គណៈកម្មការសាងសង់ បង្ហាញកម្មវិធីចូលទស្សនាវិមាន ឈ្នះ ឈ្នះ ក្រោយពីមានអ្នកចូលទស្សនាកើនឡើងខ្លាំង

ភ្នំពេញ ៖ គណៈកម្មការសម្រាប់សិក្សា និងសាងសង់វិមានអនុស្សាវរីយ៍នយោបាយឈ្នះ ឈ្នះ និងការបញ្ចប់សង្គ្រាមស៊ីវិលនៅកម្ពុជា ហៅកាត់ថា “គណៈកម្មការសាងសង់វិមានឈ្នះឈ្នះ” បានបង្ហាញកម្មវិធីមួយចំនួន សម្រាប់ការចូលទស្សនាវិមានឈ្នះ ឈ្នះ ហើយការដាក់កម្មវិធីចូលទស្សនានេះ ដោយសាតែមួយរយៈចុងក្រោយនេះ មានការចាប់អារម្មណ៍ និងចូលទស្សនាយ៉ាងច្រើនពីសំណាក់ភ្ញៀវជាតិ និងអន្តរជាតិ នេះបើតាមសេចក្ដីជូនដំណឹងរបស់គណៈកម្មការចុះថ្ងៃទី០៥ ខែកុម្ភៈ ឆ្នាំ២០១៩។

គណៈកម្មការសាងសង់វិមានឈ្នះឈ្នះ បានឲ្យដឹងថា ឈរលើស្មារតីគោរព ស្រឡាញ់ និងបញ្ជាក់ពីការគាំទ្រ ការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានកសាង តឹកតាងប្រវត្តិសាស្ត្រជាតិពិត ដែលមិនធ្លាប់មានជាប្រវត្តិសាស្ត្រនៅលើទឹកដីកម្ពុជា ទើបនៅក្នុងរយៈពេល៥សប្ដាហ៍ចុងក្រោយនេះ បន្ទាប់ពីការសម្ពោធ និងអបអរសាទរខួបលើកទី២០ នៃទិវានយោបាយឈ្នះ ឈ្នះ កាលពីថ្ងៃទី២៩ ខែធ្នូ ឆ្នាំ២០១៨ កន្លងមក ធ្វើឱ្យវិមានឈ្នះ ឈ្នះ ទទួលបានការទាក់ទាញ និងយកចិត្តទុកដាក់យ៉ាងខ្លាំងពីសំណាក់សាធារណៈជនជាតិ អន្តរជាតិ ប្រាថ្នាចូលទស្សនា យល់ដឹង និងឈ្វេងយល់ជាប់ជាប្រចាំរាល់ថ្ងៃទាំងព្រឹក ទាំងល្ងាច និងយប់។

តាមគណៈកម្មការសាងសង់វិមានឈ្នះឈ្នះ បច្ចុប្បន្នក្រុមការងារ បានបន្តនិរន្តរភាពក្នុងដំណាក់កាលអន្តរកាលរបស់ខ្លួន ដោយទទួលភារកិច្ចដ៏ធំធេង ឈរលើស្មារតីទទួលខុសត្រូវ និងម្ចាស់ការខ្ពស់ តាមអនុសាសន៍ដ៏ខ្ពង់ខ្ពស់របស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការសាងសង់វិមានឈ្នះឈ្នះ បានប្រគល់ជូន។ ដោយសារសមាជិកក្រុមការងារទទួលបន្ទុកវិមានឈ្នះឈ្នះ សមត្ថភាពនៅមានកម្រិត ក្នុងការផ្តល់សេវា និងបច្ចេកទេស មិនទាន់ឆ្លើយតបបានទៅនឹងទីតាំងដែលទើបចាប់ផ្ដើមកសាងនេះ ដូចជាបរិវេណតូច ការធានាគ្រប់គ្រងបច្ចេកទេស អគ្គិសនី និងរបៀបរបបសណ្ដាប់ធ្នាប់ចេញ ចូល នៅមានកម្រិត ទៅតាមទំហំសេចក្តីត្រូវការរបស់អ្នកទស្សនា។

