បាត់ដំបង ៖ ខារ៉ាអូខេមួយកន្លែង ក្នុងក្រុងបាត់ដំបង ត្រូវបានអគ្គិភ័យលេបត្របាក់ទាំងស្រុង ធ្វើឲ្យនារីៗ ដែលកំពុងសម្រាកនៅក្នុងបន្ទប់ រត់ចេញប្រសេចប្រសាច បន្ទាប់ពីមានការឆ្លងចរន្តអគ្គិសនី និងបង្កឲ្យមានអណ្ដាតភ្លើងឆាបឆេះតែម្តង។
ហេតុការណ៍នេះ បានកើតឡើង នៅវេលាម៉ោង១១និង៥០នាទី ថ្ងៃទី១៦ ខែកុម្ភៈ ឆ្នាំ២០១៩ ត្រង់ ចំណុចខារ៉ាអូខេមួយកន្លែង យីហោ កោះតៃវ៉ាន់ ស្ថិតក្នុងក្រុមទី១៦ ភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង ដោយសារតែមានករណី អគ្គិភ័យមួយ បានកើតឡើងបណ្តាលឲ្យឆេះផ្ទះមួយខ្នងធ្វើអំពីឈើលើ ថ្មក្រោម ប្រក់ស័ង្កសី ទំហំ ៨x២០ ម៉ែត្រ (ឆេះអស់ទាំងស្រុង)។
ភ្លាមៗនោះដែរ រថយន្តបង្ការ និងពន្លត់អគ្គិភ័យ នៃស្នងការដ្ឋាននគរបាលខេត្តបាត់ដំបង បានចេញដើម្បីបាញ់ទឹកទប់ស្កាត់នូវការរាលដាលទៅកាន់លំនៅដ្ឋានពលរដ្ឋដទៃ។ ប៉ុន្តែទោះបីជាមានការអន្តរាគមន៍បែបនេះក្តីក៏ទីតាំងខារ៉ាអូខេមួយកន្លែងនេះ ត្រូវបានឆេះទាំងស្រុង។
ទីតាំងនេះជារបស់ ឈ្មោះ ថាច់ សង្វាត ហៅ វ៉ាត់ អាយុ៥២ឆ្នាំ ជាប្តី និងប្រពន្ធ ឈ្មោះ ម៉ៅ សុភី អាយុ៤០ឆ្នាំ ដែលសរុបជាទឹកប្រាក់អស់ប្រមាណ២៥.០០០ដុល្លារ ដោយមូលហេតុ គឺ ផ្ទុះអំពូលភ្លើងក្នុងបន្ទប់ខារ៉ាអូខេ ហើយក៏ឆេះអេប៉ុងកៅស៊ូធ្វើឲ្យឆេះរាលដាលតែម្ដង ឯស្រីៗ ដែលកំពុងដេកបានរត់ចេញប្រសាចមកខាងក្រៅដើម្បីឲ្យផុតពីគ្រោះថ្នាក់៕
Source: Kampuchea Thmey Daily
0 Comments