ស្ទឹងត្រែង ៖ ជនសង្ស័យម្នាក់ ជាជនជាតិឡាវមាន ឈ្មោះងួន ឡៃ អាយុ៤០ឆ្នាំ ត្រូវបានកម្លាំងកងរាជអាវុធហត្ថខេត្តឃាត់ខ្លួនបាន ជាមួយនឹងវត្ថុតាង ថ្នាំញៀន ប្រភេទមេតំហ្វេតាមីន(WY)ពណ៌ក្រហមចំនួន២៧កញ្ចប់តូចស្មើនឹង៥៣០២គ្រាប់ ដែលបាននាំចូលមកទឹកដីកម្ពុជាតាមច្រកត្រពាំងគ្រៀលនៅថ្ងៃទី០៦ ខែកុម្ភៈ ឆ្នាំ២០១៩នេះ។
មន្ត្រីកងរាជអាវុធហត្ថខេត្តបានបញ្ជាក់ថា ៖ ការឃាត់ខ្លួន ជនជាតិឡាវនេះ បានធ្វើឡើងវេលាម៉ោង ១០និង៤២នាទីនៅថ្ងៃទី០៦ ខែកុម្ភៈ ឆ្នាំ២០១៩ នៅចំណុចបង្គោលលេខ០៣៦ ក្នុងភូមិខាំផាន់ ឃុំអូរស្វាយសង្កាត់សាមគ្គីក្រុង ខេត្តស្ទឹងត្រែង។
លោកឧត្ដមសេនីយ៍ត្រីអៀង វ៉ាន់ឌី មេបញ្ជាការកងរាជអាវុធហត្ថខេត្តបានបញ្ជាក់ថា ៖ ជនសង្ស័យឈ្មោះងួន ឡៃ នេះ មានមុខរបរធ្វើជាកម្មករមានទីលំនៅបច្ចុប្បន្នភូមិភាងឌី ស្រុកមឿងខូង ខេត្តចំប៉ាសាក់ប្រទេសឡាវ ក្រោយពីឃាត់ខ្លួនត្រូវបាននាំ មកទីបញ្ជាការកងរាជអាវុធហត្ថខេត្តដើម្បីសាកសួរលម្អិតពីករណីនេះ។
លោកឧត្ដមសេនីយ៍បន្តថា ជនសង្ស័យអួនឡៃ បានសារភាពថា ៖ គ្រឿងញៀននេះ ពិតជាខ្លួនបាននាំយកមកពីប្រទេសឡាវមែន ដោយមិនបានគិតខ្លាចសមត្ថកិច្ចចាប់នោះទេ ព្រោះតែចង់បានប្រាក់ដើម្បីដោះស្រាយជីវភាពរស់នៅ ព្រោះមានជនម្នាក់ដែលខ្លួនធ្លាប់ស្គាល់ជាជនជាតិខ្មែរទៅលេងនៅប្រទេសឡាវបានពឹងពាក់ឱ្យនាំយកមកឱ្យនៅក្នុងទឹកដីកម្ពុជា។
គួររំលឹកថា កាលពីថ្ងៃទី២៩ ខែមករា ឆ្នាំ២០១៩កន្លងមកថ្មីៗនេះ ឯកឧត្ដមនាយឧត្ដមសេនីយ៍កែ.គឹមយ៉ាន ឧបនាយករដ្ឋមន្ត្រីប្រធានអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍ ណែនាំឱ្យកម្លាំងសមត្ថកិច្ចបង្កើនការបង្ក្រាបបទល្មើសគ្រឿងញៀននេះ ឱ្យ បានសកម្ម និងបង្កើនល្បឿនធ្វើការផ្សព្វផ្សាយឱ្យបានញឹកញាប់ដល់ស្រទាប់ប្រជាពលរដ្ឋដើម្បីកុំឱ្យចាញ់បោកតាមការញុះញង់។
សូមបញ្ជាក់ថា ៖ ថ្នាំញៀន២៧កញ្ចប់នេះ សមត្ថកិច្ចបានហែក រាប់ជាក់ស្ដែងមានចំនួន៥៣០២គ្រាប់ហើយមន្ត្រីជំនាញ បានរៀបចំសំណុំរឿងបញ្ជូនទៅតុលាការដើម្បីអនុវត្តតាមនីតិវិធី៕
Source: Kampuchea Thmey Daily
0 Comments