តាកែវ ៖ បុរសម្នាក់ បានរងរបួសធ្ងន់ ក្រោយពីបើកបរម៉ូតូខ្វះការប្រុងប្រយ័ត្ន ត្រូវរថយន្តកូរ៉េ១តោនបុកពេញទំហឹង។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅថ្ងៃទី១៥ ខែកុម្ភៈ ឆ្នាំ២០១៩ វេលាម៉ោង១៩និង៤៥នាទី លើផ្លូវជាតិលេខ២ ចន្លោះគីឡូម៉ែត្រលេខ១១៧-១១៨ ត្រង់ចំណុចភូមិកំពង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ រវាងម៉ូតូ និងរថយន្ត ដែលមានទិសដៅផ្ទុយទិសគ្នា។
ប៉ូលិសស្រុកគីរីវង់បានឲ្យដឹងថា ម៉ូតូម៉ាក M.D ពណ៌ក្រហម គ្មានស្លាកលេខ បើកបរដោយ ឈ្មោះ អឹម អាត ភេទប្រុស អាយុ៣៦ឆ្នាំ រស់នៅភូមិកំពង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ មុខរបរ កសិករ រងរបួសធ្ងន់។
ចំណែករថយន្តម៉ាកកូរ៉េ១តោន ពណ៌ខៀវ ពាក់ស្លាកលេខ ម.០៧១១ ភព ២ បើកបរដោយ ឈ្មោះ ផុក ម៉ៅ ភេទប្រុស អាយុ២៦ឆ្នាំ មុខរបរអ្នកបើកបរ រស់នៅភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត ពុំត្រូវរបួសទេ។
ប៉ូលិសបានបញ្ជាក់ថា មូលហេតុ នៃគ្រោះថ្នាក់ចរាចរណ៍នេះ មកពីអ្នកបើកបរម៉ូតូបត់ខ្វះការប្រុងប្រយ័ត្ន។
បច្ចុប្បន្នវត្ថុតាង ម៉ូតូ និងរថយន្ត ត្រូវបានដកហូតយកមករក្សាទុកនៅអធិការដ្ឋាននគរបាលស្រុកគីរីវង់ដើម្បីដោះស្រាយគ្នានៅពេលក្រោយ ដោយឡែកជនរងគ្រោះ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកគីរីវង់៕
Source: Kampuchea Thmey Daily
0 Comments