ដើម្បីតម្រូវតាមអ្វីដែលជាការពិតជាក់ស្តែងនោះ គណៈកម្មការសាងសង់វិមានឈ្នះឈ្នះ បានបញ្ជាក់ថា ទី១, សារមន្ទីរមគ្គុទ្ទេសក៍តេជោសែន នឹងរៀបចំបើកឲ្យទស្សនាជារៀងរាល់ថ្ងៃពុធ សុក្រ សៅរ៍ និងអាទិត្យ ដោយចាប់ពីម៉ោង២ រសៀល ដល់ម៉ោង៥ ល្ងាច។
ទី២, ចំពោះការបើកឲ្យចូលទស្សនាក្រៅពីពេលវេលាកំណត់ខាងលើនេះ គណៈកម្មការសាងសង់វិមានឈ្នះឈ្នះ អនុញ្ញាតជូនតែមន្ត្រីរាជការ ក្រសួង ស្ថាប័ន និងក្រុមកម្មសិក្សានីមួយៗ ដែលបានស្នើសុំជាផ្លូវការ។
ទី៣, ចំពោះតំបន់សុខដុមនីយកម្ម តំបន់សួនតេជោសន្តិភាព រូបចម្លាក់ និងបរិវេណជុំវិញ អនុញ្ញាតឲ្យចូលទស្សនាជាធម្មតា។

ដោយសារមានឈ្នះ ឈ្នះ នឹងក្លាយជាសំណង់រយឆ្នាំសម្រាប់អនាគត ហើយទើបតែចាប់ផ្ដើមដាក់ជូនទស្សនាជាជំហានដំបូងដ៏ខ្លីប៉ុណ្ណោះ ទទួលបានការចូលរួមពីសាធារណជនគ្រប់ស្រទាប់ រួមទាំងអ្នកសិក្សាស្រាវជ្រាវនានាផងដែរ ហើយដោយសារតែដំណើរការដ៏វែងឆ្ងាយ ដែលត្រូវបន្ត ដូចនេះគណៈកម្មការនឹងផ្ដល់ដំណឹងជូនជាក់ស្ដែងតាមជំហាន និងតាមដំណាក់កាលនីមួយៗថែមទៀត។

