ឡុង ជិន អ្នកប្រដាល់ក្លិបខ្លារខិនមានរិទ្ធ និង ជាម្ចាស់ខ្សែក្រវាត់ខារ៉ាបាវ ទម្ងន់៦០គីឡូក្រាម ត្រូវបានគេផ្គូឲ្យជួបប្រកួតជាមួយអ្នកប្រដាល់ថៃ ថា ណាសាក់ (Tha Nasak)នៅលើសង្វៀន Wurkz របស់ទូរទស្សន៍អាស៊ីអាគ្នេយ៍ នារសៀលថ្ងៃអាទិត្យ ទី១៧ ខែកុម្ភៈ ចុងសប្ដាហ៍នេះ។
អ្នកប្រដាល់ថៃ ថា ណាសាក់ គេជាអ្នកប្រដាល់ថៃចំណូលថ្មី ទើបមកប្រកួតនៅសង្វៀនSEA TVនេះលើកដំបូងប៉ុណ្ណោះ។ ដូច្នេះមិនដឹងថា ទៅរួច ឬអត់ជាមួយអ្នកប្រដាល់ជើងខ្លាំងកម្ពុជា ឡុង ជិន ម្ចាស់ខ្សែក្រវាត់នោះទេ?។
តាមលោកញាណ សុធី អ្នកចាត់ចែងកម្មវិធីប្រដាល់ប្រចាំសង្វៀនSEATV ឲ្យដឹងនោះថា អ្នកប្រដាល់ថៃ ថា ណាសាក់ រូបនេះ គេមានសមត្ថភាពប្រហាក់ប្រហែល ឡុង ជិន ដែរ គឺមានប្រវត្តិប្រកួតចំនួន ៦៥លើក ក្នុងនោះឈ្នះ៥៥លើក ចាញ់០៩លើក និងស្មើ០១លើក។ លោក ធី ថា កម្ពស់ក៏ប្រដំប្រសងគ្នាដែរ គឺថា ណាសាក់ មានកម្ពស់១,៦៨ម៉ែត្រ ឯ ឡុង ជិន ១,៦៩ម៉ែត្រ។
ឡុង ជិន គេមានប្រវត្តិប្រកួតចំនួន៧៣លើក ឈ្នះ៥៥លើក ចាញ់១៦លើក និងស្មើ០២លើក។ គេបានក្លាយជាម្ចាស់ខ្សែក្រវាត់ ទម្ងន់៦០គ.ក្រ នេះ ក្រោយពីបានវាយឈ្នះថៃ៤នាក់ និងចុងក្រោយឈ្នះមិត្តរួមជាតិ ឈុត សេរីវ៉ាន់ថង ដោយពិន្ទុក្នុងការប្រកួតផ្ដាច់ព្រ័ត្រនោះ។
គេធ្លាប់ដឹងរួចមកហើយថា ឡុង ជិន ជាអ្នកប្រដាល់ជើងចាស់មួយរូបដែលមានល្បិចប្រយុទ្ធនៅលើសង្វៀនយ៉ាងក្រាស់ក្រែល ផ្លែកែង និង ជង្គង់របស់គេពេលវាយចេញម្ដងៗរហ័សខ្លាំងណាស់ ឯចិត្តក៏សឿងទៀត។ ថ្វីដ្បិតតែលើកនេះ គេត្រូវប៉ះជាមួយអ្នកប្រដាល់ឆ្លងដែនមកពីថៃ ដែលមានបទពិសោធន៍ប្រកួតប្រហាក់ប្រហែលគ្នា ក៏ ឡុង ជិន មិនខ្លាចដែរ។
ចំពោះ សេង ស្រឿន ជាអ្នកប្រដាល់ក្លិបមហិទ្ធរិទ្ធមេសរថ្ងកខេត្តស្វាយរៀង គេនឹងជួបប្រកួតជាមួយអ្នកប្រដាល់ថៃហ្វា មៀឆៃ ( Fa Mechhai) ដោយជួបគ្នាក្នុងទម្ងន់៦៣,៥០០គីឡូក្រាម។ សេង ស្រឿន ធ្លាប់ជួបថៃច្រើននាក់ជាងជួបជាមួយខ្មែរគ្នាឯង។ ប៉ុន្តែ ស្រឿន ពុំធ្លាប់ដែលជួបជាមួយអ្នកប្រដាល់ថៃ ហ្វា មៀឆៃ នេះទេ។
ហ្វា មៀឆៃ គេមានកំណត់ត្រាប្រកួតតិចជាង សេង ស្រឿន។ មៀឆៃ គេឆ្លងកាត់ការប្រកួតលើសង្វៀនចំនួន៦៥លើក ក្នុងនោះវាយ ឈ្នះ៥៣លើក និង ចាញ់១២លើក មិនដែលស្មើ។
បើធៀបជាមួយសេង ស្រឿន គឺតិចជិត២០លើក ខណៈដែល សេង ស្រឿន គេមានកំណត់ត្រាចំនួន៨២លើក ឈ្នះ៦៥លើក និងចាញ់១៧លើក មិនដែលស្មើដូចគ្នា។ យ៉ាងណា សេង ស្រឿន គេមានកម្ពស់ខ្ពស់ជាងហ្វា មៀឆៃ គឺ១,៧០ម៉ែត្រ ខណៈ មៀឆៃ ១,៦៨ម៉ែត្រ។
ចាំមើល រវាងសេង ស្រឿន និង ហ្វា មៀឆៃ ជួបគ្នាលើកដំបូងនេះ តើនរណាជាអ្នកឈ្នះនោះ?។ តែយ៉ាងណា សេង ស្រឿន មិនអាចមើលស្រាលហ្វា មៀឆៃ នេះបានទេ ទោះបីជាគេមកប្រកួតលើកមុន(២៧មករា២០១៩) វាយចាញ់ រិន សារ័ត្ន អ្នកប្រដាល់ក្លិបអប់រំកាយកីឡាស្រុកអន្លង់វែងដោយពិន្ទុក៏ដោយ។ សូមបញ្ជាក់ថា សេង ស្រឿន ការប្រកួតជាមយយថៃលើកចុងក្រោយរបស់គេ(០២កុម្ភៈ២០១៩) ក៏វាយចាញ់អ្នកប្រដាល់ថៃ កូលាប ដាំ ក្នុងទឹកទី៤ ដែរ។
ចំពោះការប្រកួតរវាងអ្នកប្រដាល់រួមជាតិវិញ តក់ សោភ័ណ្ឌ អ្នកប្រដាល់ក្លិបអេភូថងកីឡា ត្រូវគេផ្គូឲ្យជួបប្រកួតជាមួយ មាស សុជាតិ អ្នកប្រដាល់ក្លិបឃ្លាំងមឿងកីឡាខេត្តពោធិ៍សាត់ ដោយជួបគ្នាក្នុងទម្ងន់៦៧គីឡូក្រាម។ ចំណែក សោម ថុនា អ្នកប្រដាល់ក្លិបកងទ័ពជើងទឹក ជួបប្រកួតជា មួយ ខាំ ផានី អ្នកប្រដាល់ក្លិបដីឡូត៍មានរិទ្ធខេត្តបន្ទាយមានជ័យ ក្នុងប្រភេទទម្ងន់៦៩គីឡូក្រាម៕
Source: Kampuchea Thmey Daily
0 Comments