេចខ្លួនតែម្ដង។
ចំណែកជនរងគ្រោះត្រូវម្ដាយ និងបងប្អូនបញ្ជូនទៅព្យាបាលរបួស នៅមន្ទីរពេទ្យជ័យជំនះខេត្តកណ្ដាល។
សូមបញ្ជាក់ថា កន្លងមកឈ្មោះជួង ជឹម និងឈ្មោះសុខ ផល្លា (ជាប្រពន្ធ) ធ្លាប់មានទំនាស់ លែងលះគ្នាចំនួន៤ដងមកហើយ មានកិច្ចសន្យាត្រឹមត្រូវសាលាឃុំ៕
Source: Kampuchea Thmey Daily
0 Comments