តាមសេចក្ដីជូនដំណឹងនោះ ក្រុមការងារបានរៀបចំទីតាំងផ្ដល់ព័ត៌មានមួយ នៅខាងមុខជាបណ្ដោះអាសន្ន ដើម្បីចែករំលែកព័ត៌មាន ព្រមទាំងការយល់ដឹងអំពីការតាំងពិព័រណ៍ និងការបញ្ចាំងខ្សែវីដេអូបឋម ដើម្បីជាការសិក្សាស្វែងយល់ មុននឹងធ្វើដំណើរទស្សនកិច្ចជុំវិញវិមានឈ្នះឈ្នះ ហើយដើម្បីឲ្យការចូលទស្សនានៅតំបន់វិមានឈ្នះឈ្នះ ងាយយល់ដឹងបានទូលំទូលាយ ឆ្លើយតបទៅនឹងរូបចម្លាក់ ទម្រង់សំណង់ និងរឿងរ៉ាវនៅក្នុងសារមន្ទីរ ក្រុមការងារសំណូមពរដល់គណៈប្រតិភូទស្សនកិច្ច សាធារណជនជាតិ អន្តរជាតិទាំងអស់ មុននឹងអញ្ជើញមកទស្សនាវិមានឈ្នះ ឈ្នះ គប្បីទស្សនាខ្សែវីដេអូ ដែលមានចំណងជើងថា “មាគ៌ាសង្គ្រោះជាតិកម្ពុជា” ជាប្រវត្តិជាក់ស្ដែងក្នុងការយកជីវិតធ្វើជាដើមទុនរបស់សម្ដេចតេជោ សែន នាយករដ្ឋមន្ត្រី និងទស្សនាវីដេអូខ្លីស្តីពី “ដំណើរការអនុវត្តន៍នយោបាយ ឈ្នះ ឈ្នះ” “សំណង់វិមាន ឈ្នះ ឈ្នះ” និងអត្ថន័យទាក់ទងទៅនឹងប្រវត្តិសាស្ត្រនៃការសាងសង់ ដែលមានអត្ថន័យទាក់ទងជាមួយនឹងខ្លឹមសារ ដែលគណៈកម្មការសាងសង់វិមានឈ្នះ ឈ្នះ ផ្តល់ជូនតាមរយៈបទសម្ភាសន៍ជាមួយប្រព័ន្ធផ្សព្វផ្សាយ ដែលមានទូរទស្សន៍ សៀវភៅ និងឯកសារផ្សេងៗជាដើម ដែលបានចែកជូនកន្លងមក។ នៅពេលខាងមុខ ដើម្បីផ្ដល់ជូនសាធារណៈជនជាតិអំពីព្រឹត្តិការណ៍ប្រវត្តិសាស្ត្រជាតិ ឲ្យកាន់តែប្រសើរឡើងថែមទៀត ក្រុមការងារ នឹងរៀបចំសារមន្ទីរបន្ថែមនៅជាន់ផ្ទាល់ដី តាមលទ្ធភាព និងពេលវេលាជាក់ស្ដែង។
ដើម្បីចូលរួមចំណែក ថែរក្សាសន្តិសុខ សណ្ដាប់ធ្នាប់ បរិស្ថាន និងសោភ័ណភាពស្អាត ប្រកបដោយអនាម័យ គណៈកម្មការសាងសង់វិមានឈ្នះឈ្នះ សំណូមពរយ៉ាងទទូចចំពោះសាធារណៈជនជាតិ អន្តរជាតិទាំងអស់ ដែលអញ្ជើញទស្សនាវិមានឈ្នះ ឈ្នះ យកចិត្តទុកដាក់ចូលរួមអនុវត្តបញ្ហាមួយចំនួនរួមមាន ទី១, ចូលរួមទស្សនា ដោយអធិដ្ឋាននូវបាវចនាទាំង៣នៃវិមានឈ្នះ ឈ្នះ គឺភាពកតញ្ញូ សុខដុម និងការចូលរួមចំណែកទាំងអស់គ្នា ដើម្បីសិក្សាស្វែងយល់ឲ្យបានស៊ីជម្រៅ នូវអត្ថន័យនយោបាយឈ្នះ ឈ្នះ ដើម្បីបន្តការអភិវឌ្ឍ ឲ្យក្លាយទៅជាទីឋានសក្ការៈ សម្បត្តិវប្បធម៌ប្រវត្តិសាស្ត្រ សម្រាប់មនុស្សជំនាន់ក្រោយបន្តទៅមុខទៀត។
ទី២, ក្នុងពេលទស្សនា នៅបរិវេណវិមានឈ្នះ ឈ្នះ សូមចូលរួមធានាសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយ តាមសេចក្តីណែនាំរបស់ក្រុមមគ្គុទ្ទេសក៍ប្រចាំការ។
ទី៣, សូមជួយថែរក្សា ការពារក្បាច់ចម្លាក់ រចនាបថ ស្ថាបត្យកម្ម នៃសំណង់ និងសោភ័ណភាព ដើម្បីរក្សាបានអនាម័យខ្ពស់ មិនមានការហូបចុក ឬយកសម្ភារៈ សំរាមដែលធ្វើឲ្យបាត់សោភ័ណភាព ប៉ះពាល់ដល់សំណង់វិមានឈ្នះ ឈ្នះ និងសំណង់អម ឬអាងទឹកដែលនាំឲ្យខូចខាតលក្ខណៈបច្ចេកទេសដើមនៃសំណង់ ដូចជាការប៉ះពាល់រូបចម្លាក់ ដើមឈើ ដែលជាសម្បត្តិសាធារណៈ ដើម្បីរក្សាទុកតកូន តចៅ ទៅជំនាន់ក្រោយ។

ជាមួយគ្នានោះ គណៈកម្មការសាងសង់វិមានឈ្នះ ឈ្នះ មានជំនឿយ៉ាងមុតមាំថា សាធារណជនជាតិ អន្តរជាតិ នឹងរួមគ្នាដើម្បីថែរក្សា កសាង តឹកតាងប្រវត្តិសាស្ត្រ ដែលពុំធ្លាប់មាននេះជារៀងរហូត៕