ព្រំ សំណាង អ្នកប្រដាល់ជើងខ្លាំង នៃក្លិបកងពលតូចទ័ពឆ័ត្រយោង៩១១ ត្រូវគេផ្គូ ឲ្យប្រកួតជាមួយអ្នកប្រដាល់វ័យក្មេងថៃ Manouv Van នាយប់ថ្ងៃសុក្រ ទី៣០ ខែមីនា ឆ្នាំ២០១៨នេះ នៅលើសង្វៀនTV5 ព្រែកកំពឹស ក្នុងកម្មវិធីប្រដាល់កំពូលជើងឯកTV5 Knock Out Series by K.cement ។
ព្រំ សំណាង និង Manouv Van នឹងប្រកួតគ្នាក្នុងទម្ងន់៧៧គីឡូក្រាម។ សំណាង លើកនេះ ប៉ះចំជើងខ្លាំងហើយ ព្រោះអ្នកប្រដាល់ថៃរូបនេះ មិនត្រឹមតែវាយខ្លាំងទេ គឺថែមទាំងជាជើងខ្លាំងនៅប្រចាំ នៅស្រុកថៃផងដែរ។ នេះបើតាម លោក ថៃ អ៊ូ ប្រតិភូដឹកនាំកីឡាករថៃមកប្រកួតឲ្យដឹង។
លោក ថៃ អ៊ូ បានប្រាប់កម្ពុជាថ្មីយ៉ាងដូច្នេះថា Manouv Van គេជាជើងខ្លាំងវ័យក្មេងនៅស្រុកថៃ តែគេមិនធ្លាប់មកប្រកួតនៅកម្ពុជានោះទេ គឺជាលើកទី១ សម្រាប់រូបគេ ដែលមកជួបជាមួយអ្នកប្រដាល់កម្ពុជានេះ។
ដូចនេះមិនធម្មតាទេ យកថៃជើងខ្លាំងមកជួបព្រំសំណាងលើកនេះ ដោយសារតែយកមកលើកមុនៗត្រូវសំណាងបំបាក់ តែក្នុងទឹកទី១ ទី២ ឬទី៣ប៉ុណ្ណោះ ដែលធ្វើឲ្យ សំណាង ជួបបញ្ហាអត់គូវាយរហូតមកដល់ពេលនេះ។
Manouv Van គេមានប្រវត្តិប្រកួតចំនួន៧៥លើក ក្នុងនោះឈ្នះ ៦៨លើក ចាញ់ ០៥លើក និង ស្មើ ០២លើក។
ទោះជាយ៉ាងណា ព្រំ សំណាង គេមិនខ្លាចនោះឡើយ ដោយគេបានអះអាងថា ការឈ្នះចាញ់ មិនអាចទាយមុនបានទេ គឺទាល់តែប្រកួតគ្នាទើបដឹងថា អ្នកឈ្នះ អ្នកណាចាញ់បាន។ សំណាង ប្រកួតជាមួយថៃលើកចុងក្រោយ បានផ្ដួលអ្នកប្រដាល់ថៃChalermdet Sor. Tawanrung ក្នុងទឹកទី២ កាលពីថ្ងៃទី៣០ ខែមិនា ឆ្នាំ២០១៨កន្លងទៅ។ គិតត្រឹមពេលនេះ ព្រំ សំណាង គេវាយឈ្នះអ្នកប្រដាល់បរទេសប្រមាណជាង៣០នាក់ហើយ ក្នុងនោះមានថៃជាង២០នាក់ផងដែរ។
ព្រំ សំណាង គេមានផ្លែកណ្ដាប់ដៃ និងជង្គង់ល្អណាស់ ហើយថែមទាំងមានកម្លាំងកាយសម្បទាល្អរឹងមាំ មិនចាញ់អ្នកប្រដាល់បរទេសឡើយ។ ហើយបើប្រកួតជាមួយខ្មែរគ្នាឯងវិញ សំណាង ហាក់ដូចជារកដៃគូមិនបាននោះទេ ព្រោះគេឈ្នះរហូត។ សំណាង មានចិត្តប្រដាល់ធំ មិនចេះខ្លាច មិនចេះញញើត គ្រាន់តែគេខ្វះល្បិចកលក្នុងការផ្ដួលគូប្រកួតតែប៉ុណ្ណោះ។
ទោះជាយ៉ាងនេះក្តី ព្រំ សំណាង មិនទាន់ប្រាកដថា អាចយកឈ្នះលើអ្នកប្រដាល់ថៃ Manouv Van បាននោះឡើយ។ ហើយយ៉ាងណា ព្រំ សំណាង ក៏មិនអាចមើលស្រាលអ្នកប្រដាល់ថៃនោះដែរ។
ព្រំ សំណាង មានប្រវត្តិប្រកួត៨៧លើក ក្នុងនោះវាយឈ្នះ៧៧លើក ចាញ់០៨លើក និង ស្មើ០២លើក។ ចាំមើល តើ ព្រំ សំណាង ឬ Manouv Van ដែលឈ្នះក្នុងការជួបប្រកួតគ្នានេះ៕
Source: Kampuchea Thmey Daily
0 Comments